Matteus 10:40-42 – Gasvryheid ontsluit God se teenwoordigheid

Ons fokus vandag in Matteus 10:42-44 op gasvryheid. Jesus is besig in sy tweede belangrike toespraak in Matteus met die uitsendingrede.  Jesus het die dissipels nou al voorberei vir die werklikheid van vervolging (10:16-25).  Hy het hulle bemoedig om nie bang te wees nie, want God sal sorg (10:26-31).  Hy het hulle aangemoedig om Hom as Christus te bely en nie te verloën nie (10:32-33), want die werklikheid is dat lojaliteit aan Hom skeiding sal bring (10:34-39).

Maar, Hy bemoedig hulle ook dat Hy sal sorg dat hulle gasvry ontvang word, en dat dié mense wat hulle gasvry ontvang, deur God self beloon sal word.  Gasvryheid is dus ‘n kanaal waardeur God se beloning ontvang word, en ‘n manier waarop gasvry mense deel het aan die koms van die koninkryk.

HIER VOLG DIE HELE EREDIENS

Toetrede

Liedboek 177 – Jesus, gróót bo almal – sterke Verlosser, magtige Heer en Heiland – sit

Votum

“⁴Luister tog en antwoord my, Here my God! Gee my tog nuwe lewenskrag.

⁶Ek hou vas aan u troue liefde, oor die uitkoms wat U gee, juig my hart.

Ek wil sing tot eer van die Here, omdat Hy aan my goed gedoen het.”

(Uit Psalm 13)

Seëngroet

Lofsang

Liedboek 220 – Met ons harte sing ons, Here, van u liefde meer en meer – staan

Liedboek 209 – Heer met my hele hart kom sing ek ’n lofsang – sit

Kindertyd

Ons Bybelteks vandag gaan oor vriendelike gasvryheid!

Nou wat beteken die snaakse woord gasvryheid? Dit beteken om vriendelik te wees, om met warmte teenoor ander mense op te tree, om vrygewig te wees deur dit wat jy het met ander te deel, om mense te laat welkom voel, om hulle te help as hulle iets benodig.

Hoekom doen ons dit?

God sien raak wanneer ons goeie dinge doen

40–41 “Ek en julle werk saam in ’n span. As iemand vriendelik met julle is, dan is hulle ook vriendelik met My en met my hemelse Vader. Wanneer iemand goed doen aan een van julle wat vir God werk, sal God hom of haar daarvoor beloon.

42 “Party mense wat in My glo^*, is baie arm. Ander mense gee niks vir hulle om nie. Wanneer julle so iemand help, sal julle regtig ’n plek in die hemel kry. Selfs al gee julle maar net vir so iemand ’n glas koue water, sal God dit raaksien. Want Hy is vriende met almal wat in My glo^*.”

(Die Nuwe Testament vir Kinders deur Stephan Joubert, Jan van der Watt en Hennie Stander, 1999.)

Jesus sê dat gasvryheid is om vir iemand ‘n glas koue water te gee. Vir ons is dit maklik nie waar nie? Jy stap na die yskas toe, haal water of ysblokkies uit, en jy skink vir iemand ‘n glas koue water.

Maar in Jesus se tyd was dit nie so maklik nie.  Hulle het nie yskaste gehad nie. So hoe het ‘n mens in Jesus se tyd vir iemand ‘n glas koue water aangebied? Met groot moeite!

Die enigste manier was om na die naaste put te gaan en daaruit water op te hys met die swaar  emmer en dan vir iemand te skink. Maar daar was nie by elke huis ‘n put nie. Putte was soms vêr en dan moet jy nog in die middel van ‘n warm dag soontoe stap – een of twee of selfs drie kilometer.

Jesus wil vir ons sê dat ons moeite moet doen vir ander.  As ons dit doen, dan doen jy dit vir Jesus! Hy sien dit raak, en dit maak sy hart bly as jy vir ander omgee … selfs met ‘n glas koue water!

Epiklese              

Skriflesing

Ons fokus vandag in Matteus 10:42-44 op gasvryheid. Jesus is besig in sy tweede belangrike toespraak in Matteus met die uitsendingrede.  Jesus het die dissipels nou al voorberei vir die werklikheid van vervolging (10:16-25).  Hy het hulle bemoedig om nie bang te wees nie, want God sal sorg (10:26-31).  Hy het hulle aangemoedig om Hom as Christus te bely en nie te verloën nie (10:32-33), want die werklikheid is dat lojaliteit aan Hom skeiding sal bring (10:34-39).

Maar, Hy bemoedig hulle ook dat Hy sal sorg dat hulle gasvry ontvang word, en dat dié mense wat hulle gasvry ontvang, deur God self beloon sal word.  Gasvryheid is dus ‘n kanaal waardeur God se beloning ontvang word, en ‘n manier waarop gasvry mense deel het aan die koms van die koninkryk.

Matteus 10:40-42 (DBV)

⁴⁰“Wie julle ontvang, ontvang My; en wie My ontvang, ontvang Hom wat My gestuur het. ⁴¹Wie ’n profeet ontvang omdat hy ’n profeet is, sal die beloning van ’n profeet ontvang; en wie ’n regverdige ontvang omdat hy ’n regverdige is, sal die beloning van ’n regverdige kry. ⁴²En wie aan een van hierdie geringes ’n beker koue water gee om te drink, bloot omdat hy ’n dissipel is – Amen, Ek sê vir julle: Hy sal beslis nie sy beloning verbeur nie.”

Woordverkondiging

Bill Lacovara was besig om te hengel naby Atlantic City in die VSA, toe hy ‘n plastieksak sien dryf in die water. Binne die sak was daar omtrent 300 gebedsversoeke wat aan ‘n plaaslike predikant gepos was. Die meeste van die briewe was nie oopgemaak nie. Die dominee is twee jaar vantevore oorlede. Blykbaar is die briewe weggegooi toe sy huis na sy dood opgeruim is.

Sommige van die gebedsversoeke was oppervlakkig. Een ou skryf hy bid om die lotery te wen – twee keer.  Eers wil hy so 50,000 dollar wen, ‘n paar aanpassings maak, en dan wil hy ‘n big time kitsmiljoenêr word.

Baie van die gebedsversoeke was hartverskeurend. Dit het van bekommerde huweliksmaats, kinders en weduwees gekom – almal mense wat uitgeroep het na God se hulp. Sommige was gebede vir familielede of kinders wat aan dwelms verslaaf was, gedobbel het, of egbreuk aan die pleeg was. Een man het uit die tronk geskryf, gesê dat hy onskuldig was en begeer het om terug te wees by sy familie. ‘n Tiener het gesmeek om God se vergifnis en ‘n tweede kans. Sy het ‘n aborsie gehad, en vertel hoe daar nie een dag verbygaan sonder dat sy dink aan die fout wat sy gemaak het nie.

Bill Lacovara sê die briewe in die plastieksak het hom aan baie mense se lewens laat dink. Daar is duisende mense wie se lewens ‘n worsteling is. Hulle is soos mense wat in ‘n storm uitgespoel is op die strand, en hoop op die aanraking van God.

Ja, kan ons byvoeg, daar is honderdduisende mense wat smeek dat iemand van God af in hulle lewens aankom. Iemand wat God se liefde, wysheid en leiding vir hulle ‘n werklikheid kan maak. Iemand wat hulle kan laaf met die genesing en verkwikking wat God bring.

Dit is in die lig van hierdie behoefte dat ons Jesus se aandrang en opdrag op gasvryheid moet hoor.  Jesus maak hier twee opmerkings wat van belang is.

1.  Raak betrokke by mense in nood

Die eerste is in vers 40 wat ons aanmoedig om mense, soos dié waarvan Bill Lacovara praat, met die evangelie te bedien :“Wie julle ontvang, ontvang My; en wie My ontvang, ontvang Hom wat My gestuur het.” Jesus moedig hiermee sy dissipels aan om met vrymoedigheid by mense wat nood het, betrokke te raak.  Hoekom?  Want hulle sal daardeur nie net die wonder van God se voorsiening belewe nie, hulle sal nie net iets vir mense beteken nie, maar, nog dieper, hulle sal ’n kanaal word waardeur mense God self sal ontmoet.  Dit is die diepsinnigheid hiervan.

Oral waar jy die Here Jesus Christus vrymoedig bely, oral waar jy uitreik na iemand om iets vir hulle te beteken, dáár word jy ’n kanaal waardeur iemand God kan ontmoet.  Oral waar jy gaan om iets te gee, is jy dus ‘n kanaal waardeur mense deel het aan die koms van die koninkryk, waardeur God hulle behoefte aan Homself bevredig.

Ons moenie vergeet dat dié woorde in Jesus se uitsendingsrede is nie.  Die evangelie is bedoel vir mense wat nood het.  Óns is die goeie nuus vir die mense wat nood het in hierdie wêreld.  Óns is bedoel om ’n verskil te maak oral waar ons gaan.  Die goeie nuus van die evangelie is nie iets wat ons vir onsself kan hou nie.  Jesus is duidelik daaroor, soos ons in hfst. 11:1 net hierna lees: “Toe Jesus sy opdragte aan sy twaalf dissipels voltooi het, het Hy daarvandaan vertrek om in hulle stede te leer en te preek.” Hy het self gedoen wat Hy van sy dissipels verwag het.

2.  Ontvang ander gasvry

Daar is egter ook ’n ander kant hiervan.  Jy word nie net geroep om betrokke te raak by ander in nood nie.  Jy moet ook dié wat na jou uitreik met gasvryheid ontvang, veral wanneer hulle die evangelie na jou toe bring.  Gasvryheid is immers ’n wederkerige ding.  Die Here moedig jou aan die eenkant aan om ’n kanaal te word sodat ander God kan ontmoet.  Die Here moedig jou egter ook aan die ander kant aan om diegene wat na jou toe kom met die evangelie gasvry te ontvang, want daardeur sal jy self God ontmoet.

Dit is immers wat in die gemeente gebeur waar ons mekaar bedien met die evangelie, in die erediens, in die kleingroepe, in bedieninge.  Oral waar ons gasvry teenoor mekaar optree deur na mekaar te luister, deur mekaar lief te hê met bekers koue water, daar ontvang ons en ontmoet ons die Here Jesus Christus, en God sy Vader.

Dit is wat Jesus se opmerking in vers 41–42 beteken.  Jesus noem hier drie tipe mense wat ontvang moet word, waarmee Hy eintlik enige dissipel van Hom aandui.  Daarmee wys Hy dat hierdie opdrag van Hom vir alle dissipels geld:  ⁴¹”Wie ’n profeet ontvang omdat hy ’n profeet is, sal die beloning van ’n profeet ontvang; en wie ’n regverdige ontvang omdat hy ’n regverdige is, sal die beloning van ’n regverdige kry.” ⁴²”En wie aan een van hierdie geringes ’n beker koue water gee om te drink, bloot omdat hy ’n dissipel is – Amen, Ek sê vir julle: Hy sal beslis nie sy beloning verbeur nie.”

Die profete, die regverdiges en die geringes is eintlik almal dissipels van die Here Jesus Christus, soos dit in die laaste vers uitgespel word.

Jesus sê dus vir ons hier dat God in ons lewens aankom deur die mense wat God na ons stuur.  Ons keuse om mense te ontvang, of nie, bepaal dus of God in ons leefwêreld aankom, of nie.  Deur ander mense gasvry te ontvang, neem ons deel aan die koms van God se koninkryk, of nie.

En die omgekeerde is natuurlik ook waar.  In ons uitreik na ander kom God in hulle lewens aan, of nie.

Iets om deeglik oor na te dink.

• As ek nie uitreik nie – kan dit beteken dat ander God se aanraking mis. 
• As ek nie ander gasvry ontvang nie – kan dit beteken dat ek self God se teenwoordigheid mis.

’n Mens hoor die sterk klem op die regverdige in die Psalms hier weerklink, mense wat gedefinieer is deur hulle lojale liefde en verbintenis aan die Here en sy Woord, soos Psalm 1 en vele ander dit uitspel.  Dit is nie net vir onsself ’n doel, om regverdig te lewe nie, maar ook ’n opdrag, om ander, regverdiges, met gasvryheid te ontvang en ondersteun.

’n Mens hoor ook hier die verhale van die profete Elia en Elisa weerklink.  Hulle was afhanklik van die gasvryheid van die mense vir wie hulle die woord van die Here gebring het.  Oral waar hulle gasvry ontvang is, het die Here die mense geseën.

• Dink aan die weduwee van Sarfat in Elia se tyd (1 Kon. 17).  Sy het haar laaste bietjie meel gebruik vir die profeet en die Here het haar daarvoor beloon deurdat die meel en olie nooit deur die loop van die drie jaar van hongersnood opgeraak het nie.  Sarfat was ’n kusdorpie tussen Tirus en Sidon in Filistynse gebied, en later ’n belangrike pelgrims rusplek in die 4de eeu n.C. vir Christen reisigers.
• Dink aan die vrou van Sunem in die tyd van Elisa wat ’n bovertrek vir hom gebou het waar hy kon oorbly in sy bediening, en beloon is met ’n seun (2 Kon. 4).  Sunem was noord–oos van Samaria, net suid van die See van Galilea.  Die vrou en haar man het regtig moeite gedoen om Elisa in sy bediening te ondersteun, en is dubbel en dwars daarvoor vergoed (2 Kon. 4; 8).

Vanaand meer oor albei hierdie stories, en ook nog ander Bybelse verhale, om aan te toon hoe gasvryheid werk.

Wat is gasvryheid?

Adele Calhoun beskryf gasvryheid as volg: “to be a safe person who offers others the grace, shelter and presence of Jesus”!

Dit het veral te make met vreemde en anderse mense, mense met wie jy nie normaalweg as vriende assosieer nie.  Trouens, die Griekse woord  vir gasvryheid is philoxenia – “liefde vir vreemdelinge”.  Gasvryheid beteken om uit jou gemaksone te beweeg, ’n grens na ander oor te steek, en vreemdelinge welkom en veilig te laat voel.

Dit beteken dat gasvryheid ’n ongelooflike belangrike manier waarop ons as kinders van die Here met mekaar moet omgaan, en hoe ons in hierdie wêreld teenoor ander moet optree, nie net teenoor bekendes nie, maar ook teenoor vreemdelinge.

• Aan die eenkant word ons geroep om die evangelie as profete, regverdiges en dissipels uit te dra en ons te verlaat op die gasvryheid van dié wat na ons luister, soos vers 40 dit uitspel.
• Aan die ander kant word ons geroep om diegene wat die moeite doen om die evangelie oor die grense van ons gemeenskap te dra, dat ons hulle met alles in ons sal ondersteun en dit vir hulle moontlik sal maak om dit te kan doen, soos vers 41–42 dit uitspel.

Paulus verwys ook hierna in Romeine 12:13 en sê: “Help die medegelowiges in hulle nood en lê julle toe op gasvryheid.”  Hy maak dit een van die sentrale vereistes vir ouderlinge: “’n Ouderling moet onberispelik wees, getrou aan sy vrou, nugter, verstandig, beskaaf, gasvry en bekwaam om te onderrig.” (1 Tim. 3:2; vgl. ook Titus 1:8).

Maar, dit is nie net iets vir ouderlinge nie.  Dit is iets vir alle gelowiges, soos Petrus dit uitspel in sy eerste brief: “Wees gasvry teenoor mekaar sonder om te kla.” (1 Pet. 4:9).

En die beloning is, volgens die skrywer van die Hebreërbrief: “Moenie nalaat om gasvry te wees nie, want deur gasvry te wees, het sommige mense sonder dat hulle dit geweet het, engele as gaste gehuisves.” (13:2).

Die eenvoudigste daad is belangrik

In die uitdra van die evangelie sal Jesus se dissipels dikwels swaarkry moet verduur. Dit blyk duidelik uit Jesus se uitsendingrede. Dit blyk duidelik uit die ervaringe van duisende Christene wêreldwyd en reg deur die eeue.  Vergelyk maar net die verhale in Irak op die oomblik waar Christene verguis en van hulle grond en blyplek weggedryf word.

Irak het een van die oudste Christen gemeenskappe in die wêreld.  Hulle is afkomstig uit die Galdese (dink aan Nebukadnesar) Suid-Aramese (Jesus het Noord-Aramees gepraat), Assiriese (dink aan Jona en Nineve [vandag Mosul, die plek waaroor dié artikel onder andere handel], en een van die stede waarvandaan Christene nou moet vlug) en Armeense etniese groepe.  Hulle loop die gevaar om heeltemal uitgewis te word.

Eers is hulle getalle weens die Amerikaanse oorlog teen Irak van ongeveer 1.5 miljoen mense, 5% van die bevolking, verminder na minder as 400 000.  Dit is een van die vele onaanvaarbare gevolge van daardie oorlog deur die Bush administrasie.  Saddam Hussein was tegemoetkomend teenoor Christene en het selfs ‘n Christen as sy onderhoof aangestel.  Die val van sy administrasie was egter ook die begin van die einde van Christen toleransie.

Nou is die Christen gemeenskap in Irak egter onder groot druk van ISIS, die militante Sunni Moslem groep Islamic State of Iraq and Syria (nie die Egiptiese godin nie), wat boonop burgeroorlog in Irak amper onafwendbaar maak.  Hulle het ons gebede nodig.

Die werk in Irak wat begin is deur die twee apostels, Tomas (ook bekend as Didimus [=Tweeling]) en Taddeus (ook Lebbeus en Judas [volgens Lukas] genoem), en vele ander na hulle, onder andere Nestorius, loop die gevaar om uitgewis te word in Irak. (View article).

Dit is waarom ons moet uitreik na mense in nood, ook sulke mense wat deur die politiek van die dag verguis en verstrooi word.  Ons het nodig om eendragtig te bid vir ’n permanente oplossing.  En waar ons ’n verskil kan maak, moet ons dit doen.

Maar daar sal ook steun wees. Mense het ook reg deur die eeue die verkondigers van die evangelie met gasvryheid ontvang en versorg. En hierdie eenvoudige dade van ondersteuning en versorging is van die grootste betekenis denkbaar. Jesus sê hier dat selfs die eenvoudigste daad nie gering geag mag word nie en beoordeel moet word asof dit aan Jesus self gedoen word.

Gasvryheid is gemeenskap met God.  Wie Jesus se gestuurdes ontvang, neem deel aan die bediening van Jesus.

• As ek uitreik na ander – beteken dit dat ander God se aanraking ervaar. 
• As ek ander gasvry ontvang – beteken dit dat ek self God se teenwoordigheid ervaar.

Dit is die evangelie.  Dit is wat dit beteken om kind van die Here te wees.

Gebed

Dankoffers

Slotlied

Liedboek 308 – Neem my lewe, laat dit, Heer, U gewy wees meer en meer – staan

Seën

Amen

Liedboek 313