Abel praat vandag nog – Genesis 4:1-15

Het jy al ooit nikswerd gevoel?

Jy staan op die speelgrond en julle kies spanne om sokker te speel. Een na die ander word gekies, net jy bly oor. Niemand wil jou graag in die span hê nie. Hoe voel jy dan? Nikswerd, nie waar nie?

Die juffrou verduidelik ‘n som op die bord. Almal verstaan dit, maar jy kry dit net nie reg nie. Dan vra sy wie sal die som kom doen? Jy probeer wegkruip, maar sy sien jou raak, en roep jou vorentoe. Jy vat die kryt en jy staan en staan daar voor die bord. Want jy weet jy gaan dit nie regkry nie. Hoe voel jy dan? Nikswerd, nie waar nie?

Maar, hoe sal jy voel as jou naam Nikswerd was? Nie ‘n mooi naam nie, nê! ‘n Naam wat jy graag sal wil verander, nie waar nie! Dit is egter wat met Abel in die Bybel gebeur het. Kom ons lees die verhaal in die Bybel van Kain en Abel, Genesis 4 (NLV):

Download English translation: Abel still speaks today – childrens service Genesis 4

HIER VOLG DIE HELE EREDIENS:

Jaar van die Bybel
Tema: Abel praat vandag nog – Genesis 4:1-15
Somerstrand Kinderdiens 16 Februarie 2020 09:00

Verwelkoming en aankondigings

Ek gaan volgende week die gelykenis van die Saaier lees. En gesels oor hoe ons Bybel lees. Jy kan voorberei met die kleingroepmateriaal op ngkerksomerstrand.co.a.

Ons is nou 40 lede by die eenjaar Bybelleesprogram. Ek wil die res van die gemeente uitdaag om by een van my vier nuwe korter Bybelleesprogramme in te skakel.

• Lees die OT deur – 2 hoofstukke ‘n dag
• Lees die NT deur – 1 hoofstuk ‘n dag
• Lees die Psalms deur – ongeveer 10 verse ‘n dag
• Lees Spreuke deur – ongeveer 5 verse ‘n dag

Ek gee elke oggend ‘n Whatsapp boodskap oor die gedeelte wat jy daardie dag gaan lees. Stuur jou naam en van met selnommer na Chris van Wyk (082 vyf sewe vier 9191). Sê vir my watter Bybelleesprogram jy kans sien voor (OT / NT / Psalms / Spreuke), en stoor my selnommer onder my naam op jou selfoon. Ek begin hiermee Maandag 24 Februarie 2020.

Toetrede

Flam 5 (afr, eng, afr) Daar is geen grens (sit)

Votum en Seëngroet

Lof

Lied 547 Alle volke (staan)

Flam 104 Weet jy nie jy’s ‘n tempel (staan)

Verootmoediging

Vonkk 226 (koor 1x; gemeente 1x) Neem, Heer, my hart (sit)

Dankoffers

Voorbidding

Skriflesing en prediking

Het jy al ooit nikswerd gevoel?

Jy staan op die speelgrond en julle kies spanne om sokker te speel. Een na die ander word gekies, net jy bly oor. Niemand wil jou graag in die span hê nie. Hoe voel jy dan? Nikswerd, nie waar nie?

Die juffrou verduidelik ‘n som op die bord. Almal verstaan dit, maar jy kry dit net nie reg nie. Dan vra sy wie sal die som kom doen? Jy probeer wegkruip, maar sy sien jou raak, en roep jou vorentoe. Jy vat die kryt en jy staan en staan daar voor die bord. Want jy weet jy gaan dit nie regkry nie. Hoe voel jy dan? Nikswerd, nie waar nie?

Maar, hoe sal jy voel as jou naam Nikswerd was? Nie ‘n mooi naam nie, nê! ‘n Naam wat jy graag sal wil verander, nie waar nie! Dit is egter wat met Abel in die Bybel gebeur het. Kom ons lees die verhaal in die Bybel van Kain en Abel, Genesis 4 (NLV):

¹Die mens het by sy vrou, Eva, geslaap en sy het swanger geword. Sy het geboorte gegee aan Kain. Sy sê toe: “Met die hulp van die Here het ek ’n man voortgebring!” ²Daarna het sy geboorte gegee aan sy broer Abel.

Eva was baie opgewonde oor haar eerste kind Kain. Sy was baie trots dat sy geboorte kon gee. Sy het gedink sy is nou net soos God toe Hy hulle gemaak het. Sy het nou ‘n “man” voortgebring. Die Here het maar net gehelp.

Kain se naam kan verskillende dinge beteken. Dit kan “spies” wees óf “blitsvinnig”. ‘n Kragtige naam. Maar Abel se naam is maar effentjies. Sy ma het hom “asempie” genoem. Want dit is wat Abel beteken. “Asempie”, of “rookwolkie”, of “niks”.  Soos ek graag daaraan dink, “nikswerd”.

Dink net hoe jy sal voel as jy grootword met só ‘n naam. Nikswerd. Verskriklik.

Wat beteken jou naam?

Gesels gou met jou ma en pa oor die betekenis van jou naam. En die ouer mense, praat met mekaar oor hoe jou naam jou laat voel.

Kom ons lees verder.

Toe hulle groot was, het Abel ’n veeboer geword en Kain ’n landbouer. ³Toe oestyd aanbreek, het Kain uit die opbrengs van sy landerye ’n offer vir die Here gebring. ⁴Abel het die beste uit sy lammers, die eerstelinge van die seisoen, en van hulle vet as offer gebring.

Abel het met skape en bokke geboer. Kain het met vrugte en groente geboer. Toe gebeur daar ‘n interessante ding. Hulle albei moes vir die Here iets bring van hulle oes. Kain het van sy vrugte en groente geneem en dit vir die Here gebring. Hy het nie iets spesiaals daarvan gemaak nie. Sommer ‘n paar afgepluk en geoffer.

Abel het egter nie sommer maar ‘n afskeep lammertjie gebring nie. Abel het die beste van sy lammers gebring, die lammers wat eerste gebore is, en daarom ook die grootste en die vetste was (vgl Eks 23:19; Deut 26:1-4).

Hoe dink julle het die Here daaroor gevoel?

Die Bybel sê:

Die Here het Abel en sy offer aanvaar, ⁵maar nie dié van Kain nie. Daaroor was Kain baie kwaad en neerslagtig.

Die Here was baie tevrede met Abel en sy offer. Hy het dit aanvaar. Die Here was egter nie tevrede met Kain se offer nie. Hy het dit nie aanvaar nie.

Daar is twee dinge wat julle moet raaksien. Die eerste is dat die “nikswerd” kind, Abel, nie gedink het, ag ek is maar “nikswerd” nie. Nee, Abel het gedink, hoe kan ek God se hart bly maak. Hy het gesê: “Ek weet, ek kan vir God die beste bring wat ek het.”

Die tweede is dat Kain egter baie kwaad was vir God. Sy lip het op die grond gesleep, so vies was hy. Hy was ontsteld dat God ontevrede was met sy afskeep offer. Wat is dit dan met God? Wie is Hy dan dat Hy eerder my “nikswerd” broer se offer aanvaar? Dat Hy nie tevrede is met my vrugte nie! Dit maak tog nie saak vir Hom nie?

Gesels gou met mekaar oor wat julle kan doen om vir God julle beste te gee.

Kom ons lees verder:

⁶“Hoekom is jy so kwaad?” vra die Here vir hom. “Hoekom hang jou gesig so? ⁷Is daar nie aanvaarding vir jou as jy reg optree nie? Maar as jy weier om reg te doen, moet jy oppas! Sonde hurk by die deur om jou te oorweldig, maar jy moet dit oorwin.”

Die Here probeer vir Kain reghelp. As jy reg optree, sal Ek jou offer ook aanvaar. Jy moet van jou beste vir my bring. Nie van jou afskeep vrugte nie.

Maar as jy nie luister nie, sal nog erger dinge gebeur. Want, jou sondige hart kan jou erger dinge laat doen, as jy nie versigtig is nie. Die sonde hurk daar by die deur van jou hart om jou te oorweldig.

Jy moet eerder probeer om die sonde te oorwin.

Het julle al gesukkel met jaloesie?

As jy sien iemand word geprys en jy nie … dan staan daardie “groen monster” op in jou hart, en dan wil jy sommer skop en slaan.

Dink bietjie, het jy al so gevoel?

Wel, Kain was so kwaad dat hy nie na hierdie vriendelike waarskuwing van die Here kon luister nie. Al wat hy kon sien, is dat sy broer beter was as hy. Abel se offer is aanvaar. Die “nikswerd” broer van hom.

En ons lees:

⁸Kain het met sy broer Abel gepraat en terwyl hulle in die veld was, het Kain sy broer Abel aangeval en hom doodgeslaan.

Hoe verskriklik! Kain die blitsvinnige een, die spies, het sy broer Abel aangeval en hom doodgeslaan.

Dit is wat met ‘n mens kan gebeur as jy jaloers raak op iemand anders. Jy kan later nie meer helder dink nie. En dan gebeur verskriklike dinge.

---

Die storie is egter nie klaar nie. Abel is dood, maar die Here is steeds daar. Hy het baie van Abel gehou, en Abel was in elk geval nou in die hemel by God.

En God wou vir Kain beskerm teen sy eie sondige hart:

⁹Daarna vra die Here vir Kain: “Waar is Abel jou broer?”

“Ek weet nie!” is sy skerp antwoord. “Ek is mos nie sy oppasser nie!”

Kain ontken dat hy enigiets verkeerd gedoen het. Maar die Here weet alles. Ons lees:

¹⁰Maar die Here sê vir hom: “Wat het jy nou aangevang? Die bloed van jou broer roep na My daar waar dit op die grond geval het! ¹¹Daarom word jy verban van die grond wat jou broer se bloed uit jou hand ontvang het. ¹²Dit sal nie meer vir jou ’n goeie oes lewer nie, al werk jy hoe hard daarvoor. Van nou af sal jy ’n vlugteling en ’n swerwer op aarde wees.”

Dit het vir Kain laat skrik. Maar, hy is steeds meer bekommerd oor wat die mense gaan sê, nie soseer oor wat God sê nie. Hy vra nie om vergifnis nie. Hy kla net oor wat nou met hom gaan gebeur. Ons lees:

¹³Kain antwoord die Here: “My straf is te groot om te dra! ¹⁴U het my verban van my grond af en uit u teenwoordigheid. U het my ’n swerwende vlugteling op aarde gemaak. Elkeen wat my teëkom, sal my wil doodmaak!”

In God se genade het Hy egter ‘n plan:

¹⁵Die Here antwoord hom: “Nee, hulle sal jou nie doodmaak nie, want enigiemand wat jou doodmaak, sal sewe maal gestraf word.” Toe sit die Here God ’n teken aan hom sodat niemand wat hom teëkom hom sal doodmaak nie.

Ons weet nie watter teken dit was nie, maar dit was sigbaar vir ander mense. Hulle sou dit nie kon mis nie. Soos die Here vir Adam en Eva klere gegee het, só gee die Here vir Kain iets wat ander sou kon raaksien.

---

Maar, ek wil nie afsluit met Kain nie. Julle het verlede week in die kategese oor hom gesels. Ek wil afsluit met Abel. En dit is nou meer vir die grootmense, maar die ouer kinders sal dit ook goed kan verstaan.

Daar is inkleurprente en kryte vir die jonger kinders.

Wat leer Abel vir ons vandag?

Abel word vier keer in die NT genoem. Jesus lig vir Abel uit as ‘n voorbeeld vir ons om jou beste vir die Here te gee. Hebreërs praat twee keer van hom, as ‘n geloofsheld wat ons aanmoedig om te glo, en as ‘n veroordeling van Kain se manier van leef. Johannes moedig ons ook aan om te leef soos Abel, en om te kies teen die Kain manier van leef.

1. Gee jou beste vir die Here

Dit is die eerste ding wat Abel ons leer: om jou beste vir die Here te gee. Jesus praat oor Abel in die konteks van die konflik met die Fariseërs, met die godsdienstiges wat soos Kain opgetree het, en in opstand teen God se wil gekom het. Hulle wou hulle eie kop volg, en het die Skrif geminag. Jesus spaar hulle nie (Matteus 23 – NLV):

³³Julle slange! Julle addernes! Hoe sal julle ooit die oordeel van die hel kan ontvlug?

En dan praat Jesus oor die talle maniere waarop God al met mense deur die eeue gepraat het om hulle tot inkeer te kom:

³⁴Let op, Ek sal vir julle profete en wyses en skrifkenners stuur.

Maar Hy weet:

Julle sal sommige van hulle vermoor en kruisig en julle sal ander in julle sinagoges met swepe slaan en van die een dorp na die ander vervolg.

En dan sluit Hy by die verhaal van Abel aan wat eintlik as ‘n “regverdige” ‘n getuie was teenoor sy broer, maar tevergeefs:

³⁵“So sal julle skuldig word aan die moord op al die vromes, van die regverdige Abel af tot by Sagaria, die seun van Berekja, wat julle by die tempel, tussen die heiligdom en die altaar vermoor het. ³⁶“Ek verseker julle, al die opgehoopte oordeel sal losbars oor hierdie generasie.”

Abel word dus as ‘n “regverdige” geëer deur niemand minder as Jesus nie. Hy is die eerste een wat God gebruik as getuie teenoor sy broer. Hy het vir Kain gewys dat jy jou beste vir God moet gee, selfs al kos dit jou dood.

Abel gee vir ons steeds vandag dieselfde boodskap. Gee jou beste vir die Here al kos dit jou wat ook al.

2. Glo in God met jou hele hart

Dit is die tweede ding wat Hebreërs 11 vir ons oor Abel leer. Abel word as ‘n geloofsheld vir ons voorgehou, want hy het met sy hele hart in God geglo:

⁴Omdat Abel geglo het, het hy ’n beter offer as Kain aan God gebring. God het Abel se offer aanvaar en daarmee bevestig dat hy ’n regverdige mens is. En al is hy lankal dood, praat hy deur sy geloof nog steeds met ons.

Dit is die diepste rede vir God se aanvaarding van Abel. Dat Abel in Hom geglo het. Dat Abel vir God geleef het. Dat God se wil vir Abel saak gemaak het. Dat Abel op God vertrou het.

Abel het die beste gegee, en God het dit raakgesien. Maar, wat vir God nóg belangriker was as die offer, was Abel se hart. Want, Abel se hart het aan die Here behoort. God was doodgewoon nommer een in sy lewe.

En al is Abel lankal dood, sê die Hebreërskrywer, praat hy deur sy geloof nog steeds met ons. Moedig hy ons aan om te bly glo. Moedig hy ons aan om God se pad te kies, nie die pad van die wêreld nie.

3. Moenie aanhou om sonde te doen nie

Dit bring ons by die derde ding wat Abel ons leer.

Kain en Abel staan vir twee maniere van leef. Kain staan vir die goddelose en Abel vir die regverdige. Kain is familie van die duiwel. Abel is ‘n kind van God. Dit is lewensbelangrik dat ons kies om regverdig te lewe, om die heiligmaking na te jaag, soos die Hebreërskrywer ons ook aanmoedig met verwysing na Abel, om die Kain manier van leef te vermy (Hebr 12).

So skryf Johannes daaroor (1 Joh 3):

⁷Kinders, moenie dat iemand julle hieroor mislei nie: Elkeen wat reg leef, is regverdig, net soos Hy regverdig is. ⁸Elkeen wat aanhou sonde doen, is familie van die duiwel omdat die duiwel van die heel begin af sonde gedoen het.

Dit is die helder boodskap van die Bybel. Aan die een kant is dit ‘n boodskap wat die genade van God verkondig. Soos Johannes sê:

Juis daarvoor het die Seun van God verskyn: om die dade van die duiwel te vernietig. ⁹Elkeen wat deur God verwek is, hou nie aan sonde doen nie omdat God se saad in hulle bly. Hulle kan ook nie aanhou sonde doen nie omdat hulle deur God verwek is.

Aan die ander kant is dit ‘n boodskap wat onderskeid bring:

¹⁰Op hierdie manier is dit duidelik wie die kinders van God en wie die kinders van die duiwel is. Almal wat nie reg optree nie en ook nie hulle medegelowiges liefhet nie, is nie uit God nie. ¹¹Dít is die boodskap wat ons van die heel begin af gehoor het: Ons moet mekaar liefhê. ¹²Ons moet nie soos Kain optree wat uit die bose was en sy broer doodgemaak het nie. Om watter rede het hy hom doodgemaak? Omdat sy eie optrede boos was en sy broer s’n reg.

Die wonderlike boodskap is dat ‘n “nikswerd”, Abel, die genade van die Here ontvang het, selfs al moes hy daarvoor boet met sy lewe. Hy wys dat dit die moeite werd is om jou beste vir die Here te gee; dat dit die moeite werd is om in God te glo; dat dit die moeite werd is om nie aan te hou om sonde te doen nie.

Want, dit is die Abels deur die eeue wat ‘n toekoms in die ewige lewe saam met God het. Dit is die Kains deur die eeue wat weliswaar hier baie keer oorwin, maar daardie lewe met God verbeur, en vir ewig sonder Hom sal moet klaarkom.

Die keuse is joune. Abel het gepraat.

Gebed

Slotlied

Lied 541 Ons bring aan U Heer Jesus (staan)

Seën

Respons

Lied 541 refrein