Ons gebede maak saak – Openbaring 5

Familiediens 1 Mei 2022 NGK Somerstrand | Youtube en kerk 09:00

Verwelkoming

Baie welkom aan Vian en Natania du Plessis en hulle tweeling Josh en Joah. Hulle bly in Bulbringweg 44.

Ons sien uit na hierdie Saterdag 7 Mei se bevestiging 15:30 hier in die kerk en die verwelkoming 16:30 daarna in die Ark (RSVP Marlein van Deemter vir die sop en sjerrie – 083 270 4853). Julle is welkom om nog drinkgoed en glase te bring om verder te kuier.

Volgende Sondag 8 Mei 09:00 is Vian se intreepreek. Die aand ontmoet hy 17:00 ook die tieners en hulle ouers. Hy speel 16:30 volleybal saam met die tieners.

Aankondigings

Ek het twee navrae gekry.

• Die een is oor die Bybelskool. Of ek dit in die gemeente gaan hervat.
• Die ander is oor ‘n aanlyn Bybelstudie groep. Wat dieper kan ingaan in die Bybel en spesifieke Bybel- en lewensvrae kan bespreek.

Sal graag wil hoor hoe julle dink. Of daar belangstelling is daarvoor. In die gemeente, bv weer op Woensdae. En/of aanlyn, bv op zoom. Die dag en tyd kan ons dan bepaal na gelang van die belangstelling.

Onthou ook my boek oor Openbaring wat jy gerus gratis kan aflaai om die hele Openbaring deur te werk. Ek hanteer die volgende paar weke al die beloftes in die boek.d

Die beloftes gaan voort. Ons is by dag 160 van 365. So, as jy nou inskakel, is daar nog 205 beloftes om vir jouself toe te eien.

Toetrede

Vlam 21:1-4 In die hemel is die Heer, en sy glans is soos kristal – sit

Votum en seëngroet

Lofliedere

Lied 203:1,3 Loof die Here, al wat lewe wil Hom dank en hulde bring – staan

Lied 202:1-3 Prys Hom, die Hemelvors, op sy verhewe troon (Openbaring 4-5)– staan

Kindertyd

Jesus het een keer vir Johannes hemel toe gevat. Daar in die hemel het Jesus vir Hom wonderlike goed gewys.

Hier is ‘n prentjie. God sit op ‘n troon in die hemel. ‘n Mens kan Hom nie sien nie, want Hy is soos helder wit lig. En daar is ‘n reënboog om die troon wat ‘n groen skynsel het.

Daar is allerhande hemelse wesens wat rondom die troon sit en staan. Hulle dra spierwit klere. Sommige sit ook op trone. Met goue krone op hulle kop. Ander staan in sirkels om die troon (Kunswerk is deur Pat Marvenko Smith, kopiereg 1992. Om te bestel: http://www.revelationillustrated.com). En almal kyk na God. Hoekom? Want hulle aanbid Hom. Hy is die belangrikste Een in die heelal. Hy het ons almal gemaak. Hy sorg nog steeds vir almal van ons.

Hier is nog ‘n prentjie. Daar is nog duisende der duisende, nee, miljoene der miljoene wesens. Hemelse wesens (Kunswerk by https://goodnewsunlimited.com/armies-of-angels-protect-you-by-desmond-ford/). Almal prys Hom:

“Sonder om te rus, herhaal hulle dag en nag: ‘Heilig, heilig, heilig is die Here God.’”

En ons? Kan ons ook die Here prys?

Vir seker. Maar, hoe?

Wel, hoe prys ons mense? By ‘n prysuitdeling? By rugby? By jou verjaarsdag?

So, hoe kan ons vir God prys? Ons kan sing. En bid. En doen wat Hy sê.

Kom ons sing saam.

Vonkk 109:1-4 Wees ‘n lig vir Jesus, dit is wat Hy vra – sit

Verootmoediging

Johannes skryf in Openbaring 15 oor die hemelse tempel. Hy noem dit: “die tempel, die Tent met die Getuienis”. Die “Getuienis” verwys soos in die OT na die Tien Gebooie (Eks 16:34; 25:21; 31:18; 32:15; 40:24). Trouens, die “Tien Gebooie” word in die OT baie keer bloot die “Getuienis” van God genoem, dit is die wette wat Hy op die twee plat klippe geskryf het, en deur Moses in die ark, in die Allerheiligste, laat plaas het.

Wat meer is, Johannes verbind in Openbaring 15 die oordele wat deur die plae van die sewe bakke op die aarde voltrek word, aan die mense se verwerping van die getuienis van God. Die Tien Gebooie is dus nie maar net ‘n uitvindsel van die Jode nie. Dit is iets wat deur God uit die hemel aan ons gegee is en wat daarom nie net altyd geldig bly nie, maar die maatstaf is waaraan Hy alle gedrag meet. In die hemel en op aarde. Vir jou, vir my, vir almal.

Johannes skryf:

⁵En hierna het ek gesien: Die tempel, die Tent met die Getuienis in die hemel, is geopen, ⁶en die sewe engele met die sewe plae het uit die tempel gekom. Hulle het blink klere van suiwer linne gedra, met ‘n goue band om die bors gebind. ⁷Een van die vier lewende wesens het toe aan die sewe engele sewe goue bakke gegee, gevul met die toorn van God, van Hom wat vir ewig en ewig leef. ⁸En die tempel is met rook gevul, vol van die heerlikheid van God en sy mag, en niemand kon by die tempel ingaan, totdat die sewe plae van die sewe engele verby was nie.

Kom ons luister dan na ‘n kort samevatting van die Tien Gebooie:

1. Jy mag nie nog ander gode buiten God aanbid nie.
2. Jy mag nie vir jouself afgode maak en hulle aanbid nie.
3. Jy mag nie die Naam van God sonder respek gebruik nie.
4. Jy moet die rusdag vir God vier.
5. Behandel jou ouers met respek.
6. Moenie mense doodmaak nie.
7. Moenie egbreuk pleeg nie.
8. Moenie iets steel nie.
9. Moenie valse verklarings aflê nie.
10. Moenie afgunstig raak nie.

Ons moet nooit dink dat die genade van Jesus ons ‘n vrypas gee om sy wet te oortree nie. Wat God verbied, mag ons nooit doen nie. Wat God gebied, moet ons altyd doen.

Soos Johannes in sy eerste brief skrywe:

⁴Elkeen wat sonde doen, beoefen ook wetteloosheid, want sonde is wetteloosheid. ⁵Julle weet dat Hy verskyn het om die sondes weg te neem, en in Hom is daar geen sonde nie. ⁶Elkeen wat in Hom bly, sondig nie meer nie; elkeen wat aanhou sondig, het Hom nie gesien, en Hom nie leer ken nie. ⁷Kinders, laat niemand julle mislei nie: wie doen wat reg is, is regverdig, soos Hy regverdig is. ⁸Wie sonde doen, is uit die Duiwel.” (1 Joh 3:4-7)

Kom ons verootmoedig ons in gebed voor God en wy ons opnuut aan Hom toe.

Gebed

Skriflesing en prediking

‘n Mens moet Openbaring 4 saam met Openbaring 5 lees. Want dit gee vir ons die konteks vanwaar af God se planne in die heelal in werking gestel word. Alles wat gebeur in hemel en op aarde word vanuit die hemel, vanuit God se teenwoordigheid, beplan en bestuur, uitgedink en uitgevoer.

Johannes kry die voorreg om die Drie-enige God aan die werk te sien, want alles draai om Hom (prentjie).

• Ons hoor in Openbaring 4 die stem van Jesus vanuit die hemel en sien Hom in Openbaring 5 as die Leeu-Lam wat vandaar af op aarde werk.
• Ons neem die Gees se werk waar wat van Johannes besit neem en verteenwoordig word in die sewe vuurfakkels rondom die troon.
• Ons sien saam met Johannes die Here God, die Almagtige, wat op die troon sit in onuitspreeklike heerlikheid en om wie alles draai in hemel en op aarde.

Die Troon van God is die middelpunt van alles in die hemel sowel as alles in die heelal. God is immers die geestelike middelpunt van alles wat bestaan, soos die son die middelpunt van ons sonnestelsel is. Alles wentel om Hom. Almal aanbid Hom. Alles word deur Hom bepaal.

Dit is wonderlike ontsagwekkende prentjie. Met God se troon wat omring word deur ‘n reënboog wat soos smarag (groen) lyk. Vanuit die troon is daar weerligstrale, ’n gedreun en donderslae. Die prentjie bevestig God se heerlikheid en heerskappy oor alles vanuit die hemel, ten spyte van die pogings van die keisers en konings van die aarde om hulleself te laat geld in die prag en praal van hulle koninkryke.

Die kleure van God se voorkoms het ook betekenis. Sommige verklaarders sien in die jaspis (skitterwit) iets van God se heiligheid, in die karneool (rooi) iets van sy oordeel en in smarag (groen) iets van sy genade. Dit is dan ook die boodskap van Openbaring dat God, die Heilige, sy verlossende oordeel oor die aarde uitgiet.

Twee groepe aanbid die Drie-enige God in die hemel. Die vier lewende wesens in ‘n eerste sirkel en die 24 ouderlinge wat in ‘n volgende sirkel rondom die troon sit.

Die vier lewende wesens verteenwoordig die hele skepping. Hulle verteenwoordig God se alwetendheid (oë) en alomteenwoordigheid (vlerke) in die hele skepping (Du Rand, A-Z). In hulle aanbidding verteenwoordig hulle dan ook die hele skepping met die gesigte van die leeu, bul(kalf), mens en arend.

Die 24 ouderlinge verteenwoordig die hele volk van God, in die ou bedeling/verbond, sowel as in die nuwe bedeling/verbond.

Hulle almal saam aanbid God vir sy grootheid en sy heerlikheid, sy alwetendheid en alomteenwoordigheid in die hele skepping.

Dan lees ons in Openbaring 5:1-14:

¹Ek het in die regterhand van Hom wat op die troon sit ‘n boekrol gesien, aan die binnekant en die buitekant vol geskryf, en met sewe seëls goed verseël.

1. Dit is die eerste ding wat ons moet hoor. Die hemelse erediens wentel nie net om die aanbidding van God op sy troon nie (Openb 4). Vanuit die erediens in die hemel neem God beheer van alles wat is en was en wat kom (Openb 5). Hy bepaal die agenda en die verloop van die ontplooiing van die gebeure in die heelal. Die hemelse erediens het dus ’n beslissende invloed op die aarde. God is in beheer. Hy bepaal die agenda. Dit is wat die betekenis is van die boekrol in God se hand wat binne en buite vol geskryf is.

Maar, dan gaan Johannes aan:

²Ek het ook ‘n sterk engel gesien, wat met ‘n harde stem uitroep: “Wie is waardig om die boekrol oop te maak en die seëls daarvan te breek?” ³Niemand – nie in die hemel, nie op die aarde, nie onder die aarde – was egter in staat om die boekrol oop te maak of daarin te kyk nie. ⁴Ek het baie gehuil, omdat daar niemand gevind kon word wat waardig is om die boekrol oop te maak of daarin te kyk nie.

Die boekrol is met sewe seëls goed verseël, sodat niemand dit sonder meer kan oopmaak en dié agenda in werking kan stel nie. Trouens, dit is net iemand wat die volle verlossingspad reeds geloop het, wat reeds die mensdom met God versoen het, wat die verdere verloop van die verlossingsplan vir die heelal kan bekendmaak en in werking stel.

2. Dit is die tweede ding wat ons moet hoor. Iemand moes ‘n prys betaal om God se verdere planne in werking te stel… en Johannes raak aan die huil, want geen gewone mens kon daardie rol vervul nie.

Dit is egter nie al nie:

⁵Toe sê een van die ouderlinge vir my: “Hou op huil! Kyk, die Leeu uit die stam van Juda, die wortel van Dawid, het oorwin, sodat Hy die boekrol en die sewe seëls daarvan kan oopmaak.”

3. Die ouderling kan in die derde plek die evangelie aan Johannes verkondig dat daar wel só Iemand is. Die Enigste een wat die boekrol uit God se hand kan neem en die seëls daarvan kan breek, is die Leeu van Juda, die nakomeling van Dawid, die Lam wat geslag is, Jesus.

Hy is waardig om die boekrol te neem, want Hy is die Verlosser en daarom die Bemiddelaar van die verlossing. En soos Hy die seëls hierna gaan breek, gaan die inhoud van die boekrol nie net bekend word nie, maar ook deur Hom in werking gestel word.

En dan kyk Johannes goed na Jesus:

 ⁶En ek het tussen die troon en die vier lewende wesens, en tussen die ouderlinge, ‘n Lam, soos een wat geslag is, sien staan. Hy het sewe horings en sewe oë gehad – die sewe Geeste van God – wat oor die hele aarde heen uitgestuur is. ⁷En Hy het nadergegaan, en die boekrol geneem uit die regterhand van Hom wat op die troon sit.

Jesus word hier met twee metafore beskryf: as ’n Leeu en as ’n Lam.

• Hy is die Leeu in terme van sy afstamming uit die Messiaanse linie, uit die stam van Juda, die nakomeling van Dawid.
• Hy is die Lam in terme van sy kruisdood waarmee Hy met sy bloed mense vir God gekoop het uit elke geslag en taal en volk en nasie.

Maar, belangrik, Hy neem die boekrol in ontvangs, die agenda van God se plan vir die heelal, as die Lam wat geslag is.

• Die weerloosheid van ’n lam, die offervaardigheid van sy bereidheid om geslag te word, bly dus steeds die uitstaande kenmerk van die styl waarin Hy die heerskappy wat God Hom toevertrou, uitvoer.
• Die sewe horings van die Lam dui egter ook daarop dat Hy omvattende mag het en dat die sewe Geeste, die Heilige Gees, boonop in sy volheid in Jesus woon.

Jesus kan dus sorg dat dié agenda van God ten uitvoer gebring word.

Die spanning is gebreek en drie lofliedere bars los:

⁸Toe Hy die boekrol neem, het die vier lewende wesens en die vier-en-twintig ouderlinge voor die Lam neergeval. Elkeen het ‘n lier en ‘n goue bak vol reukwerk, wat die gebede van die heiliges is, vasgehou. ⁹Toe sing hulle ‘n nuwe lied: “U is waardig om die boekrol te neem, en die seëls daarvan oop te breek, omdat U geslag is, en met u bloed mense vir God gekoop het, uit elke geslag en taal en volk en nasie. ¹⁰U het hulle ‘n koninkryk en priesters vir ons God gemaak, en hulle sal as konings oor die aarde heers.” ¹¹Toe ek weer kyk, hoor ek die sang van baie engele rondom die troon, en van die lewende wesens en die ouderlinge. Daar was tienduisend maal tienduisende, duisend maal duisende, ¹²wat met harde stemme uitroep: “Waardig is die Lam wat geslag is, om die krag en rykdom en wysheid en sterkte en eer en heerlikheid en lof te ontvang.” ¹³En ek het die hele skepping – in die hemel, op die aarde en onder die aarde, op die see, en alles wat daarin bestaan – hoor uitroep: “Aan Hom wat op die troon sit, en aan die Lam, kom toe die lof en die eer en die heerlikheid en die sterkte, vir ewig en ewig.” ¹⁴Die vier lewende wesens het ook uitgeroep: “Amen!” En die ouderlinge het neergeval in aanbidding.

Hierdie toneel sê vir ons drie verdere goed.

1. Jesus is God

Soos die vier lewende wesens saam met die 24 ouderlinge voor die Skeppergod neergeval en Hom aanbid het, val hulle ook nou neer voor die Lam om Hom te aanbid. Dit bewys Jesus se goddelike status.

Saam met hulle is daar egter nou ook nog miljoene engele, sowel as die hele skepping, wat Hom aanbid in die volgende konsentriese sirkels rondom die troon.

2. Ons gebede maak saak

Wat ons bring by ons eie rol in hierdie hemelse erediens. Let op dat ’n uitstaande kenmerk van die vier lewende wesens en die 24 ouderlinge se aanbidding is dat hulle nie net die lier (die Griekse woord is kithara, waar ons ons naam vir die ghitaar vandaan kry!) in hulle aanbidding van God inspan nie, maar ook die gebede van die heiliges. Hulle prys en aanbid dus nie net die Here nie. Hulle bid dat sy wil sal geskied. En hulle gebruik ONS gebede daarvoor!

Die gebede word in die simboliese vorm van ’n goue wierookbak voor God gebring.

Van hierdie gebede van God se mense sal nog twee keer in Openbaring gewag gemaak word wat onderstreep dat gebede nie net God verheerlik nie, maar ’n bepaalde invloed het op die koers wat God met die wêreld inslaan.

Trouens, ons gebede is ook ons getuienis. God gebruik ook ons diens en getuienis om sy wil op aarde uit te voer, want, ons is sy koninklike priesterdom.

3. Ons is ‘n koninklike priesterdom

Let op hoe die drie lofliedere – van die vier lewende wesens en die 24 ouderlinge; van die miljoene engele; van alle skepsels – nie net die voortreflikheid van die Lam met ‘n sewetal eienskappe besing nie – krag, rykdom, wysheid, sterkte, eer, heerlikheid, lof – maar ook die agenda van God vir sy mense uitspel, soos in Openbaring 1. Ons gebede en ons getuienis is deel van ons diens aan God en aan hierdie wêreld. Ons bid dat God se wil in die hemel net so ook op die aarde sal geskied, en ons verkondig sy lof aan elke nasie op aarde. Hy is die Een wat alle krag, en rykdom, en wysheid, en sterkte, en eer, en heerlikheid en lof besit en dit waardig is.

Ons sing daarvan. Ons getuig daarvan. Ons bid daarvoor. Want, ons is ’n koninkryk van priesters vir God. En God se belofte is dat ons uiteindelik saam met Jesus as konings oor die aarde sal heers.

‘n Wonderlike werklikheid en ’n hoopvolle belofte.

Wat beteken dit prakties?

Daar is baie verskillende tipe gebede in die Bybel. Lofgebede en klaagliedere. Smekinge en dankseggings. Voorbidding en selfs vervloekinge (onthou dat Jesus ook “wee”- uitsprake gemaak het waarin Hy ‘n profetiese aanklag lewer vir gedrag wat tot ‘n ramp sal lei – Matt 23). Aanbidding en lofprysing.

Hierdie 28 goue bakke vol reukwerk (wierook) in Openbaring 5 bevat al die gebede van die heiliges wat tot God gebid word.

• As jy vir iemand se redding bid, is daardie gebed in een van die bakke.
• As jy bid vir die veiligheid van mense in een of ander ramp, is daardie gebed in een van die bakke.
• As jy bid dat God jou sal verander na die beeld van Jesus, is daardie gebed in een van die bakke.

Want, sulke gebede is vir God welgevallig. Dit dra sy goedkeuring weg.

Maar, dit is nie al nie.

Daardie gebede word gebruik in God se verlossende oordeel.

Met die breek van die sewende seël in Openbaring 8 word hierdie gebede van al die heiliges – en onthou, heiliges is doodgewoon ‘n beskrywing van elke ware gelowige – aan nóg ‘n engel gegee wat dit met vuur van die altaar af vul en dit dan op die aarde uitgooi. Dit veroorsaak donderslae, dreunings, weerligstrale en ‘n aardbewing. En die sewe trompette begin daarna blaas met die intensifisering van God se verlossende oordeel.

Elke gebed wat jy dus bid maak saak. Word deur God gebruik. Elke gebed wat volgens sy wil gebid word, word deur Hom uitgevoer, want Hy het daardie gebede in die eerste plek gewil.

Ek wil dus vandag nie afsluit met ‘n opdrag nie… hoewel dit sekerlik ook ‘n opdrag is, om te bid, en jou lewe al hoe meer in gebed voor die Here te laat oorgaan. Maar, ek wil jou laat met die wonderlike werklikheid dat jou gebede saak maak. Elkeen van ons se gebede. Dat God dit gebruik, en dat jy só ingetrek word in God se werk op aarde.

Iemand wat dit eenmaal raakgesien het, het nie ‘n opdrag nodig nie. Jy kan nie anders as om die geleentheid te gebruik nie.

Gebed

Geloofsbelydenis

Dankoffers

Slotlied

Lied 205:1,2 Bring lof aan die Vader, verheerlik die Seun – staan

Seën

Respons

Lied 189 Halleluja! Halleluja! Halleluja! – staan