God dink glad nie meer aan ons sondes en wettelose dade nie – Hebreërs 10:15-31

NGK Somerstrand 15 April 2022 | Goeie Vrydag | Kerk en Youtube 09:00

Ons het verlede Sondag gefokus op die sewe kruiswoorde van Jesus op Goeie Vrydag. Ons het kennis geneem van wat op aarde gebeur het. Jesus het sy vyande vergewe. Hy het die misdadiger saam met Hom die ewige lewe ingeneem. Hy het vir sy ma gesorg deur haar ‘n tuiste by Johannes te gee. Hy het die donkerte vir ons getrotseer totdat Hy kon uitroep: “Dit is volbring!” En sy gees in die hand van sy Vader kon gee. Maar, dit is nie al wat op Goeie Vrydag gebeur het nie. Die aardse kant was maar een deel van die werk wat Jesus dié dag gedoen het. Die Hebreërskrywer lig vir ons in hoofstuk 9-10 die gordyn op die hemelse werk wat Jesus gedoen het. In God se hemelse heiligdom. Die skeiding tussen ons en God is daardeur weggeneem. En twee groot beloftes van God tree daarmee vir ons in werking. Vergifnis en Heiligmaking. Dit gee ons groot vrymoedigheid voor God en in gemeenskap met mekaar!

Verwelkoming

Aankondigings

Toetrede

Vonkk 254:1-2 God is hier en ons, sy kinders – sit

Votum en Seëngroet

Aanbidding

Lied 387:1,4 O Heer, uit bloed en wonde, uit kruishout haat en hoon – staan

Gebed

Nagmaal

Lied 303 (Afr, Eng) Eet die brood, drink die wyn. Kom na Christus, Hy stil u honger – sit

Skriflesing en prediking

Dit is Goeie Vrydag

Ons het verlede Sondag gefokus op die sewe kruiswoorde van Jesus op Goeie Vrydag. Ons het kennis geneem van wat op aarde gebeur het. Jesus het sy vyande vergewe. Hy het die misdadiger saam met Hom die ewige lewe ingeneem. Hy het vir sy ma gesorg deur haar ‘n tuiste by Johannes te gee. Hy het die donkerte vir ons getrotseer totdat Hy kon uitroep: “Dit is volbring!” En sy gees in die hande van sy Vader kon gee.

Die hemelse werk van Jesus

Maar, dit is nie al wat op Goeie Vrydag gebeur het nie. Die aardse kant was maar een deel van die werk wat Jesus dié dag gedoen het. Die Hebreërskrywer lig vir ons in hoofstuk 9-10 die gordyn op die hemelse werk wat Jesus gedoen het.

Op aarde het die Jode hulle offers gebring; ook die hoëpriester eenmaal ‘n jaar die versoeningsoffer om die Allerheiligste te reinig. Maar, ons moet altyd onthou dat die aardse tempel ‘n afbeelding was van wat in die hemele is. En ons sonde het ons toegang tot die hemelse heiligdom versper. Die aardse hoëpriester kon dit nie volledig en vir ewig uitwis nie. Dít is waarom Jesus aan die kruis gesterf het; met sy bloed die offer gebring het, sodat die hemelse heiligdom gereinig kon word. Sodat die versoening volledig en vir ewig kon wees.

Onthou hoe Jesus geweier het dat die vroue Hom aanraak die Sondagmôre met sy opstanding. Dit was omdat Hy eers die hemelse heiligdom moes in om dit te reinig. Eers daarna het Hy aan die dissipels verskyn om aan hulle die boodskap van vrede en vergifnis te bring.

Jesus verskyn nou voor God ter wille van ons

Wat Jesus vir ons daardeur gegee het, is die kosbaarste geskenk. Ons kan nou met vrymoedigheid tot God die Vader in sy hemelse heiligdom nader op die weg wat Jesus vir ons voorberei het. Hebreërs 9:24-26 sê:

 ²⁴Want Christus het nie ‘n mensgemaakte heiligdom, ‘n nabootsing van die ware een, binnegegaan nie, maar die hemel self, om nou ter wille van ons voor God te verskyn; ²⁵ook nie sodat Hy Homself herhaaldelik sou offer nie – anders as die hoëpriester, wat jaar ná jaar in die Heilige met ‘n ander se bloed ingaan – ²⁶aangesien Hy dan dikwels, van die grondlegging van die wêreld af, sou moes ly. Maar nou, by die volheid van die tye, het Hy eens en vir altyd verskyn om met sy offer die sonde ter syde te stel.

Met sy kruisdood het Jesus dus as Hoëpriester die hemelse heiligdom gereinig deur sy bloed. Hy het die skeiding wat die sonde vir ons gebring het om die hemelse heiligdom te betree, oorbrug. Sy offer het die afstand tussen God en ons oorbrug. Hy het: “die sonde ter syde gestel”, waarna Hy die voorreg gekry het om: “nou ter wille van ons voor God te verskyn”.

Die aardse offerstelsel is daarmee beëindig met die volmaakte offer van Christus in die hemel: “Volgens sy wil is ons heilig gemaak deur die offer van die liggaam van Jesus Christus, eens en vir altyd.”

Sedertdien wag Jesus totdat sy vyande: “’n voetbank vir sy voete gemaak word, want deur een offer het Hy hulle wat geheilig word, vir altyd vervolmaak.” Dít is die erfenis van elkeen wat in Hom glo.

Twee beloftes van God

Daarmee het twee beloftes vir ons in vervulling gegaan.

Die eerste belofte is dat God met ons ‘n verbond gesluit het dat Hy sy wette in ons harte gee en op ons verstand neerskryf sodat ons van binne-af Hom kan dien. Ons ervaar dit deur die Gees wat ons herinner aan alles wat God gesê in sy Woord en ons die moed en krag gee om die sonde wat nog oorgebly het in ons lewe te bely en laat staan.

Die tweede is dat God glad nie meer aan ons sondes en ons wettelose dade dink nie. Glad nie! Só verduidelik die Hebreërskrywer dit in hoofstuk 10:

¹⁵Ook die Heilige Gees getuig teenoor ons; want nadat Hy gesê het, ¹⁶“Dit is dan die verbond wat Ek ná daardie dae met hulle sal sluit, sê die Here: Ek sal my wette in hulle harte gee, en dit op hulle verstand neerskryf,” sê Hy ook: ¹⁷“Aan hulle sondes en aan hulle wettelose dade sal Ek glad nie meer dink nie.” ¹⁸Waar daar vergifnis hiervoor is, word ‘n offer vir sondes nie meer gebring nie.

Die besef van ons sonde is dus uit God se geheue weggeneem deur die offer van Jesus; dit is die omvattende betekenis van hierdie boodskap. Dít is waarom daar ook nie meer ’n aardse offer vir ons sondes nodig is nie, want die hemelse offer wat Jesus gebring het, het God se geheue vir ons sonde uitgewis: “Ek sal glad nie meer aan hulle sondes en aan hulle wettelose dade dink nie.”

Vrymoedigheid voor God

Die gevolg is dat ons nou vrymoedigheid het om met God gemeenskap te hou. Soos Hebreërs dit sê:

¹⁹Broers, ons het dus vrymoedigheid deur die bloed van Jesus om in te gaan na die heiligdom, ²⁰langs ‘n nuwe en lewende weg wat Hy vir ons geopen het deur die voorhangsel heen, dit is deur sy liggaam, ²¹en ons het ‘n groot Priester oor die huis van God. ²²Laat ons daarom ingaan met ‘n opregte hart, in volle geloofsekerheid, met ons harte besprinkel, vry van ‘n slegte gewete, en ons liggame gewas met skoon water.²³Laat ons styf vashou aan die belydenis van wat ons hoop, sonder om af te wyk, want Hy wat die belofte gemaak het, is getrou.

Die skrywer verwys hier in vers 22 na die omvattende werk wat God in ons harte gedoen het. Hy het ons harte besprinkel en van ‘n slegte gewete vrygemaak. En dié innerlike werk bevestig met die uiterlike teken van die doop; ons liggame gewas met skoon water.  Die uiterlike teken van die doop getuig dus van die interne reinigingswerk van God.

Dit gee ons dus geloofsekerheid – ‘n sekerheid van ons ewige verlossing – sodat ons hierdie weg wat Jesus vir ons oopgemaak het, kan betree, die hemelse heiligdom van God. Alles wat Jesus dus vir ons hierdie Paasnaweek lank gelede gedoen het, op aarde en in die hemel, was gemik daarop om ons gemeenskap met God te herstel. Dit is ‘n nuwe en lewende weg wat Jesus nou vir ons in stand hou dat ons voor God kan verskyn as sy kinders.

Die Griekse woord wat die skrywer hier vir vrymoedigheid gebruik, is parrēsia en dra ook die betekenisse van moed hê, vertroue beoefen, reguit wees en openhartig leef (in Engels: to have courage, boldness, confidence, en frankness). Dit is hoe ons die troon van God, die heiligdom in die hemel, moet nader as ons bid. Met moed en vertroue, sonder om terug te hou, openhartig, eerlik en opreg.

Vrymoedigheid voor mense

Maar, hierdie vrymoedigheid is nie net in ons verhouding met God nie. Jesus gee ons vrymoedigheid ook in ons verhouding met ander gelowiges. Dit gee ons die moed om “mekaar aan te spoor tot liefde en goeie dade.” Dit gee ons die moed om die onderlinge samekomste van die gemeente nie te verwaarloos nie, soos sommige ongelukkig die gewoonte gehad het in daardie tyd. Hebreërs sê:

²⁴Laat ons ons ook daarop toelê om mekaar aan te spoor tot liefde en goeie dade, ²⁵sonder om ons eie samekoms te verwaarloos, soos sommige se gewoonte is; laat ons eerder mekaar aanmoedig,

En dan gaan hy verder om hierdie oproep om as kinders van die Here gereeld saam te kom, te begrond nie net in wat hierdie Paasnaweek gebeur het nie, maar ook op die feit dat die Here Jesus weer kom en dat ons moeite moet doen om ons verhouding met God – dws die sonde moet vermy – en ons verhouding met mekaar in stand te hou – dit sluit die onderlinge vermaning in:

soveel te meer nog namate julle dié dag sien nader kom! ²⁶Want as ons willens en wetens aanhou sonde doen, nadat ons kennis van die waarheid ontvang het, bly daar nie meer ‘n offer vir ons sondes oor nie, ²⁷maar wel ‘n verskriklike verwagting van oordeel en intense vuur, wat God se teenstanders gaan verteer. ²⁸Wanneer iemand die wet van Moses verwerp het, het hy gesterf op grond van twee of drie se getuienis, sonder genade. ²⁹Hoeveel erger straf dink julle sal iemand verdien wat die Seun van God vertrap het, die bloed van die verbond waardeur hy geheilig is, gering geag het, en die Gees van genade uitgedaag het? ³⁰Want ons ken Hom wat gesê het: “Aan My behoort die wraak; Ek sal vergeld.” en ook: “Die Here sal sy volk oordeel.” ³¹Verskriklik is dit om te val in die hande van die lewende God!

Dit is ‘n mondvol, maar dit is wat hierdie dag, Goeie Vrydag, vir ons bewerk het. Op aarde en in die hemel.

Reaksie

So, dink vandag oor die twee beloftes wat God vir jou gee:

• God skryf sy wil op jou hart, sodat jy van binne-af kan doen wat Hy in sy Woord van jou vra. En gee jouself volledig vir die werk van die Gees in jou hart wat jou wil reinig deur die Woord van God sodat jy onberispelik voor Hom en in gemeenskap met Hom kan leef.
• God dink glad nie meer aan jou sondes en wettelose dade nie. Glad nie! Jy kan met groot vrymoedigheid, met ‘n skoon gewete, die Here in sy heiligdom nader om Hom te aanbid en van Hom jou opdragte tot diens in hierdie wêreld te ontvang.

Wees dus vrymoedig in jou gemeenskap met Hom. En moenie die onderlinge gemeenskap verwaarloos nie.

Toewydingslied

Vonkk 146:1,4 My gees, my siel, my liggaam wy ek aan U, o Heer – staan

Seën

Amen

Dankoffer