Skip to main content

DIXIT DEUS – God se vernuwende pad deur dissipelskap – 2025

Written by Mariette Rossouw on . Posted in Hulpmiddels vir families, Joernaal, Op pad met God. No Comments on DIXIT DEUS – God se vernuwende pad deur dissipelskap – 2025

Puik. Skitterend. Indrukwekkend. So reageer Francois se W.A.T. as jy die woord-raaispel, Wortel, vinnig kon voltooi het. As jy egter flop… Ontwortel! Wel, dít voel maar vrotterig, nè?

Deur van hierdie ervarings te lees, kan jy dink hoekom woorde ’n baie sterk gevoelswaarde het. Soos bv. sukses, wat daarenteen, sommer baie lekker kan voel en selfs soet sal smaak!

In “Beleef God” vra Henry Blackaby watter eienskap van God het jy oor die jare heen ondervind, dra ‘n spesiale waarde vir jou. Dalk Sy liefde? Of Sy alwetendheid – omdat jy wis, soms voor jy sou vra, dat Hy sou weet? Of die vrede in Sy teenwoordigheid – wat dan ook mense, daaglikse voorvalle en geleenthede Godsvallig maak, want niks is tog meer vir jou toevallig nie? Of God se trou, wat vir jou innerlike betekenis en ‘n gevoelswaarde kan hê, wat selfs “hemels” kan voel?

Inderdaad. Woorde dra emosies. Wanneer jy fyn na God in sy Woord luister, kan jy vir seker weet dat dit ’n kragtige en wesenlike uitwerking op jou lewe sal hê. En as jy rêrig ernstig na Hom roep en soek, kom Hy in Sy alwysheid jou uitnodigend tegemoet, en leer jy Sy wil en Sy pad vir jou ken.

God antwoord onlangs op Sy roeping en seën ons met ’n vars, besielende visie vir die handel-en-wandel vir vernuwende kleingroepe soos Dixit Deus. (Latyn vir “God praat”.) God self is nou die Hoofkarakter en wil met elkeen deur sy Woord praat; en ja, luister is belangrik! As jy in eenvoud die Bybel lees, kan jy ’n dieper verstaan van God kry en Sy werklikheid elke dag meer raaksien. En wanneer jy Sy woorde verinnerlik, bou jy besielend – deur voortgaande verdieping – aan ’n intieme verhouding met jou Vader. Juis dít is van die kern-aspekte van geestelike groei in kleingroepe.

Gordon McDonald en Adele Calhoun se boeke oor geestelike gewoontes (ook dissiplines, ritmes en beginsels genoem) help ons om dit op verrassende wyses te kan bemeester. Dit dra by tot ons emosionele welstand en veral ’n groeiende besef van wie God is en wil wees. Ons ondersteun mekaar om mettertyd sulke gewoontes as gewone ritmes in ons lewenstyle te kan vestig!

Dixit Deus is vir elkeen wat ’n geestelike afplatting ervaar, ’n ander geestelike tuiste soek, of wat ‘n behoefte het aan ’n nuwe lewensvisie. Òf, as jy ’n ware soeke na die HERE God self het, kom gerus mee op hierdie pad van Hom. Dissipelskap help elkeen om immer saam met Jesus te stap.

Verder kan jy op ‘n dag ’n hoogs uitsonderlike aha­-oomblik ervaar, sodat jy saam met Job (42:4) sal getuig: “Tot nou toe het ek net gehoor wat mense van U sê. Maar nou het ek U self gesien.”

Dit is op die heilige grond van sy Goddelike teenwoordigheid waar God se seën jou deel word in ’n unieke, lewensveranderende belewenis; ’n nuwe avontuur. Verruklik. Groots. Subliem-hemels!

Liefdevolle seëngroete in Christus!

Mariette Rossouw (Januarie 2025)

Continue reading

Op pad na Kersfees – Vir gesinne

Written by Chris van Wyk on . Posted in Hulpmiddels vir families. No Comments on Op pad na Kersfees – Vir gesinne

Hoe goed ken jy die storielyn van Jesus? Kan jy en jou kinders die verhale van sy geboorte en kinderjare een na die ander vir mekaar vertel? Hier is ‘n boek wat jou gaan help om die storielyn van Jesus onder die knie te kry. Die verhale van Jesus se geboorte en kinderjare is kronologies gerangskik. Maak vir julle ‘n Adventskrans met vyf kerse (instruksies ingesluit). Steek elke dag ‘n kers aan en lees die geboorte en kinderverhale van Jesus saam met jou kinders. Daar is ‘n teks vir elke dag van Sondag 29 November tot en met Kersdag, Vrydag 25 Desember. ‘n Maklike kindvriendelike vertaling is ingesluit met vrae vir bespreking en voorstelle vir ‘n Adventskalender met ‘n daaglikse verrassing vir jou kinders (jy sal dit vooraf moet regkry!). Skep vir jou kinders opnuut die verwagting van die Koms van die Kind van God. Jesus is sy grootste Kersgeskenk aan ons.

Hou sinvolle Bybelstudie saam met jou huisgesin

Written by Chris van Wyk on . Posted in Bybelskool, Geloofsvorming, Hulpmiddels vir families, Kleingroepmateriaal. No Comments on Hou sinvolle Bybelstudie saam met jou huisgesin

Ek het ‘n navraag gekry oor hoe om sinvolle Bybelstudie saam met jou huisgesin te hou. Hier is die metodiek wat ek voorstel, en ‘n paar opsies vir Bybelboeke om deur te werk aan die hand van my bydraes. Dit is alles gratis.

METODIEK

STILTETYD

Ek gebruik die volgende basiese metodiek as ek die Bybel lees. Lees, luister, leef

  1. LEES – Raak stil voor die Here. Lees die gedeelte deeglik deur. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Soek vir een of meer sleutelgedagtes wat jou besonderlik tref. Skryf dit in jou joernaal neer. Lees dan wat ek geskryf het oor die hoofstuk in die Bybel en dink na oor wat jou daarin tref.
  2. LUISTER – Dink na oor wat God vir jou deur die sleutelgedagte(s) wil sê. Waar raak hierdie gedagtes jou lewe in die praktyk? Wat moet jy dink of doen daarmee (insigte)? Wat belowe dit vir jou (beloftes)? Wat vra dit van jou (opdagte)? Wat is die kern van die boodskap daarvan vir jou dag en lewe?
  3. LEEF – Besluit hoe jy daarop gaan reageer. Sê dit vir die Here in gebed. Skryf dit in jou joernaal. Laat die boodskap wat God jou gee met jou saamgaan deur die dag. Leef dit uit in sy teenwoordigheid.

HUISGODSDIENS OF KLEINGROEPE

As ‘n mens dan saam kom vir huisgodsdiens of in ‘n kleingroep (na elkeen stiltetyd gehou het), kan ‘n mens met mekaar deel wat jou bybly – insigte, beloftes, opdragte – en dan ‘n tyd van gebed gee waar julle die Here aanbid, voorbidding doen, en Hom loof vir gebedsverhoring.

BYBELBOEKE

1. Prontuit die Waarheid – die vier evangelies

Werk die vier evangelies saam deur.

2. Die verhaal van die kerk – Paulus versit berge

Volg die verhaal van Paulus in Handelinge en sy dertien briewe, want dit is die verhaal van die kerk. Só sal dié verhaal ook jou verhaal word.

3. Ek kom gou – Die boek Openbaring

Werk Openbaring deur.

4. Klaagliedere van Jeremia

Jeremia help ons om sin te maak van die Covid-19 tyd.

5. Werk die Bybel deur

Gebruik die Bybelskool materiaal om enige boek in die Bybel deur te werk. Daar is inligting oor elke hoofstuk in die Bybel. Lees dit kronologies deur, of soos die Here jou lei.

Chris van Wyk

Robert Jermain Thomas – van die Heroes of Faith reeks

Written by Chris van Wyk on . Posted in Hulpmiddels vir families. No Comments on Robert Jermain Thomas – van die Heroes of Faith reeks

Robert Jermain Thomas was ‘n ywerige man. Hy het op die ouderdom van 17 sy eerste preek gepreek, en later is hy as pastoor georden. Hy was ywerig om die evangelie na die mense van Oos-Asië te neem, waar die meeste nog nooit ‘n Bybel gesien het nie. Sy vrou, Carrie, het sy passie gedeel.

Ongelukkig het hy en sy vrou hul ongebore baba verloor, en is Carrie binne vyf maande na hul aankoms as sendelinge oorlede. Hulle was bereid om alles saam in die gesig te staar, maar nou was sy weg. Robert was so hartseer dat hy ‘n tyd lank opgehou het om ‘n sendeling te wees en ‘n ander pos in China gekry het.

Toe hy egter twee Christelike handelaars uit Korea ontmoet, is sy toewyding om die evangelie te versprei, hernu. Min Koreane het Jesus gevolg, en die leiers het destyds mense en idees uit ander lande gehaat. Maar Robert was meer ywerig vir verlore mense as vir sy eie veiligheid.

Toe die twee Koreaanse Christene op pad terug was na Korea, het Robert by hulle aangesluit. Amptenare het almal met ernstige straf gedreig wat met buitelanders gepraat het, maar sommige het na die prediking van Robert geluister en in elk geval sy gawe van ‘n Bybel aanvaar.

Later het Robert ‘n manier gevind om die evangelie na Korea te neem as ‘n vertaler aan boord van ‘n Chinese handelsskip. Op ‘n reis na Korea het die skeepsmanne kanonne op vyandige Koreane aan die oewer afgevuur. Uit vrees dat hulle die stryd sou verloor en die Bybels verlore sou gaan, het Robert die Bybels in die water gegooi. Hy kon daarin slaag om sommige van hulle selfs aan die oewer te kry in sy laaste poging om die Koreane te bereik. Maar net nadat hy die oewer bereik het, is hy deur sommige woedende burgers onthoof.

Jare later het sendelinge ontdek dat Koreane Christus begin volg het nadat hulle die Bybels gelees het. Ongeveer een derde van Suid-Korea is vandag Christene, en Christen-sendelinge van Suid-Korea dien God regoor die wêreld.

Robert se passie om die mense van Oos-Asië te bereik was vir hom belangriker as selfs sy eie lewe. Soms word God verheerlik as Christene sterf weens hul geloof in Hom. Ander kere word Hy verheerlik wanneer Hy mense uit die hande van hul vervolgers verlos. Hoe dit ook al sy, ons kan vertrou dat ons lewens in Sy hande is, net soos Robert Jermain Thomas gedoen het.