Die Here is met jou, dapper kryger! – Rigters 6

NGK Somerstrand 11 September 2022 | Kerk en Youtube 09:00

Translation: The LORD is with you courageous warrior – Judges 6.docx

Verwelkoming

Aankondigings

Toetrede

Lied 214 Here ons sal U loof (staan)

Ten Thousand Reasons

Votum en Seëngroet

Lofsang

Psalm 33:1,2,7  Sing juigend, sing ‘n nuwe loflied (staan)

Kindertyd

Ken julle die liedjie van die dapper muis?

Is julle dapper?

Kom ons luister na die verhaal van Gideon. Gideon was bang, maar God was sterk. Die Here het ‘n bang Gideon gehelp om dapper te wees.

1. Gideon se verhaal is in die Bybel in die boek Rigters. Dit het gebeur in ‘n tyd toe die vyande van Israel hulle aanmekaar aangeval het en hulle goed gesteel het.
2. Gideon was bang vir die vyandige soldate en het vir hulle weggekruip. Die Here het egter na hom toe gekom en vir hom gevra om dapper te wees en sy mense te help om hulle goed terug te kry. Die Here sal hom sterk maak.
3. Gideon was bang en het vir die Here gevra: “As U regtig wil hê ek moet my mense help, wys dan vir my asseblief ‘n teken. Kyk ek het ‘n skaapvelletjie hier. Dit is droog en wollerig.”
4. “Ek sal die skaapvelletjie buite los op die grond vanaand. Môreoggend, as die grond droog is, maar die skaapvelletjie is nat, dan sal ek my mense help.”
5. Die Here het geluister. Die volgende oggend het Gideon aan die grond gevoel en dit was droog. Maar toe hy die skaapvelletjie oplig, was dit nat.
6. Maar Gideon was nog steeds bang. Hy het nog steeds nie geglo die Here sal hom help nie. Hy vra toe dat die Here vir hom nog ‘n teken sal gee. “Hierdie keer,” sê hy vir die Here: “as ek die skaapvelletjie buite los op die grond vannag, moet die grond nat wees, maar die skaapvelletjie droog. Dan sal ek my mense help.”
7. Wat dink julle het gebeur? Die volgende oggend was die grond nat, maar die skaapvelletjie droog!
8. Gideon was nou seker dat die Here regtig wou hê hy moet sy mense help. Hy het geweet die Here sal hom help. Hy het ‘n klomp soldate van Israel geneem en hulle gereed gemaak. Hulle het die vyande weggejaag en al hulle goed teruggekry.
9. Gideon het die Here vertrou en die Here het hom gehelp om hulle vyande weg te jaag. Hulle het dit reggekry, omdat Gideon gehoorsaam was en gedoen het wat die Here vir hom gesê het om te doen. Die Here het Gideon gehelp om dapper te wees.

Gebed

Verootmoediging

Vonkk 53:1-2 Skuil by die Vader (sit)

Skriflesing en prediking

Geduld en genade

Die boek Rigters (laai my boek daaroor hier af) handel oor die tyd na die aanvanklike inname van die land deur Josua. Die stryd om te oorleef in die land tussen die nasies wat steeds daar gebly het, is in volle swang. Dit is egter duidelik ‘n tyd van groot afvalligheid en ongehoorsaamheid aan die Here. Die volk het telkens afvallig geraak van die Here en die omringende nasies se afgode aanbid en by hulle onsedelikheid betrokke geraak. Presies dié dinge waarteen Josua, en voor hom Moses, hulle gewaarsku het. Presies dié dinge wat regdeur die Bybel aangespreek word. Selfs in die briewe van Jesus aan die sewe gemeentes van Openbaring bly dit dié twee dinge waaroor die Here die gemeentes waarsku: afgodery en immoraliteit.

Die wonder is dat die Here die volk nie aan hulle eie afvalligheid oorlaat nie, en telkens ‘n rigter roep in hierdie tyd om die volk te red van hulle eie dwaasheid. Want, dit is die een ding wat ons van die Here ter harte kan neem. Sy geduld en genade.

Ek fokus op die verhaal van Gideon, want dit is ook die verhaal waarop die kinders gaan fokus in die toepassing.

Die Here roep vir Gideon

Die verhaal van Gideon word uitvoerig vertel in drie hoofstukke van die boek Rigters met dié van sy seun Abimelek in ‘n vierde daarby gevoeg – hoofstuk 6-9. Ons fokus egter net op die eerste hoofstuk. En ek sal die teks en die prediking in mekaar vleg.

Gideon is die seun van Joas, uit die stam van Manasse. Die stam dien Baäl teen die duidelike riglyne van die Here openlik met ‘n altaar vir Baäl en ‘n gewyde paal, ‘n Asjera, daarnaas. Afgodsdiens was immers telkens ‘n achilleshiel vir die volk wat tot die verval van Israel gelei het.

Geen wonder die Here het die Israeliete as straf oorgegee in die hande van die Midianiete nie, ondersteun deur die Amalekiete. Die Israeliete het immers volhard in hulle afgodediens en gedoen wat verkeerd is in die oë van die Here.

Die impak van hierdie oorheersing – onthou die Midianiete is afstammelinge van Abraham en Ketura, dws hulle verlangse familie! – was omvattend. Die Israeliete – in dié geval veral die hele stam van Manasse wes en oos van die Jordaan – is teruggedryf in die berge waar hulle langs bergstroompies, in grotte en ander ontoeganklike plekke gaan bly het. So lees ons in die eerste ses verse van hoofstuk ses.

Die Israeliete kon nie saai nie, want die opbrengs is deur die Midianiete vernietig. Hulle diere is uitgewis in die veld. Die Midianiete was soos ‘n ontelbare swerm sprinkane wat alles vernietig het in hulle pad. Die Israeliete het armlastig geword en het gekrepeer van die ellende. Hulle geestelike verval het tot ‘n sosiale en ekonomiese verval gely.

Soos ons telkens kan raaksien in die boek Rigters, laat dié straf van die Here die Israeliete roep na die ingrype van die Here en reageer Hy, hierdie keer op twee maniere. Hy stuur aanvanklik ‘n naamlose profeet om hulle aan die Here se wonders in die verlede te herinner – vers 7-10 – maar hulle ook helder in te prent dat die benarde situasie waarin hulle hul bevind deur hulle eie afvalligheid te weeg gebring is.

Dan roep die Here ‘n rigter, Gideon, deur Homself as Here te openbaar aan hom – vers 11. Die Here, Jahwe, verskyn as die Engel van die Here wat gaan sit onder die groot boom in Ofra waar Gideon in die geheim koring gedors het in ‘n versteekte parskuip. ‘n Mens kom met die verloop van die gesprek met Gideon agter dat die Engel van die Here, die Here self verteenwoordig.

Sewe gesprekke tussen die Here en Gideon

1. Let op die eerste woorde van die Engel aan Gideon:

“Die Here is met jou, dapper kryger!” – vers 12.

Gideon se eerste reaksie dreig om sarkasties te raak met ‘n:

“Asseblief, my Heer, as die Here dan werklik met ons is, waarom tref al hierdie dinge ons? En waar is al sy wonderwerke waarvan ons voorouers ons vertel het toe hulle gesê het, ‘Het die Here ons nie uit Egipte laat optrek nie?’ Maar nou het die Here ons verstoot en ons oorgegee in die hand van die Midianiete.”

Agter sy beleefdheid skuil ‘n ernstige wantroue.

2. Let op hoe dit nou die Here is wat na Gideon toe draai en sy wantroue van die tafel af vee met ‘n direkte opdrag in sy tweede reaksie:

¹⁴Toe draai die Here na hom en sê: “Gaan met die krag wat jy het, en verlos Israel uit die hand van die Midianiete. Het Ek jou nie gestuur nie?”

Dit is dus nie net die Engel nie, maar die Here self. Let op hoe die Here praat van die: “krag wat jy het”! En die kragtige bemagtiging daarmee saam: “Het Ek jou nie gestuur nie?”

Dit is hoe Goddelike bemagtiging werk. God begin met wat ons het, en vermeerder dit deur sy ingrype en betrokkenheid. Soos Jesus dit met die twee vissies en vyf broodjies gedoen het in die NT (Joh 6:9).

Gideon se tweede reaksie wys egter dat hy moeilik byt aan dié opdrag.

¹⁵ “Asseblief, my Heer! Hoe kan ek Israel verlos? Kyk, my familiegroep is die onbenulligste in Manasse, en ek is die jongste in my familie.”

Gideon hoor net: “die krag wat jy het”, nie die: “Ek stuur jou” nie. Waarmee sou hy nou die Israeliete kon gaan red? Hulle is arm en hy het geen aansien nie.

3. Die Here se derde reaksie vat die koek:

¹⁶Die Here sê toe vir hom: “Omdat Ek met jou sal wees, sal jy die Midianiete verslaan asof hulle net een man is.”

Geen wonder die Here beveel hom later om met net 300 man die Midianiete aan te val nie, want hulle sou verward vlug asof hulle krag gereduseer is tot net een sterfling voor die mag van sy Skepper!

Gideon se derde reaksie wys dat hy steeds dink dat hier niks gaan gebeur nie, want hy vra vir ‘n teken om seker te wees dat dit regtig die Here is wat met hom praat, al sit die Engel van die Here, dit is die Here self!, daar reg by hom – vers 17-18.

4. Die onuitputbare geduld van die Here word in sy vierde reaksie getoon deurdat Hy bereid is om te wag op Gideon.

“Goed, Ek sal bly totdat jy terugkom.” (einde van vers 18)

Kan jy nou meer. Miskien die helderste evangelie in hierdie hoofstuk. God wag dat Gideon klaar is, voor Hy met hom verder werk. Ontsagwekkend!

Gideon maak toe ‘n bokkie gaar, bak ‘n groot hoeveelheid brood – let op dat dit soos ‘n Paasmaaltyd gedoen word, sonder suurdeeg – gooi ‘n bietjie sous by en bedien die Engel onder die groot boom – vers 19.

5. Die Engel vra in sy vyfde verbale reaksie dat dit as ‘n offer gebring word op die rots en laat die wonder gebeur dat ‘n vuur uit die rots opvlam om die offer te verteer – vers 20-21. Dit is dan ook die teken wat Gideon gevra het.

Met dié het die Engel verdwyn voor Gideon se oë en daag die besef by hom op dat Hy regtig met die Here te doene het – vers 22.

6. Maar, wat nou ongelooflik is, is dat die Here steeds by Gideon is, al is die Engel nie meer sigbaar by hom nie, en hom in sy sesde reaksie gerus stel oor die wonder wat so pas gebeur het – want Gideon raak toe bang dat hy die Here van aangesig tot aangesig gesien het, en dat dit moontlik sy dood sou kos. Die Here stel vir Gideon gerus en sê:

²³ “Vrede vir jou! Moenie bang wees nie; jy sal nie sterf nie!”

Gideon het toe daar ‘n altaar vir die Here gebou en dit genoem “Die Here is vrede”.

7. Die gesprek duur voort tot in die nag en in die sewende en laaste reaksie dié nag beveel die Here Gideon om sy pa se altaar vir Baäl en die gewyde paal vir Asjera af te breek en ‘n netjiese altaar vir die Here daar langsaan op te rig, en dan ‘n spesifieke sewe jaar oue bul van sy pa daarop as brandoffer – die offer wat vir die vergifnis van sonde gebruik is – te offer. Asjera moes op ‘n minagtende vernederende manier as die brandhout gebruik word.

Die Here se geduld met Gideon maak hom gereed vir die oorlog

Gideon het nie op hom laat wag nie en dit alles gedoen soos die Here beveel het, hoewel die teks ons meedeel dat hy dit in die nag doen, waarskynlik die daaropvolgende nag, omdat hy bang was vir sy pa se familie en die stad se mense.

Die belangrike is egter dat Gideon sy voete op die pad van gehoorsaamheid gesit het. Daarsonder kan niks gebeur nie! Gehoorsaamheid begin met die eerste tree, die eerste opdrag wat uitgevoer word.

Die reaksie bly natuurlik nie uit nie, want iemand het vir Gideon gesien. Die nuus breek dus gou die volgende oggend dat dit hy was wat hierdie ongehoorde ding gedoen het.

Die Here gee egter altyd ook mense wat tot inkeer kom en saam die stryd begin stry. Tot sy pa se krediet is dit hyself wat sy seun verdedig toe die stad Gideon wou uitwis, al was die afgode op sy perseel. Hy het sê vir almal wat daar saamdrom – vers 31:

“Wil julle vir Baäl die stryd voer? Of moet julle hom red? Wie ook al vir hom die stryd voer, sal vanoggend nog sterf! As hy ‘n god is, laat hy vir homself die stryd voer wanneer iemand sy altaar omgegooi het.”

En ons lees dat hulle daarmee vir Gideon die naam Jerubbaäl gegee. In Hebreeus beteken dit: “laat Baäl sy eie saak behartig”. Geen wonder nie dat dit daarom van hier af Gideon se naam word, want Gideon se optrede het Baäl se onmag duidelik gewys.

Uiteraard kon Baäl niks doen nie, maar wel hulle vyande. Die Midianiete en Amalekiete kom bymekaar en trek deur die Jordaanrivier tot in Jisreël om oorlog teen Gideon-hulle te voer.

Die Here het egter die hele proses begin en tree as eintlike leier op in die geveg. Hy laat nie net sy Gees van Gideon besit neem nie, maar bly ook regdeur met Gideon in gesprek, ook met die wonders wat die Here ‘n paar aande lank laat gebeur met die stukkie vlieswol op die dorsvloer wat dan nat is met die grond rondom droog, en dan droog met die grond rondom nat.

Die Here wys daarmee sy geduld en genade. Trouens, Hy wys regdeur dat Hy God is en in staat om nie net die natuur te beheer nie, maar ook oorwinning te gee in die oorlog. Soos dit inderdaad gebeur soos ons in hoofstuk sewe lees.

Boodskap

Die verhaal onderstreep ‘n paar uitstaande dinge.

1. God luister as ons roep, selfs al is ons situasie weens ons eie toedoen, selfs al straf die Here ons vir die dinge wat ons verkeerd gedoen het.
2. God se geduld en genade is groter as wat ons ooit kan dink. Hy sluit aan by ons wêreld en help ons om ons beperkinge te oorkom.
3. Wanneer God ons roep, gee Hy alles wat nodig is om sy opdragte uit te voer.

Verlede week het ek gefokus op die feit dat die Here die pottebakker is en ons die klei. Ek het jou aangemoedig om op die pottebakkerswiel te bly, sodat die Here van jou ‘n bruikbare voorwerp te maak. En die vraag was of jy plooibaar genoeg is om deur die Here in ‘n voorwerp van heerlikheid gevorm te word.

Hierdie week is die fokus op die roeping van God in jou lewe. Wat is die dinge wat die Here op jou hart lê in jou omgewing? Wat is die Here besig om vir jou daaroor te sê? Waarvoor roep die Here jou tans?

Hoor dan die woord van die Here: “Die Here is met jou, dapper kryger!”

Gebed

Geloofsbelydenis

1. Ek glo in God die Vader, die Almagtige, die Skepper van die hemel en die aarde.
2. En in Jesus Christus, sy eniggebore Seun, ons Here; wat ontvang is van die Heilige Gees, gebore is uit die maagd Maria;
3. wat gely het onder Pontius Pilatus, gekruisig is,
4. gesterf het en begrawe is en ter helle neergedaal het;
5. wat op die derde dag weer opgestaan het uit die dode;
6. wat opgevaar het na die hemel en sit aan die regterhand van God, die almagtige Vader,
7. van waar Hy sal kom om te oordeel die wat nog lewe en die wat reeds gesterf het.
8. Ek glo in die Heilige Gees.
9. Ek glo aan ‘n heilige, algemene Christelike kerk, die gemeenskap van die heiliges;
10. die vergewing van sondes;
11. die opstanding van die vlees
12. en ‘n ewige lewe.

Dankoffer

Slotlied

Lied 513:1-3 Soek in God jou sterkte…met God se wapens kan ons hul oorwin. (staan)

Seën

Respons

Lied 228 Halleluja!