Suffering is Not For Nothing

Youtube Pulse – Filippense 2:5-11 – 28 Maart 2021

Verwelkoming

Welkom. Ons lees vandag Filippense 2 en ek gaan ‘n bietjie gesels oor emigrasie en jou roeping. Jy is welkom om in die week ook vrae vir my te vra daaroor.

Ons het nie volgende week Pulse nie. Jy is welkom om vir die normale Goeie Vrydag en Paasdiens in te skakel op Youtube of in die kerk. Ons hou ook nagmaal Vrydag 09:00.

Hier is nuus oor Pulse wat in Meimaand terugskuif kerk toe (video clip).

Gebed

Skriflesing en prediking

As jy enigiets sou kon doen, wat sou dit wees?

Toe ek jonk was, wou ek die beste sportman wees. So vinnig soos Paul Nash. Hy was die eerste Suid-Afrikaner wat die 100 meter in 10 sekondes “flat” gehardloop het. In die laerskool was ek nogal vinnig. So net oor die 12 sekondes vir die 100 meter. Toe breek ek my knie, en toe is ek nie meer so vinnig nie.

Waaroor droom jy?

Om die bal 300 meter ver te slaan in gholf? Om 100 % vir Wiskunde te kry? Om eerste te staan in jou klas? In die provinsie? In die land?

Hoekom?

• Is dit vir die eer daarvan? Om bewonder te word?
• Vir die beloning? Om ryk te word uit jou prestasies?
• Vir die status? Dat ander na jou sal kyk en sal dink, jô, maar jy is goed?

Daar is niks verkeerds om jou talente te gebruik nie. Daar is niks verkeerd om die beste te wil wees nie. Kompetisie is ‘n goeie ding. Dit bring die beste in ons na vore.

Jesus is ons Voorbeeld

Maar, in die Christelike lewe is daar ‘n ander waardestelsel. Dit gaan oor ons motivering. Waarom ons doen wat ons doen. Met watter doel ons dit doen.

Want, sien, Jesus is ons voorbeeld. En Hy is ‘n voorbeeld vir ons in alles.

Dit verander alles.

Paulus skryf daaroor in hoofstuk 2 van sy brief aan die Filippense. Ek lees vir ons in my eie vertaling van Eugene Peterson se The Message.

Paulus skrywe oor wat Christenskap vir jou gegee het, want as ‘n mens dit goed verstaan, gaan jy verstaan wat Jesus wil hê dat jy met jou lewe moet doen.

HY HET DIE STATUS VAN ‘N SLAAF AANGENEEM

1–4 As jy enigiets gekry het deur Christus te volg, as sy liefde ‘n verskil in jou lewe gemaak het, as die gemeenskap met die Gees iets vir jou beteken, as jy ‘n hart het, as jy omgee —doen my dan ‘n guns: Stem saam met mekaar, wees lief vir mekaar, wees diep geestelike vriende. Moenie na die voorkant toe druk nie; moenie jou pad boontoe met mooi woorde oop praat nie. Sit jouself opsy, en help ander om vooruit te gaan. Moenie versot wees op jou eie voordeel nie. Vergeet jouself lank genoeg om iemand anders te help.

Paulus herinner ons aan die gawes wat God vir ons gee. Dat Hy vir ons lief is. Dat Hy vir ons sy Gees gegee het. Dat Hy vir ons ‘n klomp Christen maats gegee het, diep geestelike vriende.

Dit moet ons help om op ‘n ander manier met mekaar te werk. Ons moet nie die hele tyd druk om voor in die ry te kom nie. Ons moenie ons self beter voordoen as wat ons regtig is nie. Ons moet onsself opsy sit, sodat ander vooruit kan gaan.

Soos hierdie atleet, Simon Cheprot, wat op pad was om die 10 km in ‘n groot wedloop in Nigerië vir die tweede keer in ‘n ry te wen, toe hy sy opponent Kenneth Kipkemoi sien val. Hy het hom opgehelp en sy posisie prys gegee om sy opponent te help oor die wenstreep. Dit was 28 Mei 2019.

“My dad told me one day, ‘When you’re walking and you meet a sick person on the road, help him. Do not leave him’, so that was the first thing that came to my mind when I saw my friend on the ground,” het hy na die wedloop gesê.

Paulus gaan verder

5–8 Dink aan jouself soos Christus Jesus aan Homself gedink het. Hy het gelyke status met God gehad, maar het nie soveel van Homself gedink dat Hy aan die voordele van daardie status moes vashou, ongeag wat nie. Glad nie. Toe die tyd aanbreek, het Hy die voorregte van sy Godheid opsy gesit en die status van ‘n slaaf aangeneem, mens geword! Nadat Hy mens geword het, het Hy mens gebly. Dit was ‘n ongelooflike vernederende proses. Hy het nie spesiale voorregte geëis nie. In plaas daarvan het hy ‘n selflose, gehoorsame lewe gelei en daarna ‘n selflose, gehoorsame dood gesterf – en die ergste soort dood daaraan toe – ‘n kruisiging.

Paulus sê die geheim in die lewe is om aan jouself te dink soos Jesus aan Homself gedink het. Hy het gelyke status gehad met God. Hy was God.

Maar, Hy het ‘n droom gehad. Om die mense van hierdie wêreld met God te versoen. Daarom het Hy sy status as God opsy gesit. Hy het ‘n mens geword sonder al die voordele van sy Godheid.

Dit was ‘n ongelooflike vernederende proses. Maar, Hy het nie spesiale voorregte geëis nie. Hy het sy lewe volledig vir ander mense gegee. Hy het hulle gesond gemaak. Hy het hulle van God geleer. Hy het demone uit hulle gedryf.

En Hy was gehoorsaam. Alles wat God van Hom gevra het, het Hy gedoen. Tot aan die kruis gesterf vir ons sondes. Die ergste dood wat daar was.

Dit is die tipe lewe wat Jesus van elkeen van ons vra.

Om nie net die beste te wees ter wille van onsself en die voorregte wat dit vir ons gee nie. Maar, om die beste vir ander mense te doen. Soos Hy dit vir ons gedoen het.

En let op, dit is nie iets wat op jou af geforseer kan word nie. Jesus het dit uit sy eie gedoen. Hy het Homself opgeoffer ter wille van wat dit vir ons kan beteken.

Ek wil dit illustreer met die wonderlike storie van Jim en Elizabeth Elliot.

Jim het op sesjarige ouderdom tot bekering gekom. Hy was ook avontuurlustig. Sy ouers het hom aangemoedig om voluit “vir Christus te lewe”.

So gee die Here vir hom as jongman die roeping om in Ecuador die evangelie te gaan deel met die Quechua-volk. Veral die Huaorani,’n stam in Ecuador.

Al probleem was dat die stam baie gewelddadig en gevaarlik was vir buitestaanders. Hulle het nie vreemdelinge in hulle midde toegelaat nie.

Dit het Jim egter nie afgesit nie. Jim skryf in sy joernaal ‘n paar jaar tevore – 28 Oktober 1949 – dat om vir Jesus te werk belangriker was as sy lewe. “Want elkeen wat sy lewe red, sal dit verloor; maar elkeen wat sy lewe om my ontwil verloor, hy sal dit red.” (Lukas 9:24) Hy het geskryf: “Hy is geen dwaas wat gee wat hy nie kan hou nie, om te verkry wat hy nie kan verloor nie.”

Saam met vier ander sendelinge het hulle daarom in 1952 kontak gemaak met die Huaorani. Hulle het met vliegtuig oor die gebied gevlieg en ‘n mandjie afgegooi om geskenke vir die stam te gee.

Na ‘n paar maande van sulke kontakte het die sendelinge besluit om ‘n basis ‘n entjie van die Huaorani langs die Curaray-rivier te bou.

‘n Jaar later het hy met Elizabeth in 1953 getrou.

Vanaf die basis het die sendelinge verdere kontak gehad met ‘n klein groepie van die Huaorani. Hulle het selfs een nuuskierige Huaorani ‘n vliegtuigrit gegee. Hulle het hom “George” genoem (sy regte naam was Naenkiwi).

Hierdie vriendelike ontmoetings het hulle aangemoedig om vier jaar later die Huaorani in lewende lywe te probeer besoek. Dit het egter op ‘n tragedie uitgeloop. Op 8 Januarie 1956 is hulle vermoor deur van die krygers van die stam.

Sy vrou, Elizabeth was nou ‘n weduwee en hulle 10 maande oue dogtertjie Valerie vaderloos.

Ek wonder wat jy sou gedoen het as jy in Elizabeth se skoene was?

Wel, sy het die voorbeeld van Jesus gevolg. Sy het nie met geweld gereageer nie, maar besluit om voort te gaan met hulle uitreik na die Huaorani.

Elizabeth was baie goed in tale. Twee Huaorani-vroue het vir Elizabeth die Huao-taal aangeleer. Een van hulle, Dayuma, het twee jaar later onderhandel met die stam dat Elizabeth by die Huaorani kon gaan woon met haar driejarige dogter Valerie.

Van Oktober 1958 af het sy die Huaorani bedien met die evangelie sodat die hele stam uiteindelik die Here Jesus as Verlosser aanvaar het. Sy het ‘n geliefde deel van hulle samelewing geword. Die Huaorani het Elizabeth selfs die stamnaam Gikari gegee, Huao vir “Woodpecker”. Nogal ‘n goeie beskrywing van hoe sy volhard het om die evangelie vir hulle te bring.

Onthou, niemand het Elizabeth gedwing om hierdie offer te bring nie. Sy het self besluit om haar lewe op te offer, om ten spyte van die verlies van haar man, ten spyte van die gevaar vir haarself en haar dogter, uit te reik na hierdie stam. Omdat sy hulle wou bereik deur die evangelie.

En die Here het haar offer beloon. Elizabeth kan daarom oor haar lewe sê: Suffering is never for nothing. Jy kan na haar getuienis by hierdie skakel kyk waar sy daarop uitbrei:

https://www.youtube.com/watch?v=CDxFPGHk9Vw

Want, dit is wat God doen vir mense wat hulle lewens opoffer. Jim het wel met sy lewe geboet in die proses. Maar, die Here het selfs die dood gebruik om uiteindelik deur die werk van Elizabeht die stam te bereik.

Dit is presies wat ons lees verder aan in Filippense:

9–11 Vanweë hierdie gehoorsaamheid het God Hom hoog opgehef en Hom ver bo enige iemand of enigiets geëer, ooit, sodat alle geskape wesens in die hemel en op die aarde – selfs al lankal dood en begrawe – hierdie Jesus Christus sal aanbid en in lof sal uitroep dat Hy die Baas van alles is tot eer van God die Vader. (Peterson, The Message, vertaal).

Ek wil jou ook daarmee bemoedig – dit is die moeite werd om jou lewe vir ander op te offer. Dit is die moeite werd om te ly vir die evangelie.

Maar kom ons word prakties.

1. Kom ons praat oor emigrasie. Ek weet baie tieners en jongmense is ontsteld met wat in ons land gebeur. Die geweld. Die diskriminasie. Die verval. Die korrupsie.

Baie wil net so ver as moontlik wegkom en in ‘n land gaan bly waar alles werk en daar ‘n mens ‘n rustiger lewe vir jou mense kan skep.

Ja, en jy kan jouself so red en ‘n lewe vir jouself bou.

Maar, as jy regtig ‘n verskil wil maak aan hierdie lewe is daar eintlik nie ‘n beter plek om te bly as in Suid-Afrika nie. Trouens, ons bly in ‘n sekere sin reeds in “Ecuador”. Ons hoef nie nog na ‘n ander land te gaan om ‘n verskil te maak nie. Ons hoef net ons oë oop te maak en te kyk waar die Here ons hier wil gebruik.

2. Kom ons praat oor roeping. Die Here het jou geseën met baie goed. Geleerdheid. Gawes. Geleenthede. Jy kan dit gebruik om die sosiale leer te klim. Om baie geld te maak. Om in ‘n parallelle samelewing weg te kom van die armoede en uitdagings rondom ons.

Of jy kan besluit om soos Jesus nie vas te klou aan wat jy het nie, maar jou geleerdheid, gawes en geleenthede te gebruik om ander te help. Dit is wat Jesus gedoen het. Hy het sy Goddelike status gebruik om ons te kom dien. Selfs aan ‘n kruis vir ons sondes te sterf, sodat ons die gawe van die ewige lewe kan ontvang.

Jy kan dus besluit om jou lewe ook te gebruik om ander te dien.

Ek sluit af.

Soos Jesus hierdie besluit om mens te word self geneem het, is dit ‘n besluit wat jy ook self moet neem. Niemand kan jou dwing nie. En as iemand jou dwing, weet dat dit verkeerd is.

Maar, dit is wel ‘n besluit wat jy nie kan weg wens nie. Jy het ‘n voorbeeld in Jesus. In Jim. In Elizabeth. In mense soos oom Theo Havemann in ons gemeente wat sy lewe gee vir bosslapers en mense op straat om hulle te help om weer op hulle voete te kom.

Die keuse sal pynlik wees. Die keuse sal baie van jou vra. Wel, jou hele lewe. Maar, suffering is not for nothing. Dit het ‘n doel. ‘n Goddelike doel. Sê dus ja vir God se doel met jou lewe.

Gebed

Seën