Smag na die waarheid – 1 Petrus 2:1-3

Jaar van die Bybel 2020
Tema: Smag na die waarheid – 1 Petrus 2:1-3
Somerstrand 09:00 op Youtube 26 April 2020

KYK VIDEO HIER

Verwelkoming

Ek wonder hoe dit met jou gaan in die inperking?

Die Covid-19 virus het ons regtig tot stilstand geruk. Vir baie is daar spanning. Onsekerheid. Kommer oor die dag van môre. Dit is asof ‘n mens kontak verloor met die bekende. Die toekoms het skielik onseker geraak. Ons wag nou telkens vir die volgende berig van die regering oor hoe dinge gaan werk. En dit is volledig buite ons beheer.

Dit voel asof ‘n mens in ‘n sirkel begin loop. Soos miere wat die stroom volg. Wat hoop dat iemand daar voor weet waarheen hy of sy op pad is. Maar die hele tyd wonder of hulle inderdaad weet. Is inperking ‘n goeie ding? Of nie? Moet dit beëindig word? Of nie? En wat gaan met die ekonomie gebeur? Alle gemeentes in die ring begin praat oor kospakkies uitdeel. En dit is die puntjie van die ysberg.

Dit is baie maklik om negatief te raak. En om hoop te verloor. Ons het goeie nuus nodig.

Presies wat die eerste brief van Petrus vir ons gee. Verlede week het hy ons aangespoor om bly te wees, want ons het ‘n vaste toekoms, en ons het God se krag wat ons dra.

Hierdie week spoor Petrus ons aan om hierdie tyd te gebruik om met nuwe ywer ons te verbind aan die bron van krag wat God vir ons in die hand gegee het. Om te smag na die waarheid, die Woord van God.

Onthou die boek vir Bybelstudie oor 1 Petrus. Jy kan hoofstuk 2 hierdie week saam met ons lees en gebruik in jou kleingroep as julle oor die Internet bymekaar kom. Jy kan dit hier aflaai.

Ons raak ‘n al hoe groter gehoor! Daar is telkens meer as 300 kyke waardeur individue, egpare en gesinne inskakel. Ook van ander dele van die wêreld. Julle is welkom!

Ek is ook steeds besig om te bid oor ‘n reeks oor Openbaring. Bid saam met my daaroor en skryf aan my wat die Here op jou hart lê.

Verjaarsdae

Daar is nie iemand wat vandag verjaar nie, maar die lysie verskyn van dié wat die week verjaar. Baie geluk!

Noodfonds

Die nuusbrief is hierdie week na almal toe uitgestuur. Ons wil graag vra dat julle daartoe sal bydra sodat ons ‘n noodfonds kan opbou vir nood. Ons het reeds ‘n stewige bedrag ingesamel. Die bediening deur Theo en die bydraes vir die ACVV is ‘n deurlopende projek. Inligting bly op ons webtuiste.

As daar nood is, bel my. Ek sal dit diskreet en anoniem hanteer.

Ons wil julle ook herinner aan hulp vir julle werkers. Kom ons help mildelik selfs al kan hulle nie hulle normale werk verrig nie. Dit kan ‘n groot verskil aan families maak wat swaar trek.

Digitale hulp

Ons wil meer lidmate betrek by die Youtube erediens. Enigiemand wat met videos, musiek, grafika, bydraes, ensovoorts kan help. Ook vir Facebook, webtuiste, Instagram. Kontak vir my asb.

Pastoraat

‘n Hele aantal lidmate kontak my alreeds, veral met Whatsapps. Gebruik die geleentheid. Ek luister graag. Ek bid graag. En ek sal graag met Woordbediening vir jou wil ondersteun.

Nuuskanale

Onthou om in te skryf vir ons nuuskanale. Dit is die enigste manier waarop ons kontak kan hou. Skakels is almal op www.ngkerksomerstrand.co.za:

1. Skryf in vir NG Kerk Somerstrand se Mailchimp nuusbrief
2. Skryf in vir NG Kerk Somerstrand webtuiste nuusbrief
3. Sluit aan by NG Kerk Somerstrand se Facebook blad
4. Kyk ons eredienste op NG Kerk Somerstrand se Youtube kanaal

Like sommer nou die Youtube kanaal op jou skerm. Dit is die rooi subscribe knoppie.

Votum en seëngroet

In die woorde van Petrus aangepas vir Somerstrand:

“Aan die vreemdelinge van die Diaspora in Somerstrand, hulle wat uitverkies is volgens die voorkennis van God die Vader om deur die heiligmaking van die Gees gehoorsaam te wees en met die bloed van Jesus Christus besprinkel te word: Mag genade en vrede in oorvloed aan julle geskenk word! (1 Pet 1:1-2)

Loflied

Halleluja! U is heilig – koor en solis Elsje Nelson

Kindertyd

Gebed

Skriflesing en prediking

‘n Miermeul

Daar is ‘n verstommende ding in die insektewêreld. Die fenomeen van ‘n Miermeul.[1]

Daar is ‘n sekere soort blinde mier wat geprogrammeer is om die mier voor hulle te volg. Dit werk met hulle reuksintuig. Hulle ruik die chemiese feromone van die mier wat voorloop. Hulle volg daarom die miere se feromone voor hulle. So kom hulle by die kos uit en weer terug by die nes.

Dit werk normaalweg goed, want miere is redelik slim en iemand wat voor loop, sal sekerlik weet waarheen ons almal gaan, nie waar nie?

Maar soms sal diegene wat voor loop, rigting verloor, en dan begin rondloop, op soek na ‘n ander mier om te volg. … en nog een, en nog een sal dit doen … en kort voor lank begin al die miere heen en weer loop, oortuig daarvan dat hulle in die regte rigting loop … maar almal volg mekaar bloot in ‘n groot sirkel, die Miermeul.

Die resultaat is katastrofies. Hulle sterf uiteindelik almal van uitputting. William Beebe het so ‘n miermeul in 1921 waargeneem wat 370 m in omtrek was. So groot soos ‘n 400 meter atletiekbaan. Dit het elke mier 2,5 uur geneem om een keer in die rondte te stap. ‘n Bietjie langer as die 43,03 sekondes wêreldrekord van Wayde van Niekerk!

Baie moeite, baie energie, baie aksie, maar heeltemal tevergeefs. Hulle het hulle dood geloop. Om en om en om en om.

‘n Mallemeule

Ons neem hierdie manier van werk waar in die Westerse samelewing waar daar nie meer met absolute waarhede gewerk word nie. Elkeen het sy eie idee van wat goed is en wat nie. Die waarheid word nie meer gemeet aan een of ander Bybelse standaard nie. Dit word gemeet aan wat aanvaarbaar is in die wêreld en wat nie. Wat goedgekeur word en wat nie.

En ons is baie keer soos miere wat dink dat die een wat voor loop, moet vir seker weet wat hy of sy doen. En ons loop agter hulle aan, en kort voor lank begin ons almal agter die nuutste leier aanloop, agter die nuutste idee aan, totdat daar weer iemand anders kom met nog ‘n beter idee.

Dit is nie lank nie, of ons sal agterkom, as ons eerlik is, en ons tyd kry om te dink waarmee ons na alles besig is, soos nou in die tyd van die Corona-virus moontlik is … dat ons die hele tyd in ‘n sirkel loop. ‘n Mense meul. ‘n Mallemeule.

Goeie nuus

Soos Jaco verlede week in die kindertyd gepraat het oor die goeie nuus in die Bybel teenoor die slegte nuus in die koerante, só wil ek vandag die goeie nuus uit die Bybel verkondig.

Die goeie nuus is dat daar ‘n absolute waarheid is. Dit is die Woord van God. Wat ons help om die mallemeule van die wêreld se wysheid te ontsnap.

‘n GPS

En dit bring my by ‘n ander beeld wat ons help om die goeie nuus van die Bybel te begryp. Dit is die beeld van ‘n GPS.

Die GPS werk met 30 satelliete wat so 20 000 km hoog om die aarde wentel. Dit het ‘n uiters akkurate kaart van elke stukkie van hierdie aarde. En as jy ‘n goeie ontvangstoestel het, dan tel die GPS jou beweging op en kan dit vir jou tot op vyf meter akkurate inligting gee van jou bewegings.

Die wonder is, GPS werk altyd en oral. Jy moet net jou ontvangstoestel aansit, dan sal jy nie in ‘n sirkel ry nie. Jy sal by jou bestemming kom. Selfs as jy afdwaal, dan “recalculate” of “herbereken” die GPS om jou steeds by jou bestemming uit te bring.

Die Bybel is soos ‘n GPS

Die waarheid van die Bybel is soos ‘n GPS wat presies weet waar ons is, en waar ons moet uitkom. Want, soos ‘n GPS, het die Bybel ‘n uiters akkurate maatstaf van wie ons is en waarheen ons op pad is. Nog akkurater as ‘n GPS wat tot op vyf meter akkuraat is.

Trouens, die Bybel is soos ‘n swaard wat indring tot die skeiding van siel en gees en van gewrigte en murg, en is ’n beoordelaar van die oorlegginge en gedagtes van die hart (Hebr 4:12). Ons praat van ‘n kaart wat tot op ‘n nie-materiële vlak akkuraat is!

Die Bybel kan ons dus op ‘n uiters akkurate manier begelei om by ons bestemming te kom.

En wanneer ons afdwaal, kan dit “recalculate” om ons afdraaipaaie in ag te neem, en ons steeds by ons bestemming uit te bring.

‘n GPS kan gekortwiek word

Daar is natuurlik dinge wat die GPS se begeleiding kan kortwiek:

• As jy jou ontvangstoestel nie aansit nie, kan die GPS nie vir jou begelei nie.
• As daar ander seine is wat sterker is, kan jy soortgelyk van die wal in die sloot gelei word.
• As jy die raad van die GPS ignoreer, willens en wetens, dan sal jy uiteraard ook nie by jou bestemming uitkom nie.

Dit is die beeld waarby ek wil aansluit as ons 1 Petrus 2:1-3 gaan lees. Onthou dat dit deel van ‘n Bybelstudie is waarvoor ek vir julle ‘n boek gegee het wat julle steeds kan aflaai. Die idee is dat ons hierdie week op 1 Petrus 2 fokus. Laai dit hier af.

Die lewende steen en ’n uitverkore volk

^2:1Hou op met alle kwaad en alle bedrog en geveinsdheid en jaloesie en alle kwaadpratery, ²en smag soos pasgebore babas na die geestelike, suiwer melk sodat julle daardeur kan groei en gered word ³omdat julle geproe het dat die Here goed is. (ASV)

Die kaart is duidelik

Die goeie nuus van hoofstuk 1 was dat God reeds vooraf goed geweet wat Hy met ons gaan doen hierna! Hy berei ons voor vir die lewe saam met Hom. Vir ewig. Die roete daarheen is vas. Die kaart is vir ons gegee. Dit is God se Woord.

Die kaart is duidelik. Dit is akkuraat in alle omstandighede en in alle lewensituasies. Om ons na God se bestemming te kan begelei.

Dit is die bron van ons blydskap. Die ewigheid wat vir ons wag. Die feit dat ons dit binnekort kan verwag. Dat die swaarkry in hierdie lewe ‘n kort tyd sal duur weens God se krag.

Dit maak die volharding in swaarkry die moeite werd. Dit moedig jou aan om onverskrokke heiligheid in alles in jou persoonlike lewe na te jaag. Dit is God se geskenk aan jou. Sy krag inspireer jou om onophoudelik en van harte lief te hê.

Jou ontvangstoestel moet aangeskakel wees

Maar, die Bybel se kaart kan so duidelik wees as wat dit wil. As jy nie jou ontvangstoestel aansit nie, kan die Here jou op geen manier begelei nie. Sal jy nooit hoor: “Draai links”, of “Draai regs” nie. Sal jy nooit die boodskap hoor: “Recalculate” of “Herbereken”. Jy sal salig voort gaan in die idee dat jy op die regte pad is. Almal sê dan dit is reg.

En al die tyd word jy vasgevang in die mallemeule van hierdie wêreld. Loop jy ook al hoe meer in die sirkel van hierdie wêreld. Om en om en om tot jy sal neerval van die sinloosheid daarvan waarvan die einde die ewige dood is.

Hoe skakel ek dit aan?

Jy lees die Bybel om te luister. Jy lees die Bybel om dit te leef. Dit is na alles die missie van ons gemeente: Luister – Leef.

Wat sê Petrus vir ons in hierdie drie verse?

Twee goed: Hou op – Smag na.

1. “Hou op met alle kwaad en alle bedrog en geveinsdheid en jaloesie en alle kwaadpratery.”

Dit is dinge wat jou eie lewe benadeel, sowel as en nog meer belangrik, alles wat ander se lewe kan benadeel – alle kwaad, alle bedrog, geveinsdheid of skynheiligheid, jaloesie  of naywer en alle kwaadpratery of geskinder.

Dit is die dinge wat ware lewensgemeenskap met mekaar onmoontlik maak. Dit keer dat jy jou plek in die liggaam van Christus vind waar hulle tot ‘n seën vir jou kan wees, en jy tot ‘n seën vir hulle kan wees.

Dit is die dinge wat die GPS van God se Woord in jou lewe belemmer. Dit verwar jou ontvangstoestel, dit dwarsboom die sein van die GPS, en laat jou op afdraaipaaie loop, jou eie kop volg.

En hoe meer dié dinge in jou lewe begin oorneem, hoe slegter kan jy God se stem hoor, en hoe moeiliker kan jy aan Hom gehoorsaam word.

Petrus noem hier vyf dinge wat alreeds in die wet verbied is:

• Alle kwaad (kakia) is ‘n oortreding van die sesde gebod – dit is om in vyandskap met ander te lewe, om hulle te wil seermaak, om hulle te benadeel (vgl Ef 4:21).
• Alle bedrog (dolos) is ‘n oortreding van die agste en die negende gebod – dit is om deur valse getuienis te lewer teen jou naaste, om hom of haar te bedrieg of te mislei, van hulle te steel, hulle te benadeel (vgl Rom 3:13)
• Geveindsheid (hupokrisis) of skynheiligheid is ook ‘n oortreding van die negende gebod – om jou anders voor te doen as wat jy werklik is, om jou ware bedoelinge en motiverings weg te steek, om nie oop en eerlik te leef nie.
• Jaloesie (phthonos) of naywer is ‘n oortreding van die tiende gebod – om iets van iemand anders te begeer, om iemand anders se gewaande voordeel in die lewe te begeer vir jouself of enigiets wat jou naaste s’n is (vgl Fil 1:15).
• Kwaadpratery (katalalia) of geskinder of gelaster is ook ‘n oortreding van die negende gebod – om valshede oor iemand anders te versprei, om iemand anders se naam in diskrediet te bring, om iemand in ‘n slegte lig te stel by ander, gewoonlik sonder dat die persoon direk daarmee gekonfronteer word.

Maar die fokus op wat jy moet aflê, kan net werk as jy tegelykertyd fokus op dít wat jy moet opneem, dít waarop jy moet fokus. Ons groei nie deur wat ons aflê nie. Ons groei deur wat ons inneem.

En dan noem Petrus die een ding waarop jy bó alles moet konsentreer:

2. “smag soos pasgebore babas na die geestelike, suiwer melk”

Petrus gebruik die beeld van ‘n pasgebore babatjie wat smag na sy ma se melk. Dit is die beeld wat ons moet inspireer om niks in die weg te laat staan om die Here se stem in die Bybel te hoor en ons daarin te verlustig nie.

Ons moet met absolute passievolle verlange fokus op die “suiwer geestelike melk” van die Woord. In die Grieks staan dit letterlik dat ons moet smag na die: “suiwer melk van die woord”.

Want, dit is die onvervalsde, onveranderlike en onvervangbare begeleiding wat ons nodig het op ons pad na ons ewige bestemming. Die Woord van God.

Die Woord van God kom op drie maniere na ons toe.

• Daar is die “vleesgeworde Woord”, die Here Jesus self wat die Woord van God is (Joh 1:1-14).
• Daar is die “ingeplante woord” wat die Gees op ons harte skryf (Jak. 1:21; Jer 31:31; Hebr 8:10; vgl ook Rom 2:15 wat duidelik wys dat God Homself aan alle mense in hulle hart openbaar).
• Daar is die “geskrewe Woord” van God, die Bybel, wat die Gees vir ons laat opteken het.

Die geskrewe Woord is die maatstaf

Die geskrewe Woord is die konkrete maatstaf waaraan ons die stem van God kan meet (NGB 3). Die maatstaf vir die Woord van God is nie ons ervaring daarvan in ons binneste nie. God se Woord is nie in ons lyf nie. God se Woord is nie in die gemeenskap nie. Die maatstaf vir die Woord van God is nie wat ander mense vir ons leer daaroor nie. Selfs nie die kerk nie.

Die enigste maatstaf vir die Woord van God is wat geskrywe staan, soos Jesus dit vir ons geleer het in sy stryd met die Bose (Matt 4: “daar staan geskrywe” en in sy laaste onderwysing aan die dissipels (Luk 24:44 – waar Hy “hulle verstand open om die Skrifte te verstaan”). Dit is daardie geskrewe Woord wat vir ons insig gee, wat ons aan die beloftes van God laat vasgryp, wat vrede in ons hart bring, wat ons motiveer om God se opdragte te gehoorsaam.

Hoekom?

Want die geskrewe Woord is die enigste bron waardeur ons: “kan groei en gered word,” sê Petrus. Ons groei nie deur boeke en preke nie. Dit het sy waarde, maar kan ons ook van die wal in die sloot help. Ons groei nie deur leiers en gurus nie. Dit is soms nog gevaarliker, want die raad is baie keer op geen manier begrond op die Bybel nie.

Ons groei deur die Bybel en die suiwer geestelike melk daarvan, soos die Gees dit in ons lewens aan die werk sit. Soos ons na die stem van God daarin luister, so begin ons al hoe meer leef soos Hy dit van ons verwag. Op pad na die ewigheid.

As jy eers een keer die waarde van die Bybel as die lewende stem van die Here ontdek het, sal jy eintlik nie meer anders kan om meer en meer daarna te smag nie, omdat jy daardeur: “geproe het dat die Here goed is.” Sê Petrus.

Prakties

En daar is soveel maniere waarop jy hierdie suiwer melk kan drink.

• Daar is die Eenjaar Bybelleesprogramme in ons gemeente.
• Daar is die 1 Petrus boek wat jy in hierdie tyd kan gebruik.
• Daar is die Bybelskool wat jy die hele Bybel hoofstuk vir hoofstuk kan deurwerk.

Dit vra van jou net om ‘n tyd vas te maak, ‘n Bybelleesprogram te kies, ‘n joernaal om insigte, beloftes en opdragte neer te skryf, en die Bybel te begin lees as God se stem aan jou. En dit help baie om dit dan met iemand naby aan jou deur te gesels. Jou vrou of man. Jou familie. Jou geestelike vriende.

Ek vind dat my baie help om te lees vir insigte, beloftes en opdragte. Dit help my op prakties te raak. En dit verander my lewe. Soos ek daaraan gehoorsaam raak, verander my lewe, proe ook ek dat die Here goed is.

Hierdie tyd van inperking gaan uiteindelik verbygaan. Moenie die waarde hiervan ignoreer nie.

• Hou op met die dinge wat jou eie lewe en ander s’n uit mekaar ruk.
• En smag soos pasgebore babas na die geestelike, suiwer melk van God se Woord.

Die Bybel is die GPS wat jou uit die kringloop van die wêreldse Mallemeule sal red.

Gebed

Dankoffer

EFT en Snapscan

Bydraes

Slotlied

Die wonder van die Bybel is dat dit vir ons aan Jesus verbind. Hy stap dan voor ons sodat ons die Mallemeule van hierdie wêreld kan ontsnap. Kom ons sing daarvan.

Lied 505:1-4 – Jesus, U gaan voor – koor

Seën

Ek sluit met die seën van die Here.

“Die Here seën jou en beskerm jou.

Die Here se gesig skyn oor jou en Hy is jou genadig.

Die Here lig sy gesig op na jou en Hy gee aan jou vrede.” (Num 6:24-26)

Respons

En die gemeente sê: Amen!

Snapscan

Dankiesê

[1] Die beeld van die miermeul kom van rabbi Jonathan Sacks in The Times  van 4 Februarie 2006. Lees meer oor die navorsing van Frédéric Delsuc daaroor: https://www.ncbi.nlm.nih.gov/pmc/articles/PMC261877/