Vertrou die Helper – Johannes 14-16

Hoe dink jy oor die Heilige Gees?

Ek onthou hoe ek direk na my bekering ‘n boekie gelees het, iets soos die Oorvloedige Lewe. Dit het gegaan oor die vervulling met die Heilige Gees. Ek onthou goed as jong tiener die ervaring van geluk en vrede wat ek gehad het in my aanvanklike bewuswording van die Heilige Gees.

Dit is hoe baie mense die Heilige Gees ervaar. Sommige beskryf vervulling as ‘n stroom van onuitputlike liefde. Ander as ‘n tot rus kom in jouself. Ander as ‘n vrede wat jou verstand te bowe gaan.

Tog, het ek later van ander groot manne en vroue se ervaringe met die Heilige Gees gelees wat my laat wonder het, mis ek nie iets nie? Veral in die boek They Found the Secret: Twenty Lives That Reveal a Touch of Eternity.

Daarin is die wonderlike verhale van onder andere Hudson Taylor, Charles Finney, Dwight Moody, Andrew Murray, en Eugenia Price. Hulle verhale het my geïnspireer, maar ook laat wonder. Mis ek nie iets nie, want my ervaring was baie keer so ‘n bietjie op en af. Soms baie bewus. Soms ‘n bietjie minder.

Miskien het jy ook al gewonder?

Deur die jare het ek ook ervarings gesien wat my heeltemal teen die bors stuit. Die Toronto Blessing van mense wat in ‘n beswyming gaan, aan die hardloop gaan, weird en selfs skokkende dinge doen. Kyk maar net na die videos van mense soos Benny Hinn waar mense platgedruk word en aan die bewe gaan, soms heeltemal onbeheerbaar.

En dan wonder ‘n mens wat is die waarheid?

Wie is die Heilige Gees? Hoe werk vervulling? Wat kan jy verwag?

Begin by God se Openbaring

Dit is altyd belangrik om by die openbaring wat God vir ons gegee het, te begin. Om te begin met wat God vir ons in sy Woord openbaar het. Dan voorkom ‘n mens dat jy mislei word.

Wie is die Heilige Gees? Wat doen Hy? Wat leer ons in die Bybel?

Daar is drie aspekte van die Gees se werk wat ek wil uitlig in die OT. Daar is uiteraard meer.

Download the English Translation: Trust the Helper – John 14

HIER VOLG DIE HELE EREDIENS:

Wie is God?

Tema: Vertrou die Helper

Somerstrand 09:00 21 Julie 2019

Verwelkoming

Aankondigings

Baie dankie aan Erika Bothma wat ons vanoggend begelei. Albert gee in Natal kerkmusiek kursusse vir orreliste. Julle sal maar moet sit aan die einde vir die Orrel naspel. Dit is die werk van Händel: The Arrival of the Queen of Sheba.

Toetrede

Die kerk is die liggaam van Christus. God het ons verbind aan Jesus Christus sodat die Gees in ons as sy liggaam kan woon. Die kerk werk die beste as elkeen van ons ingeskakel is in ‘n gemeenskap van gelowiges sodat ons as die liggaam van Christus kan funksioneer. Elkeen moet ‘n plek hê. Elkeen moet sy rol speel. Elkeen is verantwoordelik om saam te werk dat die liggaam van Christus sigbaar word in hierdie lewe.

Vanoggend fokus ek op die Heilige Gees, die Helper. Kom ons nader tot Hom om teenwoordig te wees hier en ons aan mekaar as liggaam te verbind.

Lied 166:1-3 Kom, Heil’ge Gees, wees U self teenwoordig hier by ons – sit

Votum en Seëngroet

Lofsang en aanbidding

Lied 450:1-2 Vader, Seun, Heil’ge Gees, hoe sal ons u heerlikheid kan verwoord – staan

Vonkk 211:1-3 Heilige Gees, U, die Trooster, tree vir ons in by die Vader – staan

Toewyding

Vonkk 226:1 Neem, Heer, my hart en reinig my. U laat u Gees hier binne-in my bly – sit (speel een keer deur)

Kindertyd

Verjaarsdae.

Weet julle wat is elektrisiteit?

Het julle geweet dat daar elektrisiteit in ‘n donderwolk is? Ek het so ‘n tyd terug by my kinders gekuier. Daar was baie donderweer. Skielik was daar ‘n groot slag. ‘n Boom by die huis langs aan is in die middel deur geslaan. Daardie weerlig het groot krag!

Daar in Johannesburg het die mense weerligafleiers. Weet julle wat is dit? Dit is ‘n paal van staal wat hoog bo die huis uitsteek. As die weerlig slaan, dan lei die paal die elektrisiteit af tot in die grond, dat dit ‘n mens nie kan seermaak nie. Die weerlig is net te sterk.

Maar, ons het elektrisiteit nodig. Waarvoor alles?

Maar ons kan nie wag vir die donderweer nie, nê?

Daarom het mense groot kragsentrales gemaak om elektrisiteit te maak. Sodat ons dit by ons huise kan gebruik. Maar die kragsentrales maak baie rook. En dit laat ‘n mens hoes.

So, die mense het ‘n plan gemaak. Hulle gebruik nou ook windlaaiers. Weet julle wat dit is? Het julle al windlaaiers gesien? Ja, hier by Jeffreysbaai, nê.

Nou kan ons yskaste werk. En die stoof. En die ligte in die aand. Want ons het elektrisiteit. Ons het krag om al daardie dinge te laat werk.

Wat dink julle hou ons as Christene aan die gang?

Dit is die krag van God. Hy het alles gemaak wat ons kan sien. Die sterre. Die son. Die maan. Die aarde. Sy krag is so groot dat ons dit nie eens vir ons kan voorstel nie.

Maar die wonderlikste is dat God ook vir jou gemaak het. En Hy gee sy krag vir ons. Maar, nie alles in een slag soos met die weerlig nie. Nee, Hy het ‘n boek vir ons gegee, die Bybel, wat ons leer hoe ons moet lewe. Ons kan stukkie vir stukkie daarin lees en krag kry vir elke dag.

En Hy luister as ons bid. Want Hy het ook sy Gees gegee wat in ons lewe. Hy is ons groot Helper. Hy werk diep binne in ons hart sodat ons krag het om vir Jesus te lewe.

Dit is darem wonderlik. Kom ons sing  daarvan.

VONKK 267:1-3 God is so goed / Hy sorg vir my /God hoor my bid – sit

Vrydag is dit weer Milo-klub

Alle graad 1-7’s is welkom. 17:00-18:00. In die Ark. Ek en tannie Lynette, Elizke Crouse en Roelof Roodt gaan daar wees om dit ‘n heerlike byeenkoms te maak.

Die tema is Rut-teltit. Het julle al gehoor van ritteltit? Wat is dit? (rillings, siddering, bewerasie).

Kom Vrydag om te hoor waaroor ons RUT-teltit gaan.

Dankoffers

Voorbidding

Hugo Wolmarans laat weet dat hy by ‘n byeenkoms was, “Explore”. Dit is waar nuwe sendelinge kan sien waaroor Pioniers gaan. Daar is vanjaar sowat 300 nuwe werkers wat gereed is om na die onbereikte mensegroepe van die wêreld te gaan. Hy vra vir gebed vir die Midde-Ooste – ek hou die presiese versoek eers vertroulik – rondom publieke byeenkomste vir Christene wat verbied word. Hulle wil graag godsdiensvryheid hê om die evangelie te kan verkondig. Bid dat die Here die inisiatiewe wat tans gemaak word sal seën, want dit sal ‘n beduidende impak op die Evangelie in hierdie baie geslote deel van die wêreld maak.

Volgende week is Sending-Sondag. Gerrit en Sonja Brink van Nederland. Detail in die blaadjie. Oggend en aand.

Skriflesing en prediking

Vertrou die Helper – Johannes 14:15-26; 16:8-13

Hoe dink jy oor die Heilige Gees?

Ek onthou hoe ek direk na my bekering ‘n boekie gelees het, iets soos die Oorvloedige Lewe. Dit het gegaan oor die vervulling met die Heilige Gees. Ek onthou goed as jong tiener die ervaring van geluk en vrede wat ek gehad het in my aanvanklike bewuswording van die Heilige Gees.

Dit is hoe baie mense die Heilige Gees ervaar. Sommige beskryf vervulling as ‘n stroom van onuitputlike liefde. Ander as ‘n tot rus kom in jouself. Ander as ‘n vrede wat jou verstand te bowe gaan.

Tog, het ek later van ander groot manne en vroue se ervaringe met die Heilige Gees gelees wat my laat wonder het, mis ek nie iets nie? Veral in die boek They Found the Secret: Twenty Lives That Reveal a Touch of Eternity.

Daarin is die wonderlike verhale van onder andere Hudson Taylor, Charles Finney, Dwight Moody, Andrew Murray, en Eugenia Price. Hulle verhale het my geïnspireer, maar ook laat wonder. Mis ek nie iets nie, want my ervaring was baie keer so ‘n bietjie op en af. Soms baie bewus. Soms ‘n bietjie minder.

Miskien het jy ook al gewonder?

Deur die jare het ek ook ervarings gesien wat my heeltemal teen die bors stuit. Die Toronto Blessing van mense wat in ‘n beswyming gaan, aan die hardloop gaan, weird en selfs skokkende dinge doen. Kyk maar net na die videos van mense soos Benny Hinn waar mense platgedruk word en aan die bewe gaan, soms heeltemal onbeheerbaar.

En dan wonder ‘n mens wat is die waarheid?

Wie is die Heilige Gees? Hoe werk vervulling? Wat kan jy verwag?

Begin by God se Openbaring

Dit is altyd belangrik om by die openbaring wat God vir ons gegee het, te begin. Om te begin met wat God vir ons in sy Woord openbaar het. Dan voorkom ‘n mens dat jy mislei word.

Wie is die Heilige Gees? Wat doen Hy? Wat leer ons in die Bybel?

Daar is drie aspekte van die Gees se werk wat ek wil uitlig in die OT. Daar is uiteraard meer.

1. Die Gees bring orde in chaos

Die Gees is en was betrokke by die skepping. Hy bring orde in chaos – Genesis 1. Dit is waarom jy in die natuur kan stap en in jou verwondering daaroor iets van die Gees kan ervaar. Dit is waarom jy die Gees se werking kan ervaar as dinge uitwerk in die lewe, as daar orde in chaos kom. As daar nuwe lewe in die dooie bene kom (Eseg 37). Dié ervarings is ‘n primêre getuienis van die werk van die Heilige Gees.

Dit is ook ‘n maatstaf vir die ervarings wat jy sien wat eintlik lyk asof dit eerder chaos as orde in mense se lewens bring.

2. Die Gees inspireer kuns en wysheid

Die Gees inspireer skoonheid en kuns. Hy is die begin van enigiets wat mooi en verheffend is. In Eksodus 31 vervul die Gees vir Besaleël: “met wysheid en verstand en kennis en bekwaamheid vir allerhande werk, om kunstige planne uit te dink, om dit uit te voer in goud en silwer en koper, en deur snywerk in stene wat ingelê moet word, en deur houtsnywerk; om werksaam te wees in allerhande werk.”

Ek was die week by Leon van Rensburg en het my verkyk aan die houtwerk wat hy doen. So kunstig en deeglik. Ware vakmanskap.

So ook ‘n uitstalling van my dogter se kunswerk in die Kaap. Dit is inspirerend om die fyn waarneming en uitnemende uitvoering daarvan te sien.

Selfs die verfwerk by my huis, wat Leon Coetsee gratis gedoen het, was besonder netjies gedoen.

Dit is alles die Gees se werk, sê die Skrif, want dit is Hy wat besig is: “in die hart van elkeen wat kunsvaardig is”. Dit is die Gees wat die wysheid gee in enige werk wat ‘n bietjie meer as die normale vra (Eks 31:3-6).

3. Die Gees gee moed in konflik

Die Gees gee moed in konflik. ‘n Mens kan maar net weer die verhaal van Gideon lees in Rigters 6 om die werk van die Gees te waardeer. In vers 34 sê die skrywer: “En die Gees van die Here het Gideon vervul … en met net 300 mense kon Gideon die Midianiete verwoes wat in die laagte gelê het: “soos sprinkane in menigte, en hulle kamele was ontelbaar soos die sand aan die seestrand” (Rigt 7:12).

Daar is talle verhale in die Bybel wat hierdie waarheid onderstreep. Die Gees kan werk met ‘n enkel persoon wat teen ‘n oormag staan.

Dink aan Elia en Elisa, die eerste twee profete wat opgestaan het teen die afvalligheid van die konings en die volk (1 en 2 Konings). Dink aan Jesaja, Jeremia en Esegiël wat hulle profesieë gelewer het deur die Gees wat tot in detail uitgekom het in die lewe van nie net die volk nie, maar ook in die verloop van die geskiedenis van hierdie wêreld.

Onderskeid tussen OT en NT

Dieselfde drie kenmerke van die Heilige Gees se werk kan in die NT raakgesien word.

Daar is egter tog ‘n onderskeid, veral ten opsigte van die tydsduur van die ervarings.

In die OT was mense se ervaring van die Heilige Gees altyd sporadies, vir ‘n spesifiek tyd of taak, en persoonsgebonde.

Dit alles verander met die koms van Jesus en uiteindelik Pinksterdag.

  • Dit begin by Maria wat swanger word deur die Heilige Gees – Matt 1:18.
  • Dit het ‘n eerste effek op haar niggie, Elisabet, wat vervul word deur die Heilige Gees as sy in aanraking met Jesus kom, selfs toe Hy nog ‘n ongebore kind was – Luk 1:41.
  • Dit kring uit na haar man, Sagaria, wat vervul word met die Heilige Gees en uitbars in ‘n loflied – Luk 1:67.
  • Dit kring uit na sy seun, Johannes die Doper, wat Jesus aandui as die een wat ook sal doop met die Heilige Gees – Matt 3:11.
  • En die wonder gebeur, die Heilige Gees daal neer op Jesus met sy doop – Luk 3:22 – sodat Hy die Gees aan elkeen wat in Hom glo, kan gee.

Van dié punt af is Jesus die Een wat die Heilige Gees in volle mate besit en uitdeel. Dit is Hy wat die Gees stuur om in ons te kom woon en sy werk voort te sit in ons.

Dit is dan ook die vierde en, wat ons betref, die belangrikste werk van die Heilige Gees, die werk wat Hy doen in elke gelowige, die een werk van die Heilige Gees wat in die NT bykom.

4. Die Gees maak ons harte rein en heilig

Die Heilige Gees werk in ons hart. Want Hy woon in ons. Die Gees maak ons hart rein en heilig, soos die Gees heilig is. Die Gees bring orde in ons chaos. Hy inspireer steeds skoonheid en wysheid en moedig ons aan om ons gedagtes te fokus op die mooie en verheffende (Fil 4:8). Hy gee steeds vir ons moed in konflik soos die talle verhale in Handelinge vir ons vertel.

Maar, waar Dawid nog in Psalm 51:12-13 gebid het: “Moenie u Heilige Gees van my wegneem nie,” hoef ons nooit weer bekommerd daaroor te wees dat Hy ons sal verlaat nie, want deur die Gees is ons verseël tot die dag van ons verlossing (Ef 4:30).

Hoe weet ons dit? Omdat Paulus ons verseker: “Die Gees self getuig saam met ons gees dat ons kinders van God is.” (Rom 8:16).

Dit is wat Jesus voorspel het. Dat die Heilige Gees gegee sal word aan elkeen wat na in Hom glo. Strome lewende water sal uit hulle binneste vloei, het Hy belowe (Joh 7:37-39).

Daardie woord “binneste” is die sleutel om die werk van die Heilige Gees te verstaan. Dit is waar die Gees sy grootste werk doen.

Vertrou die Heilige Gees

Die Heilige Gees nooi jou vandag uit om Hom te vertrou vir die werk wat Hy in jou hart doen.

Ek wil twee gedeeltes lees uit Jesus se laaste gesprek met sy dissipels vóór sy kruisiging waarin Hy uitbrei oor die werk van die Heilige Gees. Johannes 14-16. Ek lees sodat jy dit ter harte kan neem en Hom in jou lewe kan vertrou.

Kom ons lees ‘n paar verse uit Johannes 14:15-26:

15 As julle My liefhet, sal julle my opdragte gehoorsaam. 16 En Ek sal die Vader vra en Hy sal vir julle ‘n ander Parakleet gee sodat Hy vir ewig by julle kan wees. 17 Hy is die Gees van die waarheid wat die wêreld nie kan ontvang nie, omdat die wêreld Hom nie sien nie en ook nie ken nie. Julle ken Hom egter, omdat Hy by julle bly en in julle sal wees. 18 Ek sal julle nie as weeskinders agterlaat nie; Ek kom weer na julle toe. 19 Nog ‘n kort tydjie, en die wêreld sien My nie meer nie; maar julle sien My, omdat Ek leef en julle sal leef. 20 Op daardie dag sal julle weet: Ek is in my Vader en julle in My en Ek in julle. 21 Wie my opdragte het en dit gehoorsaam, hy is die een wat My liefhet. En wie My liefhet, my Vader sal hom liefhê, en Ek sal hom liefhê en Myself aan hom bekend maak … 23As iemand My liefhet, sal hy ter harte neem wat Ek sê, en my Vader sal hom liefhê en Ons sal na hom toe kom en by hom woon.” (Joh 14:15-23 – BDV).

Die Heilige Gees woon in ons

Dit is die eerste ding wat jy moet weet van die Heilige Gees. Hy woon in jou. Dit is een van die wonderlikste beloftes in die Bybel. Dat God in ons kom woon. Dat Hy ons liggaam sy tempel maak. Dat Hy ons van binne-af verlos en heilig, ons begelei en stuur.

Dit is die grootste voorreg wat ons het. Daar is niks wat daarby kom nie.

Neem ‘n oomblik om net dié implikasies hiervan vir jouself te deurdink. As jy die Here Jesus liefhet, as jy sy opdragte gehoorsaam, as jy dit ter harte neem, dan woon God in jou. God is nou in jou. Trouens, God sal ewig by jou wees.

En dan gaan Jesus aan om die inwoning van die Gees nog meer spesifiek uit te spel:

26 Die Parakleet, die Heilige Gees, wat die Vader in my Naam sal stuur, Hy sal julle in alles onderrig en julle aan alles herinner wat Ek vir julle gesê het.” (Joh 14:26 – BDV).

Soos ek sê, dit is die grootste voorreg wat ons het. Daar is niks wat daarby kom nie. Ons moet gereeld daaroor nadink, en die betekenis daarvan vir onsself toeëien.

Wat beteken dit prakties vir jou?

Twee goed:

1. Die Heilige Gees is ‘n Helper

Die eerste aspek van die Gees se werk in hierdie gedeelte is dat Hy kom om ons te help. Die Heilige Gees is ‘n Helper. Soos Hy dit by die Skepping gedoen het om orde uit chaos te skep; soos Hy dit by Besaleël gedoen het om kunswerke te skep; soos Hy dit gedoen het by Gideon om Hom die oorwinning te laat behaal; Só doen Hy dit vir jou.

Die Heilige Gees word hier met die Griekse woord paraklêtos beskryf. Dit is Iemand wat geroep is om bystand te verleen — ‘n voorspraak, ‘n pleitbesorger, ‘n trooster, ‘n helper, ‘n bemoediger, ‘n bemiddelaar.

Dit is die eerste praktiese waarheid wat ons van die Gees moet verstaan en van Hom kan verwag, Hom voor moet vertrou. Die Gees is vir ons gegee as ‘n Helper. Soos Eva vir Adam gegee is as helper, só is die Gees vir elkeen wat in Jesus glo as Helper gegee.

Dit is ‘n aspek van die Gees waarop ons kan staatmaak. Sy hulp is ‘n geskenk van God waarop ons kan reken. In enige situasie waar ons bystand nodig het. In konflik. In uitdagings. In hartseer. In moeilikheid.

Die Heilige Gees is ‘n Helper. Hy is ons Helper. Dit is die eerste groot bate van ons verhouding met die Here Jesus.

Waarmee help Hy ons?

Dit hoor ons in die tweede gedeelte in hierdie gesprekke van Jesus, Johannes 16:8-13:

8 En wanneer Hy kom, sal Hy die wêreld oortuig van sonde en van geregtigheid en van oordeel: 9 “Van sonde, omdat hulle nie in My glo nie;  10 van geregtigheid, omdat Ek na die Vader gaan  en julle My nie meer sal sien nie;  11 van oordeel, omdat die heerser van hierdie wêreld  reeds geoordeel is.  12 “Ek het nog baie dinge om vir julle te sê, maar julle kan dit nie nou verwerk nie. 13 Maar wanneer Hy kom, die Gees van die waarheid, sal Hy julle in die volle waarheid lei.” (Joh 16:8-13 – BDV).

2. Die Heilige Gees onderrig en herinner ons

Die tweede aspek van die Gees se werk is dat Hy ons in alles sal onderrig en ons aan alles sal herinner wat Jesus gesê het. Die Gees onderrig en herinner.

Hierdie aspek van die Gees is van sleutel belang om te weet waarmee Hy ons help, waarin Hy ons onderrig en waaraan Hy ons herinner. Natuurlik help Hy ons met die uitdagings wat ons ervaar in ons persoonlike lewe. Natuurlik is Hy daar waar ons vertroosting nodig het.

Maar daar is ‘n groter agenda ter sprake in die Gees se werk in ons. Die Gees lei ons in die volle waarheid, omdat Hy ons wil gebruik in hierdie wêreld om die wêreld te bedien met die waarheid.

Wat ons egter goed moet verstaan van hierdie waarheid is dat dit direk staan teenoor die waarheid van die wêreld, veral in drie dinge. Jesus sê:

Wanneer Hy kom, sal Hy die wêreld oortuig van sonde en van geregtigheid en van oordeel.” (Joh 16:8 – BDV).

Die Gees gebruik ons om die wêreld te oortuig van sonde, geregtigheid en oordeel. Dit is immers die “Heilige” Gees wat in ons werk:

  • Sonde verwys na die breuk wat daar tussen mense en God gekom het deurdat mense nie in God glo nie, leef in hierdie wêreld asof Hy nie bestaan nie, en sy wet oortree. Ons is geneig om oor sonde te dink in terme van foute of gebreke. Om ons doel te mis. Sonde is Bybels-gesproke om God se wet te oortree. Soos dieselfde skrywer Johannes dit in sy eerste brief stel:

4 Elkeen wat sonde doen, oortree die wet van God (“beoefen wetteloosheid” – anomia – ‘n woord wat in die LXX gebruik word vir oortredings van die wet van Moses). Sonde is immers oortreding van die wet van God.” (1 Joh 3:4 – NAV).

  • Geregtigheid verwys na die boodskap van die Here Jesus wat met sy kruisdood versoening bewerk het vir alle sondaars wat hulle toevlug tot God neem. Hy bring ons in die regte verhouding met God deur die prys vir die sonde vir ons te betaal. En dit bring ‘n onderskeid tussen mense. Soos Johannes dit in sy brief skryf en dit boonop koppel aan die liefde, net om dit helder as twee kante van dieselfde munt te beskryf:

Elkeen wat die geregtigheid nie doen nie, is nie uit God nie, en hy ook wat sy broeder nie liefhet nie.” (1 Joh 3:10 – OAV).

  • Oordeel verwys na die feit dat daar ‘n dag van afrekening kom wanneer God die boeke van ons gewetens (Openb 20:12; NGB 37; vgl 2 Kor 5:10; Matt 12:36) sowel as die boek van die lewe (Fil 4:3; Openb 3:5; 13:8; 17:8; 20:12,15; 21:27; 22:19) – wat ook die boek van die Lam genoem word (Openb 13:8; 21:27) – sal oopmaak en sy regverdige oordeel oor die mensdom sal fel.

Ek weet nie van jou nie, maar dit is nie gedagtes wat ek baie hoor as mense oor die Heilige Gees en sy werk praat nie. Die persoonlike bemoedigende vertroostende kant van die werk van die Heilige Gees oorheers gewoonlik. Hierdie publieke konfronterende kant van sy werk word baie minder beklemtoon.

En ek wonder of dit nie baie keer ‘n rede is waarom ons die werk van die Gees nie agterkom nie. Want ons is nie beskikbaar vir Hom om in gesprek te tree met die mense van hierdie wêreld nie. Ons is nie betrokke by mense om hulle aan die evangelie bloot te stel nie. Gevolglik ervaar ons die Gees nie. Net op tye waar ons nood ervaar en vertroosting nodig het. Want ons is nie op die plekke en besig met die mense waar die Gees se werk nodig is nie.

Oordeel self oor jou eie lewe.

Ek dink een van die redes hoekom ons onbewus lewe van die Gees se werking, is omdat ons ingekoop het by die mantra van ons tyd. Verdraagsaamheid. Jy mag mos niemand meer ontstel nie. Jy mag niemand laat sleg voel nie. Jy mag nie aanstoot gee nie. Jy mag niemand aanspreek oor ‘n lewe wat nie volgens God se standaarde geleef word nie.

Jy moet mense die reg veroorloof om te dink wat hulle dink, en te doen wat hulle doen, sonder om te veroordeel, sonder om dit aan te spreek, sonder om hulle te ontstig. Só leer die wêreld ons.

Die Gees help ons om Jesus se stem te word op aarde

Maar, dit is nie wat Jesus hier doen nie. Hy praat van sonde – en dit is die wêreld wat dit moet hoor. Hy praat van geregtigheid – en dit is weereens die mense van hierdie wêreld wat daardie boodskap moet hoor. Hy praat van oordeel – en dit is weereens elke mens op hierdie aarde wat dié boodskap moet hoor.

Trouens, Hy het gesterf vir die sonde, om geregtigheid vir ons te verwerf, sodat ons die oordeel van God kan vryspring. Dit is die hart van die goeie nuus van die evangelie.

En almal moet dit hoor. Dit is waarvoor die Heilige Gees in jou woon. Om in jou kontak met mense in hierdie wêreld hierdie boodskap oor te dra: oor sonde, oor geregtigheid, oor oordeel.

Die Gees is met daardie doel gegee. Jy kom sy werking in jou agter wanneer jy jou beskikbaar stel om oor hierdie dinge te praat, om die Heilige Gees toe te laat om deur jou sy oortuigingswerk te doen.

Hoe dan nou ook anders? God wil mense red van hulle sonde. Hy wil hulle vrymaak deur die geregtigheid van Christus. Sy belofte is immers dat elkeen wat sy Naam aanroep, sal gered word.

God wil mense verlos van die oordeel wat kom. En Hy wil ons daarvoor gebruik. Daarvoor is die Gees vir ons gegee, sodat Hy deur ons mense se lewens kan aanraak. Die lewens van almal op hierdie wêreld is immers op die spel. Die boodskap raak hulle intens! Vir ewig.

God het die alleenreg om te bepaal wat sonde is

Wat ons sal help om die erns hiervan te verstaan, is as ons rekening hou daarmee dat God die alleenreg het om te beoordeel wat sonde is. Dat Hy die Een is wat bepaal hoe ‘n mens verlos kan word van die skuld van die sonde, deur die geregtigheid van die Seun, en dat Hy die alleenreg het om hierdie wêreld te oordeel.

Dit maak eintlik glad nie saak hoe mense oor sonde dink nie, want God is soewerein in sy beoordeling van wat sonde is en wat nie. En dit word helder en duidelik in sy openbaring, die Bybel uitgespel. Hy is ook die enigste wat versoening kan bewerk vir daardie sonde. En sy oordeel sal uiteindelik aan die hele wêreld bekend gemaak word sodat almal dit kan beaam en in eerbetoon voor Hom kan neerkniel.

Paulus skryf hieroor in sy brief aan die Romeine en sê daar is ‘n sug in die skepping, ‘n “vurige verlange”, na die openlike bekendmaking van die kinders van God. Die skepping wil dieselfde vryheid ervaar van verganklikheid wat die kinders van God te beurt sal val (Rom 8:18-30). Ook die Gees sug binne ons dat dié dag sal aanbreek, die dag van die boeke van die gewetens, die dag van die boek van die lewe.

Maar, daaroor oor twee weke, wanneer ek baie prakties gaan illustreer hoe die Heilige Gees “praat” en dit demonstreer met die verhaal in Handelinge 4.

Gebed

Slotsang

Lied 440:1-4 Die Here salf ons met sy Gees – staan

Seën

Amen

Respons

Vonkk 144:3 Heilige Gees, die Heilige Gees, die Heilige Gees is met jou – staan

     

Trackback from your site.

Leave a comment

Kommentaar en navrae

  • Avatar

    Willem Wiid

    |

    Ek is opsoek na verlede Sondag (20/10/2019) se liturgie. Kry dit ongelukkig nie opgespoor nie. Kry ook nie die afkondigings nie

  • Avatar

    Riana Carstens

    |

    Dankie!!!!!! N insiggewende opbouende preek wat die “Goeie nuus” boodskàp ook bevat. Baie baie dankie.

    Riana

  • Avatar

    Rene De Lange

    |

    Ek is opsoek na n woonstelmaat vir 2020. Overbaakens kompleks naby Moffitt on main
    huur R3100 per maand. Water en elektrisiteit uitgesluit. Whatsapp my asseblief op 073 043 9386 .

  • Avatar

    Chris van Wyk

    |

    Hi Pieter

    Jy kan uiteraard lees wat ek self oor Romeine en Efesiërs geskryf het:

    Maar, as jy ‘n bietjie dieper wil delf, kan jy kyk na die volgende bronne:

    • Faithlife Study Bible (korter kommentaar oor die hele Bybel)
    • NET Bible (kort tekstuele kommentaar oor die hele Bybel – gratis op YouVersion se Bible app)
    • Scripture Direct (uitstekende woordverklarings oor die hele NT – gratis as app)
    • Keener, C. S. The IVP Bible Background Commentary: New Testament (Second Edition). IVP Academic. 2014.
    • Vosloo, W., & van Rensburg, F. J. Die Bybel in Praktyk (Nuwe Vertaling). Vereeniging: Christelike Uitgewersmaatskappy. 1993
    • Van Zyl, A. H.. Die Bybel verklaar: 1983-vertaling. Kaapstad: Lux Verbi. 1993

    Dan is daar natuurlik volbloed kommentare.
    Op Romeine:

    Op Efesiërs:

    • Lincoln, Andrew T. Ephesians WBC 1990
    • Bruce, F. F. The Epistles to the Colossians, to Philemon, and to the Ephesians NICNT
      1984
    • Foulkes, Francis Ephesians TNTC 1989
    • Stott, John R. W. The Message of Ephesians BST 1991
    • Fowl, S. E. Ephesians: A Commentary. Westminster John Knox Press 2012
    • Roberts, J. H. Die brief aan die Efesiers. N G Kerk-Uitgewers. 1990
    • William Barclay http://www.dannychesnut.com/Bible/Barclay/Galatians%20and%20Ephesians.htm