Sal ons werklik self opstaan uit die dood? – 1 Korintiërs 15:12-20

Somerstrand 13 Februarie 09:00 in die kerk en lewendig uitgesaai op Youtube

Musiek vooraf

Verwelkoming

Toetrede

Flam 5 Daar is geen grens aan U guns en genade (ook in Engels – The steadfast love of the Lord never ceases – sit).

Votum en Seëngroet

Lofsang

Vonkk 58 Ons vind ons krag in die Here (in aansluiting by Psalm 1 en Jeremia 17 wat ons hierdie week as deel van die 365 Belofte reeks gelees het – staan)

Lied 414:1-2 Juig verlostes, juig en sing, Halleluja! Halleluja! (staan)

Kindermoment

1 Die Here het die profeet Elia na die slegte koning Agab gestuur. Die Here het besluit om nie meer reën te gee vir die mense nie, want hulle het nie meer na Hom geluister nie. Dit het baie droog geword in die land Israel. Die Here het egter vir Elia gesorg by ‘n klein riviertjie, die spruit Krit. Die Here het so vir Elia gesorg. Hy het ‘n klomp kraaie gestuur met brood en vleis. Elke dag. Maar, toe het die spruit ook opgedroog. Daar was nie meer kos of water nie.  Toe sê die Here vir Elia: “Gaan na die dorpie Sarfat in Sidon en bly daar. Ek het ‘n weduwee daar wat vir jou sal sorg.”

2 Elia het toe gegaan na Sarfat. Toe hy by die stadspoort kom, het hy die weduwee gesien wat hout bymekaar maak vir ‘n vuur.

3 Elia het vir haar gevra: “Sal jy vir my ‘n bietjie water in ‘n houer bring? Ek sal

hou van ‘n drankie.” Toe sy dit bring, het Elia gesê: “Bring asseblief vir my ‘n stukkie

brood ook.”

4 Die vrou antwoord: “So seker as die Here jou God leef, sê ek vir jou, ek het geen

brood nie. Ek het net ‘n handvol meel in ‘n kruik. En ‘n bietjie olyfolie in ‘n fles. Ek het gekom

om hier ‘n paar houtjies bymekaar te maak. Ek sal dit huis toe neem en ons ​​laaste maaltyd maak. Dan sal ek en my seun dit eet en sterf van die honger.”

5 Elia sê vir haar: “Moet jou nie bekommer nie. Gaan huis toe en maak jou kos. Maar maak eers ‘n klein roosterkoekie van die meel wat jy het. Bring dit dan vir my. Maak dan iets vir jouself en jou seun. God sê: “Daardie kruik met meel sal nooit leeg word nie. Daardie fles sal altyd olie in hê. Dit sal so wees tot die dag dat die Here reën sal bring na hierdie land toe.”

6 Die vrou het toe huis toe gegaan en gedoen wat Elia vir haar gesê het om te doen.

7 Van toe af het Elia, die vrou en haar seun, genoeg kos gehad vir elke dag.

8 Die kruik meel en die fles olie was nooit weer leeg nie. Dit het gebeur net soos die Here, deur

Elia, gesê het dit sou.

9 ‘n Rukkie later het die seun van die vrou siek geword.

10 Hy het erger geword en erger.

11 Uiteindelik het hy gestop om asem te haal.

12 Die vrou het gehuil by Elia: “Jy is ‘n man van God. Wat het jy aan my gedoen? Het jy gekom om my te herinner aan my sonde? Het jy gekom om my seun dood te maak?”

13 Elia sê vir haar: “Gee vir my jou seun.” Elia het die seun by haar gevat en hom na die bokamer gedra. Elia het die seun op die bed neergesit in die kamer waar hy toe gebly het.

14 Toe het hy gebid: “Here, hierdie weduwee laat my toe om te bly in haar huis. Hoekom het U hierdie verskriklike ding gedoen aan haar? Hoekom het U toegelaat dat haar seun sterf?” Toe het Elia die seun vasgehou en drie keer vir hom gebid: Hy het gesêl “Here my God, laat hierdie seun weer lewe!”

15 Die Here het Elia se gebed geantwoord. Die seun het weer begin asemhaal, en hy het gelewe.

16 Elia het die seuntjie gedra na onder. Hy het die seun aan sy ma gegee.

17 “Kyk! Jou seun leef!” het Elia uitgeroep.

18 Die vrou het vir Elia gesê: “Nou weet ek jy is regtig ‘n man van God. Ek weet dat die

Here regtig deur jou praat!”

Wat leer die storie vir ons?

God doen wonderwerke, want Hy kan alles doen.

Die Here Jesus het vir ons belowe dat as ons eendag sterf, sal Hy ons weer lewendig maak. Sodat ons vir ewig by Hom in die hemel kan bly.

Ek wil vir julle ‘n geloofsbelydenis leer wat julle met julle liggame kan opsê:

Jesus het met sy voete op die aarde geloop.

Jesus het op sy knieë mense gedien.

Hulle het ‘n spies in Jesus se sy gedruk.

Hulle het Jesus se arms aan die kruis oopgemaak.

Hulle het sy kop in ‘n graf neergelê.

Maar drie dae later:

het Jesus se tone weer die grond gevoel,

het Jesus sy hande vir die dissipels gewys,

het Jesus se hele liggaam weer opgestaan

sodat ons almal se liggame eendag weer kan opstaan.

Gebed

Skriflesing en prediking

Mense ontken vandag die opstanding uit die dood

Daar is mense in die kerk vandag wat hulleself nog Christene noem, maar wat Jesus se opstanding uit die dood ontken. Vir die moderne mens sou dit dan aanstoot gee om in iets te glo wat nie wetenskaplik moontlik is nie. Hulle sal bv sê, Jesus het figuurlik in sy dissipels se harte opgestaan, of in hulle gedagtes, maar niks meer nie.

Talle teoloë dink ook so. Gelukkig begin sommige van dié teoloë die band met die Christendom losmaak. En ‘n mens moet dit verwelkom. Dit is ‘n eerliker pad. Ek wens meer van hulle wil dit doen.

Hoe dit nou ook al sy, dit is natuurlik nie waar nie. Die Nuwe Testament getuig van die feitelike opstanding van Jesus uit die dood. Soos ek verlede week uitvoerig aangetoon het.

• Daar is geen beter verduideliking vir die verandering van ‘n skeptikus na ‘n volgeling van Jesus soos ons dit by Jakobus, Jesus se broer, sien nie.
• Daar is geen beter verduideliking vir die verandering van ‘n vyand wat verander in ‘n vriend nie, soos ons dit sien by Paulus. Wat uiteindelik bereid is om te sterwe vir sy geloof in die opstanding van Jesus uit die dood. Gaan lees weer my preek om jou te vergewis van die feite.

Die Korintiërs het hulle eie opstanding uit die dood ontken

Die interessante van die mense in Korinte was egter dat sommige van hulle ook probleme gehad het. Maar, hulle het darem nie so ver gegaan om die opstanding van Jesus uit die dood, te betwyfel nie. Daarvan was hulle oortuig. Daar was net te veel mense wat dit gesien het. Te veel mense wat hulle kon raadpleeg. En hoe stry jy nou met ooggetuies?!

Maar, het hulle gesê, ja, Jesus het opgestaan. Ons stry nie. Maar, dit het geen betekenis vir ons nie. Jesus het opgestaan uit die dood. Dieselfde sal egter nie met ons gebeur nie. As ons eendag doodgaan, sal ons dood wees. Daar is nie ‘n lewe na die dood nie. Die dood is die finale grens. Jesus kon die grens oorgesteek het. Hy was immers God. Maar, dit geld nie vir ons nie.

Is dit ‘n beter standpunt?

Maar, is dit ‘n beter standpunt as dié van moderne mense, as dié van sommige teoloë? Nie juis nie. Want, die fout wat daardie tyd gemaak het, is dat hulle steeds daardeur ‘n streep deur die betekenis van Jesus se opstanding getrek het. Wat beteken dat hulle geloof in die opstanding van Jesus steeds vir hulle niks werd was nie.

Die dood sou dus steeds die laaste sê oor hulle lewens. Die dood sou ‘n streep trek deur hulle hele lewe. Die dood sou soos ‘n groot uitveër wees wat net ‘n vuil kol agterlaat. Alle troos, alle hoop, alle verwagting op die beloftes van God, sou dan weg wees, uitgevee. Die lewe was dan tevergeefs, soos die Prediker sê.

Elke oomblik van vreugde sou dan ‘n traan hê. Want die dood sal uiteindelik die vreugde uitvee. Elke oomblik van voorspoed sou dan ‘n donker kant hê. Want die dood sal alles uiteindelik tot ‘n einde bring.

• As Jesus nie opgestaan het nie, is Hy nie die weg, die waarheid en die lewe nie. Niks daarvan maak sin nie. Niks daarvan kan vir jou enige rigting aandui nie.
• As Jesus nie opgestaan het nie, is daar geen toekoms vir ons nie. Het ons niks meer as ons fisiologiese en sosiologiese drange en behoeftes nie.
• As Jesus nie opgestaan het nie, moet ons maar eet en drink en vrolik wees, want môre sterf ons.
• As Jesus nie opgestaan het nie, is ons die bejammerenswaardigste van alle mense, want ons lewe is op ‘n leuen gebaseer.
• As Jesus nie opgestaan het nie, is die evangelie ‘n bedrogspul, ‘n dwase wensdenkery en het die Woord, Jesus Christus, geen relevansie vir ons of vir die wêreld nie.

1 Korintiërs 15:12-20

Kom ons luister wat Paulus daaroor sê.

¹²Maar as Christus verkondig word, dat Hy uit die dood opgewek is, waarom sê sommige van julle dat daar nie ‘n opstanding van dooies is nie? ¹³As daar geen opstanding van dooies is nie, is Christus ook nie opgewek nie. ¹⁴En as Christus nie opgewek is nie, is ons verkondiging sinloos, en ook julle geloof sinloos. ¹⁵Boonop word ons as valse getuies vir God bevind, omdat ons teen God getuig het dat Hy Christus opgewek het – wat Hy dan nie opgewek het nie, as dit so is dat dooies nie opgewek kan word nie. ¹⁶Want as dooies nie opgewek word nie, is Christus ook nie opgewek nie. ¹⁷En as Christus nie opgewek is nie, is julle geloof vergeefs, en is julle steeds in julle sondes. ¹⁸Dan is ook diegene wat in Christus ontslaap het, verlore. ¹⁹Indien ons hoop slegs vir hierdie lewe op Christus gevestig is, is ons die bejammerenswaardigste van alle mense. ²⁰Maar nou, Christus ís opgewek uit die dood – die eersteling van die ontslapenes.

Ek fokus op drie implikasies van hierdie teks.

1. As daar geen opstanding van dooies is nie, is Christus ook nie opgewek nie

Jy kan nie die opstanding van die dooies ontken, en dan nog steeds vashou aan die opstanding van Christus nie.

Jy kan nie die opstanding van Christus ontken, en jouself dan nog ‘n Christen, ‘n volgeling van Jesus, noem nie.

Want, sê Paulus, dan is jou geloof sinloos. Dit beteken niks nie.

Boonop het jy dan met God te make, want jy word ‘n valse getuie wat jou téén God verhef en ontken dat Hy so iets kan doen.

• As die dooies nie opgewek word nie, is Christus nie opgewek nie.
• As Christus nie opgewek is nie, is jy nog steeds in jou sonde.
• As Christus nie opgewek is nie, is al jou geliefdes wat al dood is, verlore.
• As jy in Christus glo – hoe jy dit ook al verwoord – maar dit is NET vir hierdie lewe, is jy die mees patetiese mens – dit is wat “bejammerenswaardigste van alle mense” beteken.

Jy sien, dit is nie maar om ’t ewe wat jy glo of nie. Elke deeltjie van ons geloofsbelydenis is belangrik. Daar kan nooit ‘n diversiteit wees in wat ons glo nie. Net ‘n diversiteit in die tipe mense wat glo nie – uit elke taal, en volk, en nasie, mans en vrouens. Ons kan verskil van mekaar in hoe ons lyk, hoe ons praat, waarvan ons hou, maar nooit oor die waarheid nie. Dit is die waarheid wat ons een maak, nie diversiteit nie.

Dink maar net watter destruktiewe gevolge is daar as jy bv net die maagdelike geboorte van Jesus as ‘n fundamentele waarheid in die geloof laat vaar. As jy daarvan praat as ‘n tienerswangerskap, asof Maria rond geslaap het. Onmiddellik bring jy die Goddelikheid van Jesus se geboorte in gedrang. Is Jesus doodgewoon ‘n buite-egtelike kind. Kan Hy vir jou sondes niks beteken nie.

Dieselfde geld die opstanding uit die dood. As Jesus nie opgestaan het uit die dood, kan jy ook nie opstaan uit die dood nie. Is jou geloof sinloos. Is jou geloof doodgewoon pateties.

“Maar nou”, sê Paulus, “Christus ís opgewek uit die dood – die eersteling van die ontslapenes.”

Dit het alles verander. Indien jy daaraan vashou. Indien jy jou lewe daardeur laat bepaal.

2. As ons uit die dood gaan opstaan, is niks meer tevergeefs nie

As Jesus opgestaan het uit die dood, sal ons ook opstaan uit die dood. Dit beteken, soos Paulus later in die hoofstuk gaan sê, dat:

“Ons inspanning in diens van die Here is nie tevergeefs nie.” (1 Kor 15:58).

Die woord “inspanning” kan ook met “arbeid” of “moeite” vertaal word. Die opstanding van Christus, en ons eie opstanding wat daaraan verbind is, maak dat ons arbeid, ons inspanning, ons moeite, die moeite werd is. Dit bly behoue, dit raak nie weg nie, dit het vir ewig waarde.

Die dood het dan nie meer die laaste sê oor jou nie. Niks wat jy in hierdie lewe vir Jesus en sy koninkryk doen, kan ooit tevergeefs wees nie. Selfs as die lewe jou in stukke breek, kan jy steeds hoop en blydskap hê, want jy is veilig geborge in God, toegevou in sy liefde. Jy sal opstaan uit die dood aan die einde van die tyd wanneer Jesus weer kom om ons te kom haal.

3. Hierdie geloof maak jou vry van vrees vir die dood

O, ons het nodig om die werklikheid hiervan regtig te begin glo, want dit sal ons hele lewe verander. Want, die geloof in die opstanding is die basis vir ‘n groei in die werklikheid van ons geloofslewe. Dit maak jou vry van die vrees vir die dood, want jy weet die dood is nie die einde van alles nie, maar ‘n deurgang na die ‘n lewe by God. En alles wat jy vir Hom doen hierdie kant van die dood sal erken word anderkant die dood. Jy hoef nie meer ontsteld te wees oor wat met jou hier gebeur nie. Jy weet dat alles op die ou end sal uitwerk. Alles sal ten goede meewerk vir die wat God liefhet (Rom 8:28).

Ek sluit af met ‘n verhaal wat ons uitnooi om ons geloof in God vandag te verdiep. Ek het dit al vir julle vertel, maar dit is steeds so van toepassing. Dit gaan oor siekte, maar kan net so gemaklik op ons siening oor die opstanding van toepassing gemaak word.

Craig Keener vertel in sy uitstekend nagevorste boek oor wonderwerke (Miracles – The Credibility of the New Testament Accounts.  Volumes 1 & 2. 2011.  Baker Academic: Grand Rapids) die verhaal van  Jacob Loewen.

Jacob was met Bybelvertaling besig vir die Choco mense van Panama. Die vrou van sy gasheer, Aureliano, was in dié tyd egter sterwend aan longontsteking , want daar was geen medisyne beskikbaar vir haar in die onmiddellike omgewing nie.  Loewen was terselfdertyd besig om Jakobus 5:14-15 se belofte oor genesing in Choco te vertaal, maar het ook geweet dat hy nie die geloof gehad het om dié gebed vir haar te bid nie.  En onthou, Jakobus gebruik in sy brief die verhaal van Elia – wat ek met die kinders gedeel het – om ons te oortuig dat God vandag nog genees. Soos Jakobus in vers 15 sê: “Die gelowige gebed sal die sieke gesond laat word.”

Nieteenstaande hierdie ongeloof het hy saam met ‘n paar gelowiges vir haar gebid, en sy het ‘n bietjie beter geword.  Die volgende môre was sy egter weer sterwend.  Plaaslike gelowiges het haar toe gesalf met olie – soos Jakobus voorskryf – sonder om Loewen uit te nooi, vir haar gebid, en sy het volkome gesond opgestaan en haar normale lewe voorgesit.

Toe Aureliano baie opgewonde verklaar dat God se Gees die mindere geeste weggejaag het, het Loewen opgemerk dat hulle hom nie uitgenooi het om te bid nie.  Aureliano het verskoning gevra, maar op sy beurt opgemerk:

“It doesn’t work when you are in the circle.  You don’t really believe.”

Loewen was ‘n toegewyde Christen, maar het gevind dat hy nie in staat was: “to transcend the secular assumptions and understandings of his particular birth society.” (Wilson, “Seeing” in Being Changed: The Anthropology of Extraordinary Experience, 1994).

My gebed is dat jy inderdaad die sekulêre aannames van ons tyd sal transendeer, in jou geloof in ‘n God wat nie net van siekte genees nie, maar inderdaad vir Jesus uit die dood opgewek, sodat ook jy nie die opstanding van die dooies sal mis nie.

Gebed

Slotlied

Lied 481:1-3 Ontwaak, jy wat slaap, en staan op uit die dood (gebaseer op Efesiërs 4:13-17)

Seën

Respons

Lied 414:2 (laaste twee reëls) Roem die Vors wat leef en heers. Halleluja! Halleluja! | God se volk vier ewig fees. Halleluja! Halleluja!