Psalm 72 – “Lank lewe die Koning!”

NGK Somerstrand 4 Desember 2022 | Kerk en Youtube 09:00

Verwelkoming

Aankondigings

Volgende week se Kategese inligtingsessie Koekversiering in die ARK = die “versierders” moet hul eie sprinkles, smarties/lekkers bring.  Ons verskaf die koeke en versiersuiker.

Bydrae van die huishulpe

Psalm 72 – English

Toetrede

Lied 214:1-3 Here, ons sal u loof (staan)

FLAM 112 Ek roem u Naam (staan)

Lied 169 Heilig, heilig, heilig (sit)

Votum en seëngroet

Lofliedere

Psalm 72:1 Wil aan die  koning tog u reg gee (orrel en klavier 1x en dan gemeente – sit)

Lied 334:1-4 God is liefde, juig ons harte (staan)

Kindertyd

• “Wie, dink julle, regeer in ons land?”  Pres Cyril Ramphosa
• “Wie sorg dat ons nie te vinnig op die paaie ry nie?” Verkeersmanne en -vroue
• “Wie is die kaptein van die Springbokke?” Siya Kolisi

Ons lees vandag van Salomo. Hy het ‘n Psalm geskryf waarin hy ons help om die Here te vra dat Hy die “konings” van die wêreld sal leer om te regeer soos Hy wil.

“O God, U moet vir die koning leer om reg te regeer en om reg te doen soos U. Ons bid dat hy reg sal regeer oor u volk, dat hy reg sal oordeel oor mense wat aan U behoort en wat hulleself nie kan help nie.” (Psalm 72:1-2 ABA)

So, dit is wat ons ook dan gaan doen. Ons bid vir regeerders en leiers, sodat hulle regverdig sal wees en altyd die belange van die mense op die hart sal dra. Ons bid ook vir die prefekte, die klaskapteins, die sportkapteins, en die onderwysers.

Verootmoediging

Skriflesing en prediking

Psalm 72 – “Lank lewe die Koning!”

Dit bly darem net ontstellend wat op die hoogste vlakke in ons land aan die gang is. Die korrupsie en verydeling wat regdeur die openbare instellings tot in die parlement sigbaar is. Die Phala Phala sage het nou met die verslag van die onafhanklike komitee wat dit ondersoek het ‘n verdere wending geneem dat ons president in ‘n staat van beskuldiging gestel kan word.

Ek wonder hoe jy daaroor dink?

En waarvoor jy bid?

God save the King!

Onlangs luister ek weer met aandag na die Engelse volkslied by die rugbywedstryd van die Springbokke op Twickenham:

God save our gracious King!
Long live our noble King!
God save the King!
Send him victorious,
Happy and glorious,
Long to reign over us:
God save the King!

Ek wonder hoe jy oor die lied voel? Dit klink half Bybels, nie waar nie. En ja, daar is baie ooreenkomste. Veral as ‘n mens die tweede vers van die lied daarby lees.

Thy choicest gifts in store,
On him be pleased to pour;
Long may he reign:
May he defend our laws,
And ever give us cause,
To sing with heart and voice,
God save the King!

Sal jy dit wil sing vir Koning Charles in Engeland?

Sal jy dit wil sing in ons land vir ons eie president?

Want, die strekking van die inhoud kom ooreen met verskeie van die Koningspsalms, en veral met die eerste van die twee Psalms van Salomo in die Psalmbundel, Psalm 72, die Psalm vir vandag.

¹Van Salomo.

O God, gee u beslissings aan die koning,

u geregtigheid aan die seun van die koning.

²Mag hy u volk met geregtigheid oordeel,

u magteloses met billikheid.

Die volkslied het immers ook daardie sentiment: “May he defend our laws.”

Maar, dit is net ‘n sentiment, want let op die subtiele verskil – “O God, gee u beslissings aan die koning…” na “May he defend our laws…”

En as ‘n mens mooi gaan dink oor dié verskil sal jy besef dat dit nie net ‘n subtiele verskil is nie, maar ‘n fundamentele verskil. Die verskil tussen “u beslissings” en “our laws”.  Tussen God se geregtigheid en menslike geregtigheid.

Psalm 72

Wanneer Salomo hierdie Psalm skryf dan besef hy dat sy perspektief op wat reg en verkeerd is nie belangrik is nie, maar dit wat God vir hom en die wêreld wil. Dit is God se beslissings wat saak maak. Dit is hoe Hy oordeel oor die volk en hulle doen en late wat nagevolg moet word.

Trouens, dit is wanneer Salomo en sy volk met God se oë kyk na die wêreld dat hulle magteloses met billikheid sal hanteer.

Dit is vanuit daardie fundamentele vertrekpunt wat Salomo verder gaan in Psalm 72 en ‘n paar uitnemende metafore inspan om te bid vir die handhawing van God se beslissings in hulle wêreld. Hy bid daarom:

³Mag die berge vrede bring vir die volk,

en die heuwels geregtigheid.

Want, waar God gedien word, raak die omgewing leefbaar. Kom daar vrede. Daarvoor bid Salomo.

Want, hy weet dat dit ‘n effek sal hê op almal in die land. God se heerskappy sal mense laat floreer:

⁴Hy sal die magteloses van die volk se regte handhaaf,

die kinders van behoeftiges verlos,

maar onderdrukkers verpletter.

Maar, belangrik, die eintlike doel van die handhawing van hulle regte, die verlossing van hulle behoeftes, die verplettering van hulle onderdrukkers, is nie maar net sodat hulle onafhanklikheid herstel en hulle menswaardigheid herstel kan word nie. Nee, die gevolg sal wees:

⁵Hulle sal vir U ontsag hê

solank die son en die maan nog daar is,

vir geslagte lank.

Want, dít is waaroor dit in die lewe gaan. Oor God en sy wil vir die lewe. Dit gaan nie oor ons eie geluk in die eerste plek nie, maar oor die regte verhouding met God. Waar sy koninkryk kom, waar Hy as Koning geëer word, dáár kom sy voorsiening tot sy reg. En waar mense die wonder van sy voorsiening ervaar, dáár leef hulle in ontsag vir Hom.

Salomo gebruik nog ‘n verbeeldingryke metafoor uit die natuur vir sy gebed.

⁶Mag die koning wees soos reën

wat neerdaal op ‘n gesnyde grasveld,

soos reënbuie wat die aarde deurweek.

‘n Mens ruik die gras na die reën in sy gebed – veral in ons droogte-geteisterde wêreld – en kan daarom saam met hom droom van ‘n tyd van oorvloed as die koning mense help om in ontsag vir God te leef:

⁷In sy tyd sal regverdiges floreer,

daar sal vrede in oorvloed wees

tot die maan nie meer daar is nie.

Daarom is dit ‘n Psalm wat ons kan bid vir die leiers in ons land, waarin ons juis ‘n regstelling bring dat ons bid dat die Here en sy wil vir die lewe in sy volheid tot sy reg sal kom. Dat ons leiers sal inval by wat God wil, nie by wat hulle wil nie. En ons kan bid dat ons verlos word van die self gesentreerde moeras waarin ons land dreig om weg te sink.

Maar, dan skuif Salomo se perspektief na ‘n meer globale een waarin ons Messiaanse betekenisse begin raaksien. Dit is nie meer ‘n gebed vir Salomo of sy kinders wat na hom koning sou word nie, maar ‘n gebed vir die Messias wat uit sy nageslag gebore sou word.

Want, die Messias, die Gesalfde, die Christus se koningskap sal die hele wêreld beïnvloed. Daarom bid Salomo:

⁸Mag hy heers van see tot see,

van die Rivier tot aan die uithoeke van die aarde.

⁹Voor hom sal die woestynbewoners kniel,

en sy vyande sal stof lek.

¹⁰Die konings van Tarsis

en die eilande sal belasting betaal;

die konings van Skeba en Seba

sal skatplig lewer.

¹¹Al die konings sal diep voor hom buig,

al die nasies sal hom dien;

¹²want hy sal behoeftiges wat om hulp roep, uitred,

ook magteloses en mense wat nie helpers het nie.

¹³Hy sal deernis hê met hulpeloses en behoeftiges;

die lewens van behoeftiges sal hy bevry.

¹⁴Van onderdrukking en geweld sal hy hulle lewe vrykoop.

Hulle bloed sal kosbaar wees in sy oë.

Dit is ‘n boodskap wat ons weer in hierdie Adventstyd kan omhels, en ons gebed kan maak vir hierdie wêreld.

• Dat Jesus Christus sal heers van see tot see tot aan die uithoeke van die aarde.
• Dat alle mense, van die mins belangrike tot die mees belangrike, voor Hom sal kniel, en Hom sal aanbid.
• Dat almal wat worstel met die lewe, vrygekoop sal word van die bande wat hulle bind om in God se teenwoordigheid te floreer.

Só, ons sing dus dieselfde tipe lied as die Engelse volkslied, maar met ‘n hele ander inhoud, as ons van God vra dat die Koning lank sal lewe! Ons bid dat die enigste Koning lank sal lewe!

¹⁵Mag hy lank lewe!

En in die metafore van Salomo sien ons in die toekoms hoe dit gaan gebeur:

Mense sal vir hom van die goud van Skeba gee;

hulle sal voortdurend vir hom bid

en hom die hele dag deur seën toewens.

¹⁶Mag die land oortrek wees met graan,

die are golwend oor die bergtoppe soos die Libanon.

Mense in die stede sal in bloei staan

soos die plante van die land.

¹⁷Mag sy roem vir altyd duur,

sy naam voortleef solank die son bestaan.

Mense sal wens dat hulle so geseënd is soos hy;

al die nasies sal hom gelukkig noem.

Want, ons weet dat dit nie regtig oor die konings van hierdie wêreld gaan nie, maar oor die enigste Koning wat ons weer in hierdie Adventstyd verheerlik en op wie ons ons verwagting stel dat Hy dinge sal verander, sodat sy beslissings die deurslag sal gee in alles. Want, Hy is nie net Koning nie, maar God. Daarom, sluit ons saam met Salomo ons gebed:

¹⁸Die Here God, die God van Israel, moet geprys word,

Hy wat wonders doen, net Hy alleen.

¹⁹Sy luisterryke Naam moet vir ewig geprys word;

mag sy heerlikheid die hele aarde vul.

Amen, amen.

“Lank lewe die Koning!”

Gebed

Dankoffers

Slotlied

Lied 338:1-4 Weer dink ons saam aan daardie nag  (staan)

Seën

Respons

Lied 329:1 Want so lief het God die wêreld gehad (staan)