God gee moed vir die stryd deur sigbare tekens – Josua 5:1-15

NGK Somerstrand 27 Maart 2022 | Kerk en Youtube 09:00

Ek fokus vandag op drie sigbare tekens wat God vir die volk in Josua se tyd gegee het om hulle te bemoedig vir die stryd om die beloofde land in te neem – die besnydenis, die paasmaaltyd, en die bevelvoerder van die Here. Watter sigbare tekens gee die Here vandag vir ons om moed te hou vir ons eie geloofstryd?

Youtube

Musiek vooraf

Verwelkoming

Aankondigings

Toetrede

Flam 87 (Afr, Eng) Maak my nou stil, Heer, ek wil na U luister (sit)

Votum en Seëngroet

Lofsang

Lied 200:1-3 U goedheid, Heer, kan ons nie peil nie (staan)

Lied 513:1-3 Soek in God jou sterkte; kry by Hom jou krag (staan)

Doop

Lied 294:1,2 Jesus roep die kindertjies (sit)

Gebed

Skriflesing en prediking

Die Leesrooster teks vir vandag is die verhaal van Josua en die volk aan die begin van hulle Intog in Israel. Josua 5.

In die eerste vier hoofstukke van Josua vertel die skrywer vir ons hoe die Here Israel se geestelike verbintenis aan Hom al hoe stewiger gemaak het. In die eerste plek was daar die belofte van God se teenwoordigheid saam met die opdrag om nougeset volgens sy Woord op te tree (Jos 1). In die tweede plek het die twee verkenners die volk laat moed skep met die verhaal van Ragab. Israel het nou geweet dat daar alreeds mense in Kanaän was wat, soos hulle, die Here gedien het, en deur Hom beskerm is (Jos 2). In die derde plek het die Here die noodsaak van absolute gehoorsaamheid aan sy begeleiding onderstreep met die verbondsark wat die voortou in die volk se Intog moet neem. In aansluiting daarby het die reiniging van die hele volk gevolg om hulle voor te berei vir die tog deur die Jordaan. Dit is gevolg deur die wonder van die opdamming van die rivier – soos met die Rietsee – sodat hulle droogvoets kon deurtrek (Jos 3-4).

Dit word nou in hoofstuk vyf deur drie ander geestelike insette – sigbare tekens – in hulle lewens gevolg – die besnydenis, die paasmaaltyd, en die bevelvoerder van die Here. Dit was bedoel om die volk te bemoedig vir die stryd om die beloofde land in te neem, met Jerigo wat net hierna deur Goddelike ingrype oorwin word.

Die eerste sigbare teken: die besnydenis

Ons lees van die eerste sigbare teken in Josua 5:1-9.

¹Toe al die konings van die Amoriete aan die westekant van die Jordaan en al die konings van die Kanaäniete langs die see hoor dat die Here die water van die Jordaan voor die Israeliete laat opdroog het totdat hulle deurgetrek het, het hulle harte ineengekrimp, sodat hulle nie meer moed gehad het vir die Israeliete nie. ²In dié tyd het die Here vir Josua gesê: “Maak vir jou klipmesse en besny weer die Israeliete ‘n tweede keer.” ³Josua het toe vir hom klipmesse gemaak en die Israeliete besny by Ghibeat Ha-araloot. ⁴En dit is die rede waarom Josua die besnydenis moes doen: Die hele volk wat uit Egipte getrek het, die mans, al die krygsmanne, is op pad in die woestyn dood, gedurende die uittog uit Egipte. ⁵Die hele volk wat weggetrek het, was immers besny; maar al die volksgenote wat in die woestyn gebore is terwyl hulle op pad was, gedurende hulle uittog uit Egipte, is nie besny nie. ⁶Want veertig jaar lank het die Israeliete in die woestyn rondbeweeg, totdat die hele nasie krygsmanne wat uit Egipte weggetrek het, tot niet was, hulle wat nie na die stem van die Here geluister het nie, vir wie die Here gesweer het dat Hy hulle nie die land sal laat sien wat die Here aan hulle voorvaders met ‘n eed beloof het om aan ons te gee nie – ‘n land wat oorloop van melk en heuning. ⁷Maar hulle kinders het Hy in hulle plek gestel. Dit is hulle wat Josua besny het, want hulle was onbesnede, omdat hulle nie op pad besny is nie. ⁸Toe die hele volk klaar besny is, het hulle net waar hulle was in die kamp gebly, totdat hulle gesond was. ⁹Die Here het vir Josua gesê: “Vandag het Ek die bespotting van Egipte van julle afgewerp.” Daarom is die naam van hierdie plek Gilgal; dit is vandag nog so.

Die eerste opdrag wat Josua dus kry is om klipmesse (van vuurklip) te maak en al die Israeliete te besny as teken daarvan dat hulle aan die Godsvolk behoort. Die feit dat klipmesse gebruik is, bring onmiddellik die soortgelyke handeling van Sippora in herinnering. Sy het haar seun Gersom se voorhuid afgesny om die toorn van die Here oor Moses se nalatigheid om dit te doen, af te weer (Eks 4). Die besnydenis was regtig ‘n fundamentele vereiste vir die volk van God. Die eerste geslag Israeliete in die woestyn het, nes Moses met sy seun, in gebreke gebly om die besnydenis van hulle kinders in stand te hou. Die tweede geslag het dus as onbesnedenes die land betree. Hulle word nou net ná die Intog in die beloofde land opgeroep om dit reg te stel. Want, dit is ‘n fundamentele vereiste van die verbond. Hulle sou net as deel van die verbondsvolk aan die “Heilige Oorlog” kon deelneem. Daar moes dus weer ‘n besnydenis wees. Die teks sê ‘n “tweede keer”. Dit gryp waarskynlik terug na die “eerste keer” toe Abraham sy hele familie besny. Soos almal in sy tyd besny is, só word hierdie tweede geslag Israeliete nou besny. Daarmee het die Here die Israeliete bevry van: “die bespotting (smaad) van Egipte”. Letterlik staan daar dat die smaad van Egipte “weggerol” is van hulle, ‘n woord wat ook die stam (gll) vir die naam Gilgal (gilgāl) vorm. Gilgal – die “heuwel van voorhuide” of te wel Ghibeat Ha-araloot – word daarmee ook die Israeliete se basis.

Die tweede sigbare teken – die Paasmaaltyd

Ons lees van die tweede sigbare teken in Josua 5:10-12.

¹⁰Terwyl die Israeliete by Gilgal gekamp het, het hulle op die veertiende dag van die maand teen die aand die Pasga gevier in die vlaktes by Jerigo. ¹¹Die dag ná die Pasga, presies op daardie dag, het hulle van die vrug van die land geëet – ongesuurde brood en gebraaide koring. ¹²Die manna het opgehou die dag ná hulle van die vrug van die land geëet het. Daar was nie meer manna vir die Israeliete nie. Hulle het in daardie jaar van die opbrengs van die land Kanaän geëet.

Met die eerste paasfees se viering in die land Kanaän maak Israel die bevryding uit Egipte weer vars in hulle geheue en hou deur hierdie sigbare teken hulle geloof in God in stand. Dit was ‘n uiters belangrike opvolg van die besnydenis, want net dié wat aan die geloofsgemeenskap behoort het (deur die besnydenis), kon deelneem aan die paasfees en die boodskap van verlossing daarin vir hulleself toeëien. Dit was ‘n sigbare teken van hulle voortgaande deel wees van die geloofsgemeenskap. Soos dit die geval ook in die Nuwe Testamentiese geloofsgemeenskap is met die doop (inlywing) en die nagmaal (inblywing). Let op dat die manna hierna wegbly, want hierdie wondervoorsiening van die Here was nie meer nodig nie. Hulle was nou in die land van melk en heuning. Hulle kon die opbrengs van die land gebruik. Dit sou nou voortaan die voorsiening van die Here wees.

Die derde sigbare teken – die bevelvoerder van die leër van die Here

Ons lees van die derde sigbare teken in Josua 5:13-15.

¹³Toe Josua naby Jerigo was, het hy opgekyk. Reg voor hom staan daar skielik ‘n man met ‘n ontblote swaard in sy hand. Josua gaan toe na hom en vra hom: “Is Jy vir ons, of vir ons vyande?” ¹⁴Hy het geantwoord: “Nee, maar Ek is die bevelvoerder van die leër van die Here; daarom het Ek gekom.” Josua het neergeval met sy gesig teen die grond, diep neergebuig, en vir Hom gesê: “Wat wil my Heer vir sy dienaar sê?” ¹⁵Die bevelvoerder van die leër van die Here het Josua geantwoord: “Trek jou sandale van jou voete af, want die plek waarop jy staan, is heilig.” Josua het toe so gemaak.

Hierdie man met sy ontblote swaard is die bevelvoerder van die leër van die Here, ‘n sigbare teken van God se teenwoordigheid. Let op dat Josua hom aanspreek as “my Heer” en dat die bevelvoerder dieselfde opdrag vir Josua gee as toentertyd vir Moses by die brandende doringbos, om sy sandale uit te trek weens die heiligheid van die plek (Eks 3). Dit is dus die Here self wat hulle in die geveg sal begelei. God gee dus hierdeur op ‘n sigbare wyse vir Josua moed om die stryd in God se Naam aan te pak. Let ook op dat die bevelvoerder nie kant kies tussen Josua-hulle en hulle vyande nie, toe Josua Hom daaroor uitvra nie, maar doodgewoon verklaar dat Hy nou gekom het om die oordeel van God op die volke van Kanaän uit te voer. Dit is ‘n “Heilige Oorlog”.  Die vraag is dus eerder aan wie se kant Josua en die volk gaan wees. Waar hulle die kant van die Here kies, en sy opdragte uitvoer, sal hulle aan die doel van hulle bestaan kan beantwoord. Dit is, om die beloofde land in te neem.

Watter sigbare tekens gee die Here vir ons vandag?

Daar is ‘n ooreenkoms tussen die eerste twee tekens en die twee sigbare tekens van die doop en die nagmaal wat die Here Jesus vir ons ingestel het. Hierdie tekens dien vandag nog dieselfde doel as die besnydenis en die paasmaaltyd. Dit gee ons moed!

Maar, daar is meer, ‘n ander ooreenkoms. Waar die bevelvoerder van die Here sigbaar aan Josua verskyn het, is God deur sy Heilige Gees onsigbaar in ons aan die werk. Ons is dus in ‘n beter posisie as Josua. God bly by ons en verander ons binnekant sodat ons in alles sy leiding in hierdie lewe kan volg.

Die antwoord van die bevelvoerder van die leër van die Here aan Josua is egter net so relevant vir ons wat wonder aan wie se kant die Here is. Hy is nie aan ‘n kant nie! Hy voer sy eie wil uit. In Josua se tyd was dit die oordeel oor ‘n aantal afvallige nasies, sowel as die vervulling van sy belofte van ‘n land van melk en heuning aan sy volk. In ons tyd is dit die heiligmaking en die koms van die koninkryk.

Watter ander sigbare tekens gee die Here?

En dit is nie al nie. Dink ‘n bietjie aan watter ander sigbare tekens die Here al vir jou gegee het vir jou eie geloofstryd. Gebedsverhorings. Voorsienings. Beloftes wat vervul is. Jy kan staatmaak daarop dat die Here jou nie in die steek sal laat nie.

Gebed

Slotlied

Lied 421:1-3 Die Here Jesus lewe, Hy het die dood oorwin (staan)

Seën

Respons

Lied 189 Halleluja (staan)