Gee geleentheid dat elkeen iets deel wat gebeur het sedert julle laas by mekaar was.

RUS

Ons gaan in die Skrifgedeelte fokus op Jesus wat die blinde man genees.  Maak jou oë toe en verbeel jou jy is blind soos dié man.  Beleef die donker en die beperking van jou sig.  1 minuut stilte.  Beleef die opwinding as jy hoor dat Jesus jou raaksien in die verbygaan.  1 minuut stilte.  Maak dan jou oë oop en kyk asof vir die eerste keer rondom jou.  1 minuut stilte.  Maak weer jou oë toe en leef jou in die laaste gesprek van Jesus met die blinde man in.  Hoor Jesus vir jou vra: “Glo jy in die Seun van die Mens?” Antwoord Hom in gebed.  2 minute stilte.

Sê amen en gee geleentheid dat mense kan deel wat hulle ervaar het in hierdie tot-rus-kom tyd.

Gee geleentheid dat elkeen iets deel wat gebeur het sedert julle laas by mekaar was.  Julle kan spesifiek ook nadink oor wat die Bergrede vir julle beteken het.

RUS

Ons gaan in die Skrifgedeelte fokus op Jesus in gesprek met die Samaritaanse vrou.  Maak jou oë toe en verbeel jou jy is daar by die put.  Voel die hitte van die dag.  1 minuut stilte.  Hoor Jesus die vrou vra: “Gee My ’n bietjie water om te drink.”  1 minuut stilte.  Hoor dan Jesus sê: “wie van die water gedrink het wat Ek hom sal gee, sal in alle ewigheid nooit dors kry nie.”  Eien dit vir jouself toe.  2 minuut stilte.

Sê amen en gee geleentheid dat mense kan deel wat hulle ervaar het in hierdie tot-rus-kom tyd.

Gee geleentheid dat elkeen iets deel wat gebeur het sedert julle laas by mekaar was.  Julle kan spesifiek nadink oor wat julle rondom besittings en bekommernisse ervaar het.

RUS

Begin só: “God nooi ons uit om tot rus te kom by Hom. Sluit nou die oë en gee vir Hom al jou wanhoop, verwarring of hoop.  Dit kan ’n vraag wees, ’n behoefte, ’n seer, ’n dankbaarheid.” Gee 2 minute daarvoor.  Vervolg dan met: “God gee aan ons in die teks wat ons gaan lees die belofte: ‘Vra en vir julle sal gegee word; soek en julle sal kry; klop en vir julle sal oopgemaak word.’ Wat wil jy nou van God vra?”  Gee 2 minute daarvoor.

Sê amen en gee geleentheid dat mense kan deel wat hulle ervaar het in hierdie tot-rus-kom tyd.  Indien hulle vrymoedigheid het, kan julle saam vir van dié sake bid en ook op julle groep se gebedslys sit.

Gee geleentheid dat elkeen iets deel wat gebeur het sedert julle laas by mekaar was.  Julle kan spesifiek nadink oor die nagmaal.

RUS

Gee geleentheid dat elkeen met geslote oë nadink oor die afgelope week. Doen dit soos volg: Vra eers: “Watter ontwrigtende dinge het gebeur?”  Gee 2 min se stilte.  Sê dan: “Gee dit nou vir die Here.”  Ná 2 min vra dan: “Watter bevestigende dinge het gebeur?” Gee 2 min. se stilte.  Sê dan: “Dank die Here daarvoor.”  Ná 2 min lees die volgende teks en vra dat elkeen daaroor ná dink en met die Here praat: “Laat jou lewe aan die Here oor en vertrou op Hom;  Hy sal sorg.”( Ps 37:5). Gee 2 min daarvoor en sluit dan met ’n gebed.

Gee geleentheid dat mense kan deel wat hulle ervaar het in hierdie “daaglikse ondersoek”.

Gee geleentheid dat elkeen iets deel wat gebeur het sedert julle laas by mekaar was.

RUS

Vandag se Skrifgedeelte handel oor die instelling van die nagmaal.  Jy kan brood en wyn/druiwesap as simbool van Jesus se teenwoordigheid op ’n tafel waar julle bymekaarkom, neersit.

• Laat elkeen stil word en begin deur na te dink oor wat die nagmaal in hulle lewe al vir hulle beteken het.  Gee 2 minute stilte.
• Sê dan: “Jesus het brood gebreek, dit vir sy dissipels gegee en gesê, neem, eet, dit is my liggaam.  Dink na daaroor dat sy liggaam gebreek is tot ’n volkome versoening vir al jou sondes.” Gee 2 minute stilte.
• Sê dan: “Jesus het die beker aangegee en gesê: Drink almal daaruit, want dit is my bloed, die bloed van die verbond wat vir baie uitgegiet word tot vergewing van sondes. Dink na daaroor dat sy bloed uitgegiet is tot ’n volkome versoening vir al jou sondes.” Gee 2 minute stilte.
• Gee dan tyd dat kleingroeplede die Here Jesus dank vir wat Hy vir ons gedoen het.  Sluit af met ’n eie gebed.

Gee geleentheid dat mense deel wat hulle ervaar het in hierdie tot-rus-kom tyd met die simbole van die nagmaal.

Gee geleentheid dat elkeen iets deel wat gebeur het sedert julle laas by mekaar was.

RUS

Die Ons Vader is so ’n belangrike gebed, dat ons vandag weer daarby stilstaan.  Laat iemand die Ons Vader se ses bedes een vir een voorlees (6:9-13). Gee minstens een minuut tussen elke bede sodat mense stil dié gebed hulle eie kan maak en daaroor nadink en met die Here daaroor gesels.

Sê amen en gee dan geleentheid dat mense kan deel wat hulle ervaar het in hierdie tot-rus-kom tyd met die Ons Vader.  Indien hulle vrymoedigheid het, kan julle saam vir van dié sake bid en ook op julle groep se gebedslys sit.