Saterdag 8 Mei 2010

Hebreërs 5:4-5 Niemand eien hom die eer as hoëpriester toe nie, hy word deur God daartoe geroep, net soos Aäron. So het Christus Hom ook nie die waardigheid as hoëpriester toegeëien nie, God het dit vir Hom gegee, toe Hy gesê het: “Jy is my Seun, van vandag af is Ek jou Vader. En op ‘n ander plek sê Hy: “Jy is ‘n priester vir ewig volgens die priesterorde van Melgisedek.”

OORDENKING: God het Jesus gekies as die mensdom se verteenwoordiger by Hom. Hy wou geen ander persoon of wese hê om die werk te doen nie, behalwe Sy seun. Dit was slegs Sy Seun wat God se hart vir mense verstaan het. Omdat Hy van God gekom het en na God teruggekeer het, kan Hy ons ook daarheen neem. Omdat Hy een is met God, kan Hy ons ook een maak met God. God het hierdie heerlike taak aan Hom toevertrou: die versoening tussen God en die mens.

PERSOONLIK:  Jesus ontvang groot eer wanneer Hy vir sondaars intree. Dit is waarom Hy gekom het en waarom Hy die heerlikheid wat Hy saam met die Vader gehad het, prysgegee het. Elke keer as ons tot Jesus pleit vir genade, ontvang Hy eer. Elke keer as ons ‘n belofte van God glo en vir Jesus vra om dit te vervul, word Hy in die Vader se teenwoordigheid verheerlik. Wil jy Hom ook eer?

GEMEENTE: Bid dat die Kerk die waarheid van God se Woord en Sy beloftes sal begryp en sal begin om Jesus daarvoor te eer deur tot Hom te bid en om vir Hom te vra om daardie beloftes te vervul. Geloof is presies dit – om te glo dat God se beloftes die waarheid is en dat dit vervul sal word as gevolg van Jesus.

Vrydag 7 Mei 2010

Hebreërs 5:1-2 Elke hoëpriester is ‘n mens wat uit die mense geneem en aangestel word om vir hulle by God in te tree deur gawes en offers vir die sonde te bring. Hy kan meegevoel hê met die onwetendes en dwalendes omdat hyself aan swakheid onderhewig is.

OORDENKING: Die twee vereistes vir ‘n hoëpriester is dat hy deur God aangestel moet wees en ook moet kan simpatiseer met diegene wat hy voor God verteenwoordig. Jesus het aan beide hierdie vereistes voldoen. Jesus is deur God geroep om die mense voor Hom te verteenwoordig! Die werk van die Heilige Gees is om ons te oortuig van God se goeie bedoelings met ons en om ons te help om Jesus te vertrou deur ons die waarheid oor Hom te leer. Is jy oortuig dat God se bedoelings nét goed is?

PERSOONLIK: Jesus is ook swak gemaak sodat Hy ons volledig kon verteenwoordig. Hy het Sy triomf verdien omdat Hy bereid was om soos mense te ly. Lyding en swakheid was Sy kenmerke op aarde. Nou in die hemel wil Hy almal verteenwoordig wat swak is en swaarkry. Dit is Sy ewigheidswerk: om jou te verteenwoordig! Wil jy hierdie Jesus leer ken? Bid dat die Heilige Gees dit vir jou werklik sal maak en jou Sy verteenwoordiging sal laat ervaar.

GEMEENTE: Bid dat die Kerk tot die besef sal kom dat die Here vír hulle is en nie teen hulle is nie. Bid dat hierdie besef ‘n diepe nederigheid sal meebring, wat veroorsaak dat die Kerk nie trots en arrogant sal wees in hulle omgang met ongelowiges en sondaars nie. Bid dat die hart van Christus in die Kerk sigbaar sal wees..

Donderdag 6 Mei 2010

Hebreërs 4:16: Kom ons gaan dan met vertroue na Sy genadetroon, sodat ons barmhartigheid en genade ontvang en so op die regte tyd gered kan word

OORDENKING: Ons vertroue is gegrond op dit wat ons oor God se karakter glo. Die Here se genade beteken dat wanneer ek na Hom toe kom met my skuld, sondigheid en onwaardigheid, ek daarvan verseker kan wees dat Hy my sonde sal vergewe en my sal aanvaar. Hy sal dit doen. God se genade beteken dat die innerlike hemelse werking van God se Gees binne-in my my volledig kan verander sodat ek ‘n weerspieëling van Christus Self kan word.

PERSOONLIK: Elke persoon moet vir hom-/haarself die genadige liefde van God toe-eien. Verstaan dat die ganse werk van Christus bedoel is om jou te laat kwalifiseer om met vertroue met God te kan verkeer. Wil jy Hom nie nou hiervoor dank nie? Sit ‘n rukkie stil en dink oor Hom en aanbid Hom.

GEMEENTE: Bid dat die Kerk hierdie genadige liefde van God sal ervaar, en om daarop te reageer met suiwer en nederige aanbidding. Bid dat die waarheid van God se liefde die Kerk in ‘n gemeenskap vol liefde, genade en guns sal transformeer.

Woensdag 5 Mei 2010

Hebreërs 4:16 Kom ons gaan dan met vertroue na Sy genadetroon, sodat ons barmhartigheid en genade ontvang en so op die regte tyd gered kan word.

OORDENKING: Ons vertroue is gegrond op die medelye en krag van ons Hoëpriester. Het jy hierdie vertroue? Hoe word Sy medelye en krag in jou lewe vertoon?

PERSOONLIK Oefen hierdie vertroue: 1. Gaan na God as die Een wat op die troon sit. Hy is genadig. Hy wag om jou te ontvang. Hy het jou lief. Bestee tyd om jou hart aan Hom te gee om hierdie waarhede te aanvaar en joune te maak. Buig voor Hom. 2. Gaan met vertroue en geloof dat Hy jou ter wille van Jesus sal ontvang. Vertroue beteken ek aanvaar  ie offer van Jesus; ek eer die werk wat Hy doen; ek eer die Vader; ek gee erkenning aan die Hoëpriester en wil gemeenskap met Hom hê. Terwyl jy bid en nadat jy gebid het, wees stil en dink na oor wat tussen jou en Hom gebeur. 3. Hoe meer jou siel met Jesus as die Hoëpriester besig is, hoe groter sal jou vertroue word. Hy wil met groot teerheid een wees met jou. Hy verstaan, Hy voel wat jy voel, Hy stel Hom in jou plek. Vertoef in Sy teenwoordigheid.

GEMEENTE: Bid dat die Kerk hierdie wonderlike waarheid sal begryp: By die troon van die Here kan die hele mensdom steeds genade en barmhartigheid vind. Dit is nog nie die tyd van oordeel nie. Bid dat elke lidmaat van die Kerk dit sal verstaan en van die geleentheid gebruik sal maak om na die troon te gaan en genade en ontferming te vind in ‘n tyd van nood.

Dinsdag 4 Mei 2010

Hebreërs 4:15 Die Hoëpriester wat ons het, is nie een wat geen medelye met ons swakhede kan hê nie; Hy was immers net soos ons aan versoeking onderwerp, maar Hy het nie gesondig nie.

OORDENKING: Jesus is bekend met al die kwessies waarvoor die mens te staan kom. Hy het dit immers self ondervind. Hy het Homself ontledig van Sy goddelike mag sodat Hy werklik mens kon word. Hy is geduldig met ons swakhede omdat Hy presies weet hoe ons voel. Sy fokus is nie in die eerste plek om te oordeel nie, maar om ons te help om ons swakhede te oorwin net soos Hy ook die sonde oorwin het. As jy jou daarop instel om hierdie waarheid te verstaan, sal jou hart vertroos word en sal jy hoop ontvang dat jy van enige vorm van sonde vrygemaak en verlos kan word.

PERSOONLIK: Jesus is ons vertroue waardig! Al wat nodig is, is dat ek myself onvoorwaardelik en volkome aan Hom oorgee. Ek moet nooit terneergedruk of teleurgesteld oor myself word omdat ek skynbaar nie ‘n sondelose lewe kan voer nie. Ek moet myself volkome aan Hom onderwerp en op geen manier Sy planne met my teenstaan nie. Wil jy jouself nie nou volkome aan Hom oorgee nie?

GEMEENTE: Bid dat die Kerk ‘n intense begeerte sal hê om ‘n liggaam te word wat geheel en al en volkome sonder sonde is. Bid dat die Kerk ook so barmhartig en simpatiek teenoor sondaars sal wees as wat Jesus was. Laat ons ons veroordelende houding bely en die Here Jesus vra om Sy hart vir ons te gee.

Maandag 3 Mei 2010

Hebreërs 4:14 Terwyl ons nou ‘n groot hoëpriester het wat reeds deur die hemele gegaan het, Jesus, die Seun van God, laat ons vashou aan die geloof wat ons bely.

OORDENKING:Die werk van Jesus ons Hoëpriester het ‘n tweeledige doel. Op die aarde het Hy Homself aan die kruis geoffer as die Lam van God. In die hemel sit Hy aan die regterhand van God en tree op as ons Hoëpriester en Voorspraak. Dit is nodig dat ons al twee ampte verstaan. Jesus verteenwoordig ons in die hemel, maar ons moet ook weet dat ons saam met Hom regeer vanuit die hemele (Ef.2:6).

PERSOONLIK: Bely jy gereeld dat Jesus jou Hoëpriester is? Deur dit te doen gee jy erkenning aan Hom en die werk wat Hy doen. Jou interaksie met Hom as die Hoëpriester beteken ook dat die krag van die hemelse lewe tot jou beskikking is. As jy aan hierdie belydenis vashou, sal die houvas van die sonde en van die duiwel op jou lewe verbreek word. Kyk na Jesus in die hemel. Plaas jou vertroue op Hom en laat jou hart by Hom bly. Sy vrede sal dan in jou hart inkom.

GEMEENTE: Bid dat die Kerk die openbaring van Jesus as Hoëpriester sal ontvang. Bid dat hierdie waarheid die houding van die kerk oor sonde en Satan sal transformeer van een van tou opgooi na een waarin alle hindernisse oorkom kan word in ooreenstemming met God se beloftes.