Donderdag 6 Mei 2010

Hebreërs 4:16: Kom ons gaan dan met vertroue na Sy genadetroon, sodat ons barmhartigheid en genade ontvang en so op die regte tyd gered kan word

OORDENKING: Ons vertroue is gegrond op dit wat ons oor God se karakter glo. Die Here se genade beteken dat wanneer ek na Hom toe kom met my skuld, sondigheid en onwaardigheid, ek daarvan verseker kan wees dat Hy my sonde sal vergewe en my sal aanvaar. Hy sal dit doen. God se genade beteken dat die innerlike hemelse werking van God se Gees binne-in my my volledig kan verander sodat ek ‘n weerspieëling van Christus Self kan word.

PERSOONLIK: Elke persoon moet vir hom-/haarself die genadige liefde van God toe-eien. Verstaan dat die ganse werk van Christus bedoel is om jou te laat kwalifiseer om met vertroue met God te kan verkeer. Wil jy Hom nie nou hiervoor dank nie? Sit ‘n rukkie stil en dink oor Hom en aanbid Hom.

GEMEENTE: Bid dat die Kerk hierdie genadige liefde van God sal ervaar, en om daarop te reageer met suiwer en nederige aanbidding. Bid dat die waarheid van God se liefde die Kerk in ‘n gemeenskap vol liefde, genade en guns sal transformeer.

Vrydag 7 Mei 2010

Hebreërs 5:1-2 Elke hoëpriester is ‘n mens wat uit die mense geneem en aangestel word om vir hulle by God in te tree deur gawes en offers vir die sonde te bring. Hy kan meegevoel hê met die onwetendes en dwalendes omdat hyself aan swakheid onderhewig is.

OORDENKING: Die twee vereistes vir ‘n hoëpriester is dat hy deur God aangestel moet wees en ook moet kan simpatiseer met diegene wat hy voor God verteenwoordig. Jesus het aan beide hierdie vereistes voldoen. Jesus is deur God geroep om die mense voor Hom te verteenwoordig! Die werk van die Heilige Gees is om ons te oortuig van God se goeie bedoelings met ons en om ons te help om Jesus te vertrou deur ons die waarheid oor Hom te leer. Is jy oortuig dat God se bedoelings nét goed is?

PERSOONLIK: Jesus is ook swak gemaak sodat Hy ons volledig kon verteenwoordig. Hy het Sy triomf verdien omdat Hy bereid was om soos mense te ly. Lyding en swakheid was Sy kenmerke op aarde. Nou in die hemel wil Hy almal verteenwoordig wat swak is en swaarkry. Dit is Sy ewigheidswerk: om jou te verteenwoordig! Wil jy hierdie Jesus leer ken? Bid dat die Heilige Gees dit vir jou werklik sal maak en jou Sy verteenwoordiging sal laat ervaar.

GEMEENTE: Bid dat die Kerk tot die besef sal kom dat die Here vír hulle is en nie teen hulle is nie. Bid dat hierdie besef ‘n diepe nederigheid sal meebring, wat veroorsaak dat die Kerk nie trots en arrogant sal wees in hulle omgang met ongelowiges en sondaars nie. Bid dat die hart van Christus in die Kerk sigbaar sal wees..

Saterdag 8 Mei 2010

Hebreërs 5:4-5 Niemand eien hom die eer as hoëpriester toe nie, hy word deur God daartoe geroep, net soos Aäron. So het Christus Hom ook nie die waardigheid as hoëpriester toegeëien nie, God het dit vir Hom gegee, toe Hy gesê het: “Jy is my Seun, van vandag af is Ek jou Vader. En op ‘n ander plek sê Hy: “Jy is ‘n priester vir ewig volgens die priesterorde van Melgisedek.”

OORDENKING: God het Jesus gekies as die mensdom se verteenwoordiger by Hom. Hy wou geen ander persoon of wese hê om die werk te doen nie, behalwe Sy seun. Dit was slegs Sy Seun wat God se hart vir mense verstaan het. Omdat Hy van God gekom het en na God teruggekeer het, kan Hy ons ook daarheen neem. Omdat Hy een is met God, kan Hy ons ook een maak met God. God het hierdie heerlike taak aan Hom toevertrou: die versoening tussen God en die mens.

PERSOONLIK:  Jesus ontvang groot eer wanneer Hy vir sondaars intree. Dit is waarom Hy gekom het en waarom Hy die heerlikheid wat Hy saam met die Vader gehad het, prysgegee het. Elke keer as ons tot Jesus pleit vir genade, ontvang Hy eer. Elke keer as ons ‘n belofte van God glo en vir Jesus vra om dit te vervul, word Hy in die Vader se teenwoordigheid verheerlik. Wil jy Hom ook eer?

GEMEENTE: Bid dat die Kerk die waarheid van God se Woord en Sy beloftes sal begryp en sal begin om Jesus daarvoor te eer deur tot Hom te bid en om vir Hom te vra om daardie beloftes te vervul. Geloof is presies dit – om te glo dat God se beloftes die waarheid is en dat dit vervul sal word as gevolg van Jesus.

Sondag 9 Mei 2010

Hebreërs 5:7-8 Gedurende sy aardse lewe het Hy aan God, wat Hom uit die dood kon red, gebede en smekinge geoffer met harde geroep en met trane. En sy gebede is verhoor vanweë sy eerbiedige onderworpenheid aan God. Alhoewel Hy die Seun was, het Hy deur alles wat Hy gely het, geleer wat gehoorsaamheid is.

OORDENKING: Wat Jesus vir ons wou doen, moes hy eers vir Homself doen. Om te kwalifiseer vir die werk om ons te heilig, moes Hyself eers geheilig word. Hy moes leer om as ‘n menslike wese in ‘n verhouding met God te staan. Die feit dat Hy met ‘n luide stem en trane gebid het, dui op Sy geweldige worsteling met die swakhede van mense. Hy het Sy eie wil tersyde gestel en die angs vir die dood deurgemaak omdat Hy die beloftes van God verstaan en gehoorsaam aan God se wil was.

PERSOONLIK: Die toets vir Jesus was gehoorsaamheid. Wat Hy gedoen het, wil Hy ons ook leer doen. Hy weet wat dit kos om jou eie wil prys te gee. Hy ken ook die krag wat vrygestel word as ‘n persoon dit kan doen. Sy dood en opstanding stel ons in staat om Sy voorbeeld te volg omdat Sy hemelse krag tot ons beskikking is. Vertrou jy Christus genoeg om bereid te wees om Hom die hele pad te volg? Kom dan na Hom toe en praat met Hom oor jou gehoorsaamheid.

GEMEENTE: Bid dat die Kerk die waarheid sal hoor oor die groot werk wat Jesus gedoen het en dat die waarheid die Kerk in staat sal stel om volkome gehoorsaam te wees aan die wil van God. Bid dat God se wil uitgevoer sal word in die lewe van elke lidmaat van jou gemeente.

Sondag 2 Mei 2010

Hebreërs 4:12-13 Die Woord van God is lewend en kragtig. Dit is skerper as enige swaard met twee snykante en dring deur tot selfs die skeiding van siel en gees en van gewrigte en murg. Dit beoordeel die bedoelings en gedagtes van die hart. Daar is ook niks in die skepping wat vir God onsigbaar is nie; alles lê oop en bloot voor Sy oë. En aan Hom moet ons rekenskap gee.

Oordenking: Die Woord van God is die swaard van die Gees. Ons verstaan dit gewoonlik binne die konteks van geestelike oorlogvoering teen die bose, maar hier is dit duidelik dat die eerste doel van die Woord is om ons harte binne te dring, en om daar die oorgeblewe duisternis in ons te konfronteer. Die Woord van God moet op so ‘n wyse gelees en gebruik word dat die bedoelings van ons harte geopenbaar word. Is jy op so ‘n wyse by die Woord betrokke?

Persoonlik: Jou interaksie met God hang af van jou interaksie met Sy Woord. Die Woord is die Waarheid. Jou lewe moet by die Waarheid aangepas word. Wanneer jy die Woord lees, moet jy die Woord toelaat om jou lewe te ondersoek en jou van jou sonde te oortuig. Bely jou oortredinge en vra die Heilige Gees om jou optrede aan te pas in ooreenstemming met die Woord. Laat jou hart toe om naak en ontbloot voor God se oë te staan.

Gemeente: In tye van herlewing kom geloofsoortuiging grotendeels wanneer die Woord in krag en in waarheid verkondig word. Bid dat die Kerk na die stewige fondament van die Woord sal terugkeer. Bid vir predikers wat die Woord sonder kompromie preek, sodat dit soos ‘n swaard is wat mense se harte sal binnedring.

Saterdag 1 Mei 2010

Hebreërs 4:10-11 … want elkeen wat in die rus van God ingaan, rus van sy werk, net soos God van Syne. Laat ons ons dan beywer om in daardie rus in te gaan.

Oordenking: Dit is oënskynlik twee teenoorgesteldes: “rus van werk” en “beywer om in te gaan”. Rus van werk beteken nie om niks te doen nie. Dit beteken dat ‘besigwees vir God’ nie noodwendig vir jou die vrede sal gee waarna jy soek nie. Hierdie vrede kom slegs wanneer jy geleer het om in intieme gemeenskap met God deur Jesus Christus te rus. Die strewe is om in te gaan; dit beteken om lang tye in God se teenwoordigheid deur te bring, en die Heilige Gees en Jesus toe te laat om in jou te bewerk wat jy self nie kan doen nie.

Persoonlik: Die werk wat gedoen moet word, is om jou geloof te oefen. Om jou geloof te oefen moet jy jou in God se teenwoordigheid plaas, glo dat Hy jou hoor en op Hom wag om met jou te praat. Dan bly jy daar by Hom, terwyl jy partykeer luister, partykeer aanbid en partykeer die Woord se beloftes as’t ware ‘terugbid’ na Hom. Here, help ons om in te gaan en U teenwoordigheid te ervaar!

Gemeente: Bid dat God barmhartig sal wees en ‘n gees van gebed op die kerk sal uitstort. Soek ander gemeentelede op en begin om saam te bid en God te soek vir jou gemeente.