Utopia, ‘n wêreld wat nie bestaan nie Lukas 20:45 – 21:19

INLEIDING

Ons leef in twee wêrelde. Die natuurlike en die nie-natuurlike wêreld. Efes 2:19 sê ons is of ‘n bywoner of ‘n burger van die wêreld wat ons verkies.  In terme van hierdie vers is ons of ‘n medeburger van die huisgesin van God [die koninkryk van God] of ons is ‘n bywoner in die huisgesin van God [die koninkryk van God].  Elkeen van ons kies in watter wêreld ons wil leef, God se koninkryk, die nie-natuurlike wêreld, of die natuurlike wêreld. 

Watter een van hierdie twee wêrelde is jou “Utopia”?

 

DIE WêRELD VAN DIE SKRIFGELEERDES

In Lukas 20:45-47 lees ons dat die wêreld van die skrifgeleerdes bestaan uit ‘n soeke na aansien en ‘n verwagting dat mense ‘n ophef van hulle moet maak. 

Hulle was selfgerig en het so aangetrek dat mense hulle sal raaksien. Hulle het die voorste plekke in die sinagoge ingeneem en verwag om as eregaste by maaltye behandel te word.

Intussen het hulle hulleself verryk uit weerlose mense soos weduwees. Hierdie onreg teenoor weerlose mense het hulle probeer wegsteek deur vroom gebede in die openbaar te bid by elke geleentheid wat hulle kon kry. 

Jesus is baie duidelik oor die skrifgeleerdes.  God sal hulle swaar straf.  Hulle verdien die oordeel van God. 

 

DIE WêRELD VAN DIE ARM WEDUWEE  

Haar wêreld lyk heeltemal anders.  Sy het geen status nie en niemand sien haar raak nie.  Dit is juis hierdie soort mense wat deur die skrifgeleerdes uitgebuit word. 

Sy leef met ander waardes. Sy offer haar lewe aan die Here en dien Hom met alles wat sy het.  Sy maak nie aanspraak op enigiets nie, want sy is gewoond daaraan om niks te hê nie.  Vir haar maak dit nie eintlik saak of sy hierdie twee muntstukke in die offergawekis gooi nie, want dit is in elk geval te min om van te leef. 

Daarom leef sy in totale afhanklikheid van God. Sy weet dat haar lewe elke dag van God se genade afhang.  Haar lewe het geen materiële waarborge nie.  Sy leef nie vanuit die natuurlike [vleeslike] wêreld na die nie-natuurlike [geestelike] wêreld toe nie, maar sy leef vanuit God se koninkryk [die geestelike wêreld] na die natuurlike wêreld toe.  Haar waarborg lê nie in die sigbare dinge nie, maar in die onsigbare.  2 Kor 4:18 sê: “Ons oog is nie op die sigbare dinge gerig nie, maar op die onsigbare; want die sigbare dinge is tydelik, maar die onsigbare dinge is ewig”.   

Jesus gaan dan voort in Lukas 21:5-19 om die verskil tussen hierdie twee wêrelde te beskryf:

 

DIE WêRELD VAN DIE SKRIFGELEERDES

Die tempel, die sigbare simbool van die skrifgeleerdes se wêreld, sal afgebreek word. Soos dit ook tussen 35 en 40 jaar later wel gebeur het. Want ons het in 2 Kor 4:18 gelees die sigbare is tydelik.  Die waarde en mag wat die tempel aan die lewens van die skrifgeleerdes gegee het, is dus ook tydelik [Lukas 21:5-6].

Die wêreld van die skrifgeleerdes is ‘n wêreld van misleiding en geestelike en morele verval [Lukas 21:8]. Hierdie wêreld is op valshede en onwaarhede gebaseer. 

Jesus voorspel die tekens van die tye waaraan hierdie wêreld uitgeken sal word [Luk 21:9-11].  Met hierdie tekens is die dissipels in staat om die sigbare, tydelike en verganklike wêreld te onderskei van die onsigbare, ewige en onverganklike wêreld – die koninkryk van God. 

‘n Nog duideliker teken waaraan die verganklike en die onverganklike wêrelde uitgeken sal word, is die vervolging van die gelowiges [Luk 21:12].  Geen vorm van vervolging is deel van God se koninkryk nie. Gelowiges het nie die reg om mense wat van hulle verskil te veroordeel of te verwerp nie, want dit is nie hoe God met hulle maak nie. Die enigste gemeenskaplike faktor wat mense aan God en aan mekaar as geloofegemeenskap bind, is God se liefde.  Geen ander kriteria is toelaatbaar nie. 

 

DIE WêRELD VAN DIE ARM WEDUWEE

Die wêreld van die skrifgeleerdes, die verganklike wêreld, is in diens van die wêreld van die arm weduwee.  Die natuurlike, verganklike wêreld het geen bestaansreg op sy eie nie.  God gebruik dit net om Sy koninkryk mee te bevorder.  Wanneer Jesus sê die tempel sal afgebreek word, bedoel Hy die hele wêreld wat deur die tempel gesimboliseer word sal saam met die tempel vernietig word.  Daarom is vervolging vir die dissipels ‘n geleentheid om van Jesus te getuig, want dissipels se lewe word nie gedefinieër deur vervolging of nie-vervolging nie, maar deur die liefde van God [Luk 21:13].

Vervolging inspireer gelowiges ook om nog meer op die Heilige Gees ingestel te wees en om God se stem te hoor. Dit help ook om vrees vir die vervolgers te oorkom [Luk 21:14].  Stefanus het opgekyk na die hemel en die heerlikheid van God gesien en Jesus aan die regterhand van die Vader sien staan [Hand 7:55-56].

Vervolging is God se geleentheid om te wys dat sy Gees in sy dissipels werk en aan hulle woorde van wysheid gee wat groter as die verganklike wêreld is [Luk 21:15].  Die Joodse Raad was verbaas om te sien met watter vrymoedigheid Petrus en Johannes voor hulle getuig, al was hulle mense van die arm weduwee se wêreld [Hand 4:13].

Deur vervolging openbaar God hoe Hy vir sy kinders sorg, want nie eers ‘n haar sal van hulle kop af val nie [Luk 21:18].

In die wêreld van die arm weduwee lei vervolging tot volharding in die geloof.  “Ons verheug ons ook in die swaarkry, want ons weet: swaarkry kweek volharding ….[Rom 5:3-5].  Dit is wat Jesus bedoel wanneer Hy sê deur volharding moet ons onsself red. 

 

UTOPIA – LEEF JY VIR ‘N WêRELD WAT NIE BESTAAN NIE?   

Die wêreld van die skrifgeleerdes bestaan nie.  Dit is tydelik.  Dit sal vernietig word, want dit is gebaseer op stryd en verdeeldheid tussen mense. 

Die wêreld van die weduwee bestaan wel.  In hierdie wêreld is ons bereid om ons lewens te verloor [Luk 9:24].  ‘n Wêreld waar die wolf en die lam saam wei [Jes 65:25]. Dit is die ewig en onverganklik.         

 

WATTER WêRELD IS JOU TUISTE?   WATTER WêRELD IS JOU UTOPIA?

In watter wêreld is jy ‘n bywoner?

In watter wêreld is jy ‘n burger?       

AMEN

Continue Reading

SAMEL DIE OES IN

Skriflesing: Johannes 4:27-42

Teks: Joh 4:34-42

 Dam of fontein

Verlede week het ons gepraat oor Joh 4:13-14 waar Jesus sê die water wat Hy ons sal gee, sal in ons ‘n fontein word met water wat opborrel en aan ons die ewige lewe gee.  As ons Jesus as ons Verlosser aanneem, onvang ons die ewige lewe en hierdie ewige lewe kan ons nie vir onsself hou nie. Ons kan nie soos ‘n dam wees wat water opgaar nie, ons word ‘n fontein wat water verskaf. 

Hierdie verse is ‘n samevatting van wat Jesus op aarde kom doen het.  Dit onderskei ook die verskil tussen dit wat God deur Jesus kom doen en ons rol as dissipels.  In sy gesprek met die dissipels nadat die vrou terug is dorp toe om haar man te gaan roep, sê Hy hulle moet die oes insamel, hulle hoef nie die saad te saai nie.  Gelowiges dink baie keer hulle moet die saad saai, en omdat dit so moeilik is, gee hulle moed op en versuim hulle roeping om dissipels van Jesus te wees elke dag.  Hierdie opdrag van Jesus stel dit weer baie duidelik, God saai die saad, sy volgelinge samel die oes in. 

Joh 4: Jesus saai, die dissipels oes

In Jesus se gesprek met die vrou by die put is dit baie duidelik. Hy doen die oortuigingswerk.  Hy neem die gesprek na ‘n geestelike vlak en bied vir haar lewende water aan.  Hy openbaar Homself aan haar deur haar persoonlike lewe aan haar uit te lê.  Hy hanteer die godsdienstige verskille tussen die Jode en die Samaritane. Hy openbaar Homself aan haar as die Messias.  Eers dan kom die dissipels terug van die dorp af, nadat Jesus klaar “die saad gesaai het”.  Terwyl die vrou weg is dorp toe om haar man te gaan haal, gee Jesus aan hulle die opdrag om die oes in te samel. Hulle hoef nie die werk van God te probeer doen nie, hulle kan net hulle eie werk doen en die oes insamel. 

Daar is ‘n baie groot verskil tussen saai en oes.  Jy gebruik ander implimente, jy kan nie met ‘n ploeg ‘n koringland gaan stroop nie.  Jy gebruik ‘n sekel of ‘n stroper. Baie keer sê ons dissipelskap is moeilik, want ons verstaan ons rol verkeerd. 

Jesus saai, die dissipels oes

Ons lees dieselfde oprdag in Matt 9:35-38 waar Jesus die menigte sien, hulle innig jammer kry en vir sy dissipels sê “die oes is groot, maar die arbeiders min. Bid dan die Here aan wie die oes behoort, om arbeiders uit te stuur vir sy oes”.   

In Matt 10:5-8 sê Jesus ook die dissipels moet gaan verkondig: “Die koninkryk van die hemel het naby gekom. Maak siekes gesond, ….”. Die dissipels se opdrag is gebaseer op dit wat God klaar kom doen het deur die koninkryk van God te laat aanbreek.

In die Ou Testament saai God ook

In Josua 24:13 sê God ook aan Israel “Ek het julle ‘n land gegee wat julle nie bewerk het nie, stede wat julle nie gebou het nie…julle eet van wingerde en olyfbome wat julle nie geplant het nie”. En in vers 24 “Betoon dan nou eerbied aan die Here en dien Hom met opregtheid en trou. Sien af van die gode ….”.  God het gesaai deur aan hulle ‘n land te gee wat hulle nie bewerk het nie. Al wat Israel moes doen, is om aan Hom gehoorsaam te wees en so die “oes” in te bring.      

Na Pinkster saai die Heilige Gees

In Handelinge 8 sien ons hoe Filippus die oes gaan insamel in Samaria.  Jesus sê vir sy dissipels in Hand 1:8 hulle sal krag ontvang wanneer die Heilige Gees oor hulle kom en hulle sal sy getuies wees in Jerusalem sowel as in die hele Judea en Samaria en tot in die uithoeke van die wêreld. Ons is slegs die getuies van wat Jesus klaar gedoen het.  Hier gaan Filippus juis na Samaria, die eerste plek buite die Joodse gebied, soos wat Jesus ook gedoen het in Johannes 4.  Al wat Filippus doen, is om te doen wat Jesus gedoen het, in die krag wat die Heilige Gees aan hom gegee het. Hy verkondig Christus, dryf bose geeste uit, genees verlamdes en kreupeles. Dit het groot blydskap in die stad gebring.

Om te oes is maklik

 God verwag nie dat ons Sy werk moet doen nie. Hy sluit ons in by wat Hy klaar gedoen het en by dit waarmee Hy besig is.

Dissipelskap is om God toe te laat om Sy werk in jou lewe te doen, sodat jy ander kan vertel hoe dit is.  Die werk wat Hy in jou doen, maak jou ‘n fontein van lewende water wat opborrel en aan ander dieselfde water verskaf.  Dit is in die wese van ‘n fontein om water te verskaf.  As ons egter aan onsself dink as ‘n dam, is dit baie moeilik om die oes in te samel. 

Kweek by jouself die bewustheid dat jy ‘n fontein is.

Kweek by jouself die bewustheid dat jy die oes moet insamel.  Dit is waarvoor God jou geroep het.

Wat is daar in jou lewe wat jy nog nie aan die Heilige Gees oorgegee het nie?

Wat probeer jy nog in jou eie krag vermag? 

AMEN

Continue Reading

Lewende water Skriflesing: Johannes 4:1-24

Inleiding
Jesus is besig om die roeping van sy Vader uit te voer en in die proses leer Hy ons wat dissipelskap is. Hy leer ons dat dissipels nie ‘n ander roeping as Hy het nie. Dissipels moet net voortsit wat hy kom doen het.
Ons vra dikwels: “Wat is God se roeping vir my?” Dit is ‘n eenvoudige antwoord. Ons soek gewoonlik baie ingewikkelde antwoorde, en verwar onsself net daardeur. Jesus se lering is eenvoudig. As ons Hom aanneem as ons Verlosser, word ons ‘n fontein van water wat opborrel tot die ewige lewe. Ons kan nie soos ‘n dam bly wat net water opgaar nie, deur die wedergeboorte maak God ons ‘n fontein wat water van die ewige lewe voortbring.
Wat kom Jesus doen?
Joh 4:13-14 is ‘n samevatting van wat Jesus kom doen op aarde. Wie Hom aanneem, ontvang die ewige lewe. Wie Hom aanneem, verander van ‘n dam na ‘n fontein deur die wedergeboorte [regeneration] wat God deur sy Gees in jou bewerk. Dit is waarvan Joh 1:13 praat. God se vaderskap beteken dat ons nie meer deur ons menslike natuur beheer word nie, maar deur die Heilige Gees [Rom 8:11].
Wedergeboorte [regeneration]
Jesus verduidelik die wedergeboorte aan Nikodemus in Joh 3:1-21.
Petrus verduidelik dit ook soos volg: 1 Pet 1:3 – “Lofwaardig is die God en Vader van ons Here Jesus Christus! Dit is hy wat ons in sy groot ontferming, deur die opstanding van Jesus Christus uit die dood, opnuut verwek het, sodat ons ‘n lewende hoop mag hê” [2014 Direkte vertaling].
Ook in Titus kry ons ‘n mooi beskrywing van die wedergeboorte: Titus 3:5-6 – “Hy het ons verlos – nie op grond van werke wat ons uit geregtigheid gedoen het nie, maar op grond van sy ontferming – deur die afwassing van die wedergeboorte en vernuwing deur die Heilige Gees, wat hy ryklik oor ons uitgegiet het deur Jesus Christus, ons Verlosser” [2014 Direkte vertaling].
Fonteine
In die gesprek met die vrou, stuur Jesus haar om haar man te gaan haal. Sodra jy die boodskap ontvang, dat Jesus die Verlosser is, mag jy dit nie vir jouself hou nie. Jy moet dit gaan vertel, al weet jy nog baie min, want jy mag nie ‘n dam wees nie. Jy is ‘n fontein wat water van die ewige lewe verskaf, jy gaar niks op vir jouself nie.
Jesus se ekonomie is, sodra jy die Evangelie-boodskap ontvang het, moet jy dit gaan oorvertel. Net wat jy gehoor en ervaar het. Jy hoef niks meer te doen nie. In vers 29 lees ons dat die vrou in die dorp gaan oorvertel wat met haar by die put gebeur het, al is sy self nie eers seker van wie is die man wat met haar gepraat het nie. Die belangrike is dat sy gaan vertel het.
Hoe word dissipels fonteine?
Ons sien hoe Jesus dit doen in Joh 1:35-51.
 Johannes die Doper getuig: “Daar is die Lam van God”
 Andreas en nog ‘n dissipel van Johannes volg Jesus
 Andreas gaan roep sy broer, Simon Petrus
 Jesus spreek profeties oor Petrus se lewe, sodat hy kan sien dat Jesus die Messias is
 Jesus roep vir Filippus
 Filippus getuig teenoor Natanael
 Natanael twyfel, Jesus spreek profeties oor Natanael, sodat hy kan sien dat Jesus die Messias is.
Die dissipels gaan vertel ander en Jesus doen die oortuigingswerk. Dit is die patroon van Jesus se ekonomie.
Is jy ‘n fontein?
Jy hoef nie alles te weet nie, jy getuig net oor wat jy weet en ervaar het. Baie van die Samaritane het tot geloof in Jesus gekom oor wat die vrou van Jesus vertel het.
Dit gaan nie oor wat jy van Jesus weet nie, maar oor die lewensverandering wat jou ontmoeting met Jesus in jou lewe veroorsaak het.
Jesus roep eenvoudige vissermanne en maak hulle fonteine van lewende water. Ek en jy kan niks doen om ‘n fontein te word nie, God het dit klaar gedoen met die wedergeboorte toe jy jou lewe vir Hom gegee het. Ons moet net gehoorsaam wees en nie die fontein se water laat wegvloei nie. Dit moet mense se lewens bereik.
Doen jy dit?
AMEN

Continue Reading

Geloof is ‘n Verhouding Skriflesings: Gen 1:26-28 en Kol 2:9-10

Inleiding

Waaruit bestaan jou geloof, jou lewe saam met God?

So baie mense wil dit ‘n wetenskap maak.  As ek nie die bestaan van God en die skepping  logies kan verklaar nie, glo ek nie.  Ander mense wil geloof ‘n godsiens maak. Vir hulle is geloof ‘n wet of godsdienstige reëls wat nagekom moet word.  Hulle kies ‘n teologie en dan moet God en mense in daardie raamwerk inpas.

Van die begin af, sê die Bybel, is geloof ‘n verhouding.  Die skeppingsverhaal is die verhaal van God se verhouding met die mens.  God skep nie net die mens soos Hy die ander wesens geskep het nie; met die skepping van die mens bring God ‘n verhouding tussen Hom en die mens tot stand.

Continue Reading

Liefde maak vry

Skriflesing: Joh 20:26-31 en 21:15-19

Inleiding

Ons is in die seisoen van menswaardigheid. 

Wat gee aan my lewe waarde?   Hoe gee ek aan ander mense se lewens waarde? 

Twee dinge gee waarde aan ons lewens: liefde en vryheid. 

Jesus se opstanding uit die dood is God se waarborg dat Hy ons liefhet en ons wil bevry van alles wat ons menswaardigheid van ons wegneem. Alles wat verhinder dat ons tot ons volle reg kan kom.  Deur Jesus se dood aan die kruis en sy opstanding uit die graf, maak God dit vir ons moontlik om te word wie Hy wil hê ons moet wees. 

Jesus se liefde maak ons vry.  Vryheid gee waarde aan mense se lewens. 

In Joh 20 en 21 lees ons van Jesus se verskynings aan sy volgelinge voor sy hemelvaart.  Met hierdie verskynings kom herstel Jesus die verhouding tussen hulle, sodat sy volgelinge  gereed is om die Heilige Gees te ontvang.  Ons kyk hoe dit plaasvind in Tomas en Petrus se lewens.

Continue Reading

Kommentaar en navrae

  • Avatar

    Elrike Claassen

    |

    Jong dame, eerstejaars student in 2018, opsoek na studente verblyf.
    Ernstig oor studies, verantwoordelik en het sober gewoontes(rook en drink of kuier nie). Verkieslik veiilige ondedak parkering vir klein motor.
    Prysklas tussen R1500-R2500.

    Kontak my asb.
    0822380396

  • Avatar

    Kobus Kloppers

    |

    Baie dankie vir die preek. Baie geniet en baie stof tot nadenke gegee.

    Seenwense

  • Avatar

    Rethie van Niekerk

    |

    Daar is 3 skakels na die inskrywingsvorm hier bo, by “Inskrywings sluit 22 Januarie 2018″, “Skryf asb in voor 22 Januarie 2018″ en by “Kliek hier om in te skryf”. 😀
    En hier is die direkte skakel: https://goo.gl/EdsAJS
    Sien uit om julle te sien! [sit dansende mense in jou verbeelding hier]

  • Avatar

    WERDINE

    |

    Rethie,
    ek wil net weet waar skryf ek in vir die kamp? ekt op die link gekliek maar dit gee nie vir my n inskrywingsvorm nie. ek kom kamp toe saam met kobus so sal sommer vorm en geld kan invul en gee. geseende kersfees vir julle.

  • Avatar

    Marie Albertyn

    |

    Goeie Middag
    Ek sien u het verlede jaar verblyf gesoek vir u seun. As u van nog seuns weet, ek het n baie lekker kamer met kombuis en badkamer vir n seun.
    Tel.: 041-5831173 of 0842513492