Liefde maak ons anders – Johannes 18:28-40 Preek
Dwarsdeur die 1990’s het mense week na week vasgenael gesit voor hulle TV’s terwyl FBI agente Mulder en Scully die waarheid soek in die reeks “The X Files”. Mulder en Scully het “bonatuurlike” verskynsels ondersoek. Scully was skepties. Sy het gesukkel om te glo dat alles in die wêreld nie ’n logiese, wetenskaplike verklaring het nie.
Mulder, aan die ander kant, was die teenoorgestelde. Agter sy lessenaar het ’n plakkaat van ’n vlieënde piering gehang met die woorde: “I want to believe”. Hy wou elke moontlikheid ondersoek, wou hê dat daar ’n bonatuurlike realiteit is.
Die X-Files het dit wat ons weet en dit wat ons wíl weet voorgehou met die twee sinne: “The truth is out there” en “I want to believe”.
Vandag het ons baie van ons naïwiteit van die 90’s verloor. Maar die vraag na waarheid en geloof – en kleingeloof en goedgelowigheid – bly net so relevant. Ons leef in die era van “fake news” en google en wiki’s, waar enige iemand enige inligting op die internet kan laai en die “waarheid” kan noem. Ons almal het al iewers geval vir ’n slenter, “share” gedruk op ’n storie wat nie die waarheid was nie (al weet jy dit nie).
Ons is oorlaai met inligting. En die vraag raak al hoe dringender: wat is waar?
Soos ’n mens sou verwag, het Mulder en Scully nooit “die waarheid” gevind nie. Die antwoorde was altyd vaag, altyd oop vir interpretasie. Die waarheid bly “out there”.
Dan wieg ons vandag heen en weer tussen goedgelowig en kleingeloof. Baie van ons voel soos Mulder: “I want to believe”. Maar die waarheid bly ons ontwyk, bly onbevredigend. En ons bly op ’n ewige soeke na waarheid.