Psalm 19 Huisgodsdiensmateriaal – 13 Nov 2011

Rus

  • ­ Vertel vir mekaar hoe en waar julle vandag God se sorg beleef het.
  • ­ Laat iemand bid en vir die Here vra om met julle te praat.

 Hoor

Lees Psalm 19 of luister na Louis Brittz se verwerking daarvan op die CD “Psalms en ander geestelike liedere”. 

Vir die dirigent.  ‘n Lied van Dawid.

As ‘n mens na die hemel kyk wat God gemaak het, kan jy sien hoe groot en sterk hy is.  In die dag en in die nag is die hemel soos iemand wat vertel hoe wonderlik God is.  Die hemel praat nie regtig nie, maar dit wys hoe groot God is.  ‘n Mens kan dit enige plek op aarde sien.  Die hemel is soos ‘n tent vir die son.  In die oggend kom die son uit die tent.  Die son loop oor die hemel soos iemand wat baie trots en bly is.  Die son skyn oral en maak alles warm.

Die Here se Woord is net so wonderlik.  Dit gee jou nuwe krag.  Dit help ‘n mens om te weet wat jy moet doen.  Die Here se wette is reg.  As ‘n mens dit doen, maak dit jou bly.  Dit laat jou verstaan wat jy moet doen.

Dis goed om vir die Here respek te hê.  Die Here se Woord is waar.  Die Here se Woord is meer werd as baie goud.  Dit is lekker om sy Woord te lees.  Dit help ‘n mens om reg te lewe.  As ‘n mens na sy Woord luister, sal dit baie goed gaan met jou.

‘n Mens doen so maklik sonde sonder dat jy dit weet.  Moet my nie straf oor sonde waarvan ek nie weet nie, Here!  Keer my ook dat ek nie moedswillig sonde doen nie.  Ek is bang dat ek sonde begin doen waarmee ek nie kan ophou nie, Here. As U my help, sal U my nie hoef te straf nie.  Help my om niks te sê of te dink waarvan U nie hou nie, Here!  U is die een wat my beskerm en my red.

  • ­ Gesels oor die Psalm (ouers kan ook kyk na die inligting in die kleingroepmateriaal).  Vertel vir mekaar wat vir julle uitstaan in die Psalm – wat sê dit vir julle?
  • ­ Vertel vir mekaar wat julle laat onthou dat God daar is.  Hoe help die natuur julle om te ont-hou hoe wonderlik God is?
  • ­ Vertel vir mekaar hoe julle God se stem hoor uit die Bybel.  Ouers kan ‘n storie vertel van ‘n spesifieke geleentheid wat God met hulle gepraat het.

 Leef

  • ­ Laat almal in die tuin uitgaan en iets kry wat hulle laat dink aan God se teenwoordigheid.  Kom terug en vertel vir mekaar hoekom jy dit gekies het.  Spandeer hierdie week tyd in die natuur en loof die Here vir sy wonderlike skepping.
  • ­ Eet heuning en sê vir God dankie dat sy Woord net so wonderlik is!
  • ­ Gaan deur jul gebedslys – is van jul gebede al beantwoord?  Sê dan dankie!  Maak ‘n lys van die goed waarvoor julle hierdie week gaan bid.  Bid  saam vir mekaar en die ander dinge op jul lys.

 

Lewer kommentaar

This site uses Akismet to reduce spam. Learn how your comment data is processed.