Wees bly dat die Gees op jou rus – Sondag 15 Desember 09:00

Die “stomp van Isai” waarop die Gees van die Here rus, is ‘n baie bekende metafoor uit Jesaja 11:1-10. Dit is trouens die teks wat vir die ontwerp van baie adventskranse gebruik word. Dit is ook die inspirasie vir ‘n uitnemende mosaïek van Elsa Schmidt by die Universiteit van Yale, “The Tree of Jesse.”

Dat sy juis mosaïek gebruik vir haar kunswerk, is geïnspireerd. Want, soos met ‘n stukkie in ‘n mosaïek raak die boodskap van Jesaja 11 al hoe helderder hoe meer ‘n mens die ander stukkies begin raaksien.

Die raakpunte met die tema van ‘n “oorblyfsel” wat nie net in die profete nie, maar al in die wet van Moses ‘n belangrike tema is. Die opeenvolging van geboortes in die koninklike stamboom van Dawid. Totdat die “stomp van Isai” uiteindelik in die geboorte van Jesus sy volle ontknoping kry. Jy die mosaïek se boodskap begryp.

Soos ‘n mens se perspektief egter nog wyer raak, sien jy die verwysings van Petrus (Hand 15) en Paulus (Rom 8; 15) na die “stomp van Isai” raak. Kom jy agter dat ‘n “oorblyfsel” uit die nasies ook in dié mosaïek van Jesaja 11 ingesluit is. Dat selfs jy deel is van die “oorblyfsel” waarop die Gees van die Here rus, soos Petrus in sy eerste brief skryf.

Petrus sit die laaste stukkie van die mosaïek vir ons in die geheelprent neer. Waaruit ons kan sien dat selfs ons lyding geïnkorporeer is in die boodskap van die “stomp van Isai”. Dat ons in lyding hierdie werklikheid van die Gees wat op ons rus, moet vashou. Dat dit ‘n vreugde is as jy vir die Here ly, al dink ander dit is dwaas. Want, jy is deel van die “oorblyfsel” wat uit die stomp van Isai groei (1 Pet 4:12-19).

En dit alles het begin by die teks in Jesaja 11:1-2:

“Maar daar sal ’n takkie uitspruit uit die stomp van Ísai, en ’n loot uit sy wortels sal vrugte dra; en op Hom sal die Gees van die Here rus, die Gees van wysheid en verstand, die Gees van raad en sterkte, die Gees van kennis en van die vrees van die Here.”

Kom luister Sondag 09:00 na wat die Gees vir jou wil sê.
NGK Somerstrand, Louis Bothasingel 77, Somerstrand, Port Elizabeth

Lewer kommentaar

This site uses Akismet to reduce spam. Learn how your comment data is processed.