Moenie vir die Duiwel plek gee nie – Familiediens Sondag 8 Augustus 09:00

Ek het verlede week vier aspekte uitgelig waar die Algemene Sinode diversiteit in standpunte toegelaat het wat tot onsekerheid en onrus in die kerk gelei het. Dit is duidelik – en die Algemene Sinode van 2019 erken dit self ruiterlik – dat hulle vasgeloop is in terme van Skrifverstaan en Skrifuitleg. Wat egter ontstellend is dat die Algemene Sinode in dieselfde asem dink dat die eenheid van die kerk nie op die spel is wanneer oor die Skrif verskil word nie. Niks kan verder van die waarheid wees nie! Die eenheid lê in die waarheid volgens Efesiërs. Eenheid lê nie in die verskille oor die waarheid nie. Dit is die punt van Efesiërs 4:1-16.

Dink maar aan die onlangse rugby reeks tussen die Britse en Ierse leeus en die Springbokke. En Rassie Erasmus wat só ernstig gevoel het oor die verskille in die interpretasie en toepassing van die reëls in die eerste toets dat hy ‘n video gemaak het om dit uit te lig. Hy gaan waarskynlik nou aan die pen ry daarvoor, maar ná sy video kan niemand met hom verskil dat dit nie inderdaad só was nie. Net maar deur te sien hoe die twee kapteins nie met dieselfde respek hanteer is nie, wys dit al vir jou helder uit. Geen wonder die tweede toets wat ‘n perd van ‘n ander kleur nie. Want, die skeidsregter het bykans alle beslissings reg hanteer. En baie spesifiek ons kaptein Siya Kolisi met respek hanteer het. Dit was groot lekkerkry vir ons sportmal land se bevolking.

Nou, hoe moet ‘n mens oor hierdie debat dink?

Ek dink op twee maniere.

Die eerste is dat die verskille ‘n goeie ding is. Dit het ‘n suiwerende effek. Talle gemeentes en leraars begin hulle stem laat hoor. Die gesprekke en debatte kring uit sodat daar omtrent nie ‘n dag is wat daar nie een of ander brief of bydrae êrens in die media verskyn nie.

Die tweede is dat die verskille ‘n slegte ding is. Dit het ‘n verdelende effek. Dit gee die Duiwel vastrapplek in ons geledere sodat hy met sy leuens en misleiding onvrede en onrus kan saai.

Dit is presies hoe hy in die gedaante van ‘n slang die eerste mensepaar in sonde laat val het:

“Is dit werklik só dat God gesê het …” (Gen 3:1; 2 Kor 11:3; Openb 12:9).

Dit is presies hoe die Duiwel vir Jesus in die woestyn verlei het:

“As u die Seun van God is …” (Matt 4:3, 6).

En let op dat die Duiwel in sy verleiding ook een keer die Skrif gebruik het deur uit Psalm 91:11-12 aan te haal om Jesus te oortuig om van die hoogste punt van die tempel af te spring, want God het tog sy engele beveel het dat Hy nie sy voet teen ‘n klip sal stamp nie. En Jesus het elke keer met die regte gebruik van die Skrif gekom om die versoeking te weerstaan.

“Daar staan geskrywe …” (Matt 4:4, 7, 10).

Kom luister verder na wat Paulus ons in Efesiërs 4:17-5:5 wil leer oor die eenheid wat in die waarheid gesoek moet word.

Comments (3)

  • Alwyn Du Plessis

    Môre Chris .Help asseblief. Hoekom verkry die duiwel sterstatus in 2920 Bybelvertaling met ‘n hoofletter D Efesiers 4:27
    Groete

    • Chris van Wyk

      Ek weet nie regtig die rede nie. Die 2020-vertaling vertaal al tien voorkomste van Duiwel in die NT regdeur met ‘n hoofletter. Dit is nogal vreemd met die “die” vooraan.

Lewer kommentaar

This site uses Akismet to reduce spam. Learn how your comment data is processed.