Luisterblad 11-17 September

PERSOONLIKE LUISTERTYD

RUS

Raak stil. Dink na oor wat die afgelope 24 uur gebeur het. Dank God vir die goeie. Gee vir Hom die slegte.

HOOR

  • Lees 1 Timoteus 2:1-7. Fokus op wat jou tref.
  • Kies een gedagte wat jou tref en dink daaroor na. Dink veral na oor die praktiese betekenis daarvan vir jou.
  • Antwoord die Here in gebed.
  • Geniet ‘n paar oomblikke die teenwoordigheid van die Here sonder woorde.

LEEF

Paulus is baie ernstig daaroor dat dit God se wil is dat alle mense gered word en tot kennis van die waarheid kom.  Die gemeente is immers die draer van die waarheid (3:15).  Dit is na alles ook die hart van Paulus se roeping, om die boodskap van die waarheid aan alle nasies te bring.  Hiervoor moet ons as gemeente voortdurend en volhardend intree en werk.”  Maak dit jou gebed en getuienis vir hierdie week.  Dank die Here ook vir ons sendelinge wat juis hiermee besig is reg oor die wêreld.

SAAMLUISTER

Ingenooi deur God

Vertel vir mekaar waar julle tans op julle geestelike reis is.  Open met gebed.

Ingaan in God se tyd

Psalm 79 is waarskynlik gebruik deur die klein gemeenskappies van Jode wat in die land agtergebly het in die ballingskap.  Dit druk die afgryse van die agtergeblewenes – wat krepeer van die ellende van hulle verlies – op treffende wyse uit. Daarmee het dit ’n Psalm geword vir enigiemand wat ’n uitmergelende verlies ervaar het en smag na uitkoms en ommekeer.  Jy kan dié Psalm as basis vir jou eie gebed tot God gebruik.”  Laat iemand Psalm 79:1-9 biddend voorlees.  Gee ruim tyd vir biddende nadenke.

Luister na God se Woord

Lees 1 Timoteus 2:1-7. Gee kans dat elkeen rustig op hul eie oor die teks reflekteer.  Wat staan vir jou uit, wat tref jou?

Luister na mekaar

Vertel vir mekaar wat julle gehoor het in die teks.  Wat ruk jou?  Wat troos jou?  Luister na mekaar sonder om daarop kommentaar te lewer.

Luister na ander en die tye 

Soos in die brief aan Efese word gebed as een van die belangrikste dinge genoem wat ‘n gemeente kan beoefen.  En die gebed is nie net privaat vir die behoeftes van enkelinge of selfs van die gemeente nie, maar vir alle mense.  Hoewel regeerders uitgesonder word, veral met die oog op ‘n rustige en stil lewe in volkome toewyding aan God in alle eerbaarheid, bly die fokus alle mense.  En Paulus is baie ernstig daaroor dat God se wil is dat alle mense gered word en tot kennis van die waarheid kom – en onthou dat die gemeente die draer van die waarheid is, soos ons in die volgende hoofstuk sien (3:15).  Dit is na alles ook die hart van Paulus se roeping, om die boodskap hiervan aan alle nasies te bring.  Die boodskap van Christus as Middelaar, waaroor die Heidelbergse Kategismus so roerend praat, is die motivering vir sy lewensmissie.  Almal moet hoor van die Middelaar wat versoening bring tussen mense en God.  En hiervoor moet die gemeente voortdurend en volhardend intree.” Bespreek.

Luister weer na God se Woord

Hoe het jou luister na mekaar en na die inset hierbo jou luister na die teks verander of bevestig?  Wat maak die Heilige Gees nou vir jou duidelik?

Fokus op wat God nou doen

In hoofstuk 3 skets Paulus die wyse waarop die leierskap in die gemeente moet funksioneer: 1) as gemeente van die lewende God, en 2) as “die draer en beskermer is van die waarheid.”  Bespreek.

Antwoord met ons lewe

Ons is reisgenote wat telkens vir mekaar bemoedig op ons geestelike reis.  Deel met mekaar wat die Here nou van jou vra, of vir jou saamgee as belofte of aanmoediging.  Bid dan vir mekaar.

FAMILIE-LUISTER

RUS

Vertel mekaar wat die afgelope 24 uur in julle familie gebeur het. Bid dan saam.  Dank God vir die goeie. Gee vir Hom die slegte en bid vir verandering.

HOOR

Gebruik Die Nuwe Testament vir kinders in ‘n taal wat hulle verstaan se vertaling:

“1–3 Ek wil hê dat julle vir ander mense moet bid. Julle moet God vra om hulle te help. En moet asseblief nie vergeet om vir God dankie te sê wanneer Hy iemand help nie. Ons moet ook bid vir al ons leiers. Bid byvoorbeeld vir ons president en vir al die ministers in ons land. Bid ook vir die leraar, die diakens en die ouderlinge. Ons moet ook bid vir ons skoolhoof en al die onderwysers en die polisie—sommer vir almal in ons dorp. Mense sal dan nie so baie met mekaar baklei nie. Dan sal ons lewe ook lekkerder wees. Dit is waarom God wil hê dat ons vir ander mense moet bid. As mense nie kort-kort met mekaar baklei nie, kan ’n mens ook makliker leef soos wat God wil hê ons moet leef.

4–7 Ons moet altyd onthou dat God wil hê dat elke mens sy beste vriend moet wees. Hy wil ook hê dat ons Hom goed moet ken. Wil jy graag weet hoekom ons God moet liefhê? Ons moet onthou God is sommer baie belangrik. Daar is net een ware God. Daar is regtig niemand anders wat is soos Hy nie. En dit is net Jesus wat ons kan help om weer vriende met God te word. Ons het verkeerd gedoen, en God moes ons eintlik daarvoor straf. Maar Jesus was bereid om ons straf te dra. Hy het toe in ons plek aan die kruis gesterf. Dit het ook nie alles sommer net per ongeluk gebeur nie. O nee, alles het net op die regte tyd gebeur—presies soos God dit beplan het. Dit is darem baie slim van God dat Hy hierdie plan uitgedink het! God het ook vir my gesê dat ek aan ander mense moet gaan vertel dat Hy ons weer sy vriende wil maak. Daarom is ek ’n leraar. Ek wil graag hierdie goeie nuus vertel aan almal wat nog nooit van Jesus gehoor het nie. So kan hulle ook die regte God leer ken en sy beste vriende word. Alles wat ek julle hier vertel, is die waarheid.

Vertel vir mekaar wat julle in die teks tref.

LEEF

Gebruik die volgende as riglyn om saam te bid:

Vou jou hande eers saam voor jou asof jy besig is om te bid.  Hou jou oë oop sodat jy jou hande kan sien. 

  1. Jy sal sien dat die naaste vinger aan jou is jou duim. Omdat dit die naaste aan jou is, herinner jou duim jou om te bid vir dié wat die naaste aan jou is.  Bid vir jou ouers en jou boeties en sussies.
  2. Die volgende vinger is jou wysvinger. Ons gebruik dit om te wys na iets.  Laat dié vinger jou herinner om te bid vir dié mense wat vir jou die regte rigting wys.  Bid vir jou onderwysers by die skool, jou kategese onderwysers en jou predikant(e).
  3. Die volgende vinger is die langste vinger, jou middelvinger. Dit herinner ons daaraan om vir ons leiers te bid.  Bid vir die president en die ander leiers in die regering en in jou dorp of stad.
  4. Die vierde vinger is die ringvinger. Dit is die vinger wat moeilik op sy eie kan beweeg en eintlik die swakste vinger is.  Bid dus vir dié mense wat siek is.
  5. Die volgende vinger is die kleinste vinger, jou pinkie. Dit herinner jou dat jy ook kan bid vir jouself. 

Volgend keer as jy bid, en jy weet nie wat om vir God te vra nie, gebruik dan hierdie Vyf-vinger-gebed om jou te help.

     

Trackback from your site.

Leave a comment

Kommentaar en navrae

  • Avatar

    Chris van Wyk

    |

    Dankie!

  • Avatar

    mariette

    |

    Môre-môre!

    Dankie Chris. Die reeks dra baie praktiese wenke oor en is verrykende luistergenot vir elkeen. Elke dag iets nuuts om na uit te sien!

    Seën daarop toegebid
    Mariette

  • Avatar

    Chris van Wyk

    |

    Nee, Elmarie, jy hoef nie. Ons kan 250 mense akkommodeer. Skryf net in by die deure. Baie welkom.

  • Avatar

    Prof Elmarie Venter

    |

    More Ds Chris. Ons is 3 wat wil bywoon. Moet ons nog bespreek? Groete
    Elmarie

  • Vreesloos 1

    |

    […] Pinkster-reeks se titel vanjaar is “Vreesloos”– oor geloof in ‘n tyd waar ons bang […]

  • 21 Mei 2020

    |

    […] Pinkster-reeks se titel vanjaar is “Vreesloos”– oor geloof in ‘n tyd waar ons bang […]

  • Avatar

    Chris van Wyk

    |

    Ons het vir baie lank ‘n versorgingskommissie gehad vir leraars en personeellede. Dit was persone in die gemeente wat gereeld op informele wyse met elkeen van ons kontak gemaak het, belanggestel het in wat in ons lewens aangaan, uitgevra het na uitdagings, en vir ons gebid het. Dit was benewens die diensverhoudingekommissie wat meer op die formele dinge gekonsentreer het. Die inperking het ‘n bietjie daaraan verander, maar dit was ‘n baie goeie informele sisteem van versorging.

  • Avatar

    Des Sampson

    |

    Goeie dag. Ek is voorsitter van die DVK op Hartenbos. Wat doen julle mbt die versorging van predikante en kantoor personeel?

  • Avatar

    Chris van Wyk

    |

    Dit was Rethie van Niekerk se preek. Sy het in die preek verwys na die Hebreeuse woorde.

    Die eerste reël (seën) het drie woorde, dan vyf woorde, dan sewe woorde.  15, 20, 25 konsonante (onthou ʾ is ook ‘n konsonant).  11, 13, 16 lettergrepe (ek het weer getel, en dit is die korrekte aantal).

    24 yĕbārekkā yĕhwâh wĕyišmĕrekā
    25 yāʾēr yĕhwâh pānāyw ʾēlêykā wîyḥunekā
    26 yiśāʾ yĕhwâh pānāyw ʾēlêykā wĕyāśēm lĕkā šālôwm

    Hoop dit maak sin.

  • Avatar

    Annemarie vn Zyl

    |

    NUM 6; GOD SE SEEN, Goeiemore
    Ek het vanoggend hierdie Bybelstudie gedoen en dit was wonderlik. Die deel DIE TEKS verstaan ek egter glad nie. ek kry die aantal woorde reg maar glad nie die konsonante en lettergrepe nie. Ek verstaan ook nie die doel van hierdie deel nie, tensy jy wil bewys dat dit menslik amper onmoontlik is om die seen so te skryf, met die spesifieke aantal konsonante en lettergrepe sonder God se ingryping.. ek sal dit waardeer as iemand die deel in kort vir my verduidelik Baie dankie Annemarie van zyl.

  • Avatar

    Chris van Wyk

    |

    Dankie Corrie! Mooi jaar vir jou.

  • Avatar

    Corrie

    |

    Ds. Chris, soos altyd ń opbeurende en positiewe bydra deur U, vir die toepassing deur die kinders van God. Selfs hulle wat Hom nog nie as hul Saligmaker en Verlosser aangeneem het nie, sal baat by diė insetsel. Ek vra dat God se seën op U sal rus.

  • Avatar

    C Joubert

    |

    Inspirerende en besielende boodskappe

  • Avatar

    Sonja Lizemore

    |

    Beste Ds Chris.
    Net n GROOT DANKIE vir die liedere. Dit is baie spesiaal.

  • Avatar

    Chris van Wyk

    |

    Hi Carol, jy is reg, dit is ‘n kosbare insig! Ek het ook onlangs gepreek oor die inwonende Christus, as jy meer wil lees. Baie seën.

  • Avatar

    Carol

    |

    Baie dankie vir die eerste keer in my lewe besef ek nou wat my probleem is. Ek het nog nie vir JESUS in my ontdek nie dis geen wonder dat my verhouding met JESUS nêrens kom nie. Geen ontmoeting geen kennis of wysheid en GEEN GROEI.

  • Avatar

    Chris van Wyk

    |

    Hi Annelize – ons hou dienste in die kerkgebou (Louis Bothasingel 177, Somerstrand) om 09:00 Sondae tegelykertyd met ons Youtube erediens ook om 09:00. Ons het ook ‘n meer informele Youtube erediens – Pulse – wat van 11:00 af op ‘n Sondag beskikbaar is. Ter wille van die personeel se verlof sal ons DV van 27 Desember tot 24 Januarie nie fisiese eredienste in die kerk hê nie, net die Youtube erediens 09:00. Dié dienste word weer hervat van 31 Januarie af sowel as moontlik ‘n aanddiens om 18:30. As jy hier is, maak ‘n afspraak dat ons jou kan verwelkom. My sel is “nul agt twee 5749191”. Groete, Chris van Wyk.