Youtube erediens 20 September 09:00 – skat in kleipotte

Daar is waarskynlik geen groter uitdaging vir die kerk as die problematiek van die Woord nie. Die Woord word op allerhande maniere “verdun” om in te pas by die ideologieë van hierdie wêreld. Die drade van die Woord word soos ‘n tapisserie uitmekaar getrek om die drade van die ideologieë van hierdie wêreld daarin te weef en dit as die nuwe waarheid vir ons weer te gee. Ons “skryf vandag die Bybel” soos ‘n leraar dit aan my goedkeurend gestel het. Wat ons egter goed moet verstaan, is dat die skat van die evangelie net op een manier helder en duidelik by ons uitkom. Die lig van die evangelie skyn in ons deur die Woord van God. Die Bybel wat jy in jou hand kan hou. Kom luister hoe Paulus dit vir ons in 2 Korintiërs 4 uitlê. Sondag 20 September 09:00 op Youtube.

Youtube
Klein video (99 MB)
Klankbaan (41 MB)
Boek

Continue Reading

Pulse – Die dood raak ons almal – een of ander tyd – 20 September 2020

Jesus se goeie vriend sterf. Hy gaan nie dadelik om Lasarus se susters te ondersteun in hierdie hartseer tyd nie. Verwyte en beloftes volg. Bibleflix, Sondag, 20 September om 18h00 by Pulse. Saam met Ds Jan Theron al die pad uit Windhoek. En net betyds vir Erfenisdag dans ons die Jerusalema, party met meer sukses as ander….. Baie dankie aan Mariné van Joy4Kidz vir jou hulp!

Youtube

Continue Reading

Pulse – Hiskia se Hoogmoed – 13 September 18:00

Koning Hiskia word siek op ‘n kritieke tyd. Die Here het so pas die Assiriërs verdryf uit Israel. Maar, Hiskia se siekte is ‘n teken van swakheid, ‘n politieke nagmerrie. Die Here maak vir Hiskia op ‘n wonderbaarlike manier gesond, maar wat is die Assiriërs se agenda? En die Babiloniërs wil Hiskia intrek in hulle eie opstand teen die Assiriërs … Drama, drama, en nog meer drama … Bibleflix. Sondag, 13 September om 18h00 met Annelet Slazus. Ons gaan kyk ook hoe lyk Huis 5 by die MTR Smit Kinderoord.

Continue Reading

Youtube erediens 13 September 09:00 – Liefde is …

“En nou bly geloof, hoop en liefde,  hierdie drie —  maar die grootste hiervan is die liefde.” Dit is ‘n baie bekende aanhaling. Jy sien dit op T-hemde, tafeldoeke en teen mure. Dit is een van die bekendste dele in die Bybel. ‘n Geliefde vers vir troues. Maar wat is die betekenis van hierdie hoofstuk oor die liefde? Waarom sê Paulus: “die grootste hiervan is liefde”? Waarom sou liefde meer wees as geloof en hoop? Kom luister Sondag 13 September om 09:00 op Youtube.

Skakels

Continue Reading

Youtube erediens 6 September 09:00 – Lewenslange leer

Ek wonder hoe vorder jy met jou CPD punte hierdie jaar – Continuing Professional Development? Ek weet hierdie punte is soms ‘n pyn, en dit kos tyd en geld en moeite. Maar, as jy jou reg instel daarvoor, kan dit baie werd wees. Die hele idee van lewenslange leer is immers ‘n kosbare een. Dit is nie anders in die Christelike lewe nie. Kom leer by Apollos en die twaalf dissipels in Efese hoe lewenslange leer – die “Weg van God” – in die kerk werk. Sondag, 6 September om 09:00 op Youtube.

Continue Reading

Pulse – ons verhouding met die omgewing – 30 Augustus 18:00

Ons beleef tans die Vierde Industriële Revolusie. Dit is ‘n revolusie van data, die “Internet of things”, die vermenging van die fisiese, biologiese, en digitale wêrelde, die virtuele wêrelde waarin ons leef. Dit is wonderlik, maar dit verhoog die probleem wat ons het met besoedeling, afval, en die oorbenutting van bronne. Dit is dan só bevredigend om die Bybel op die eerste bladsy oop te maak en agterkom dat die visie van God vir hierdie wêreld nog presies in die kol is. Dat geen revolusie die basiese dinge wat God ons daar leer, ontkrag nie. Dat die visie van die Bybel vir ons verhouding met die omgewing nog steeds die beste prentjie is wat daar is. Want, God se droom vir die aarde kan in drie woorde saamgevat word … Kom luister Sondag 18:00 na Pulse op Youtube. Jy kan ook 1 GB data wen met ‘n app wat ons bekend stel.

Continue Reading

Youtube erediens 30 Augustus 09:00 – Die kragveld van die Gees

‘n Kenmerk van die lewe in die Heilige Gees is dat ‘n mens vol blydskap is. Dat jy die stem van die Gees in die Bybel hoor. Jou verwonder oor die insigte wat Hy gee. Jou verheug oor sy beloftes. Met oorgawe sy opdragte gehoorsaam. Die gemeentes in Galasië het egter dié blydskap verloor. Sommige het die Gees bedroef deur slawe te word van die wet. Sommige het hulle harte teen die Gees verhard deur slawe te word van die sonde. Wat doen ‘n mens om weer die blydskap te beleef? Om weer in die kragveld van die Gees te kom? Kom luister Sondag 09:00 op Youtube na Paulus se raad in sy brief aan die Galasiërs. Kom vier ook ‘n virtuele nagmaal saam met ons.

Youtube
Klein video (90 MB)
Klankbaan (32 MB)
Boek

Continue Reading

Pulse – Ons verhouding met gesag – 23 Augustus 18:00

Hoe volg ons gesag as wet en orde oor die algemeen begin verdwyn? Hoe vul ons belastingvorms in as ons weet dat ‘n groot deel van ons belastinggeld in korrupte hande gaan beland? Hoe respekteer ons onderwysers as ons hulle swak punte en foute kan raaksien? Kom leer saam oor ons verhouding met gesag by Ds Wimke Jurgens op Sondag, 23 Augustus om 18h00. Ons hoor ook direk by onderwysers en polisiemanne hoe COVID19 hulle werk affekteer.

Youtube

Continue Reading

Youtube erediens 23 Augustus 09:00 – Afdraaipaaie

Paulus gesels in 1 Tessalonisense oor die ewige lewe en ons reis daarheen. Hy het daar klem gelê op die rol wat die huwelik en werk daarin speel. Om “hoopvol op pad” te bly. Gewaarsku teen onsedelikheid en luiheid. Ook uitgebrei oor die wederkoms.

In 2 Tessalonisense gesels Paulus nou oor afdraaipaaie. Dinge wat ons van die pad af kan neem. Dinge soos vervolging en verdrukking. Wat jou die toevlug tot wraak kan laat neem. Of kan inhibeer dat jy jou geloof wegsteek. Om die druk te verlig.

Netso kan jy die afdraaipad van “wetteloosheid” neem. Waar jy die waarheid verdraai, omdat jy nie standpunt wil inneem teen die heersende ideologie van die samelewing of selfs van ‘n groep in die kerk nie. Ideologie is altyd ‘n afdraaipad, want dit verdraai die waarheid. En ons moet ongelooflik versigtig daarvoor wees.

Afdraaipaaie is ernstig. As jy nie koers hou nie, as jy nie lief is vir en bly by die waarheid nie, sal jy beland op ‘n afdraaipad wat jou getuienis sal ruïneer en jou godsdiens sy krag sal laat verloor.

Kom luister Sondag op Youtube om 09:00 verder.

 

 

Continue Reading

Bybelgenootskap is 200 jaar oud!

Klik vir video

Bybelgenootskap se groot 200ste verjaardag feesnaweek is hierdie naweek, 23 Augustus. Die virtuele feeskonsert onder leiding van Richard Cock gaan iets besonders wees.

Hier is vier skakels. Die eerste twee is na hulle YouTube en Facebook platforms waar die erediens en feeskonsert gehoor kan word. Die derde skakel is indien enigiemand nog aan ons virtuele stap en draf vir Bybels wil deelneem.  Die vierde skakel is na ‘n boodskap van Ben Fourie wat vir ons bietjie vertel van die afgelope 200 jaar se geskiedenis en hoogtepunte.

Continue Reading

Youtube erediens 16 Augustus 09:00 – Hoopvol op pad

Onthou jy nog die uitsien na ‘n vakansie? Ons gesin het graag met tente en later karavaan vakansie gehou. So, ons kon oral gaan. En ons het. Die hele land vol. Glentana. Met ‘n Peugeot 403 – 1 468 cc, 48 Kw, 102 Nm enjin – wat ‘n 15 voet karavaan daar teen die steil bult uittrek! Sederberge op ‘n plaas waar ons later moes meet en pas om ons kos te laat uitkom, want die pad Citrusdal toe was ver. Ek onthou die brood wat my ma laat rys het buite onder ‘n doek, en die varke wat dit opgevreet het. Die Drakensberge, Injasuti, Champagne Castle. Port Elizabeth, Gonubie en Struisbaai, stranddienste. Bettiesbaai en die diep swart bergwater van die dam.

Daar was die koekies bak, en die bordspeletjies vir saamneem, Slangetjies en leertjies, Risk en Monopoly, die meet en pas met die inpak, die piekniek langs die pad met die lekkerste padkos, die speletjies op die pad, krieket was ‘n gunsteling met verskillende motors wat die getal lopies bepaal het, en met ‘n Volkswagen Kewer was jy uit, en dan die afwagting vir wie sien eerste die see …

Onthou jy?

Ons is ook as kinders van die Here op pad. Na die ewige lewe. Nie met Google Maps nie, maar met die Bybel. Nie met ‘n GPS se stem nie, maar met die Gees wat ons lei. En ons hoor ook “recalculate”, herbereken, as ons afdwaal. Want, die Here wil ons by ons ewige bestemming uitbring.

Dit is hierdie hoop wat ons lewe bepaal. Dit is die ewige lewe waarvoor ons regmaak. Dit is die Wederkoms van Jesus waarna ons uitsien.

Kom luister verder Sondag 16 Augustus om 09:00 na Paulus aan die woord in sy eerste brief aan die Tessalonisense oor die ewige lewe (en die toekomstige toorn) sodat jy ook hoopvol op pad kan wees.

 

Continue Reading